Read Изге Язма, 2015 Гәләтиялеләргә хат 6 Bible Online

Гәләтиялеләргә хат 6 - Изге Язма, 2015 bible

Гәләтиялеләргә хат 6

¹Имандашлар, кем дә булса берәү ниндидер гөнаһ кылганда тотыла икән, сез, Рух буенча яшәүчеләр, аны басынкылык белән төзәтегез. Тик коткыга бирелмәс өчен, һәрберегез үз-үзен күзәтсен.

²Бер-берегезнең авыр йөкләрен күтәрешегез, шулай итеп Мәсих канунын үтәрсез.

³Үзен зурга санап, чынлыкта һичкем булмаган кеше үз-үзен алдый.

⁴Һәркем үз эшен сынасын, шул чакта ул үзен башка берәү белән чагыштырмыйча, эшләгәне белән горурлана алыр.

⁵Һәркем үз йөген үзе йөртергә тиеш бит.

⁶Аллаһы сүзе белән үгетләнә торган кеше үзенең барлык яхшы нәрсәләрен нәсыйхәтчесе белән уртаклашсын.

⁷Алданмагыз: Аллаһы түбәнсетүләргә дучар була алмый. Кеше ни чәчсә, шуны урыр.

⁸Үзенең гөнаһлы табигатенә чәчүче аннан һәлакәт урыр, ә Рухка чәчүче Аңардан мәңгелек тормыш алыр.

⁹Игелек эшләргә ялыкмыйк, әгәр тукталып калмасак, вакытында уңышны урып алырбыз.

¹⁰Шуңа күрә, җае чыккан саен, һәркемгә бигрәк тә имандашларга игелек эшлик.

¹¹Карагыз, үз кулым белән сезгә нинди зур хәрефләр белән язам.

¹²Әйләнә-тирәдәгеләргә яхшы тәэсир калдырырга теләүчеләр, үзләре Мәсих хачы хакына эзәрлекләнмәсеннәр өчен генә, сезне сөннәтле булырга мәҗбүр итәргә тырышалар.

¹³Сөннәткә утыртылганнар үзләре дә Канунны тотмыйлар, ләкин тән йоласына дучар итеп, сезнең белән мактану өчен, сөннәтле булуыгызны телиләр.

¹⁴Мин исә Хакимебез Гайсә Мәсих хачыннан башка һичнәрсә белән мактанырга теләмим, шул хачка бу дөнья — минем өчен, ә мин дөнья өчен кадакландым.

¹⁵Сөннәт кылуның да, кылмауның да һич әһәмияте юк, фәкать яңа зат итеп яратылу гына әһәмиятле.

¹⁶Шушы кагыйдә буенча эш итүчеләргә һәм Аллаһының чын халкына [14] да иминлек һәм шәфкать булсын.

¹⁷Алга таба миңа һичкем авырлык тудырмасын, чөнки тәнемдә Гайсәнең яра эзләрен йөртәм.

¹⁸Имандашлар, Хакимебез Гайсә Мәсихнең мәрхәмәте сезнең рухыгыз белән булсын. Амин.