Read Изге Язма, 2015 Эфеслеләргә хат 5 Bible Online

Эфеслеләргә хат 5 - Изге Язма, 2015 bible

Эфеслеләргә хат 5

¹Аллаһының сөекле балалары буларак, Аңа охшарга тырышыгыз.

²Мәсих безне яраткандай, тормышыгыз белән дә мәхәббәт җитәкчелек итсен. Аллаһыга хуш исле бүләк һәм корбан булып, Мәсих безнең өчен Үз тормышын бирде.

³Фәхешлек, һичнинди бозыклык һәм комсызлык турында сезнең арада сүз дә булырга тиеш түгел. Аллаһының изге кешеләренә болар килешми бит.

⁴Шулай ук оятсыз сүзләр, сафсата һәм кинаяле мәзәкләр сөйләү дә сезгә килешми, киресенчә, иң яхшысы Аллаһыга шөкер итегез.

⁵Сез беләсез бит: һичбер фәхеш, бозык, шулай ук комсыз кеше (аның потка табынучыдан бернинди аермасы да юк) Мәсих һәм Аллаһы Патшалыгыннан өлеш ала алмый.

⁶Һичкем сезне буш сүзләр белән алдамасын, чөнки шулар аркасында тыңлаусызларга Аллаһының ачуы килә.

⁷Шуңа күрә андыйлар белән эш итмәгез.

⁸Кайчандыр сез караңгылык идегез, ә хәзер сез — Хаким Гайсәнеке булганга — яктылык. Яктылык кешеләре булып яшәгез.

⁹Яктылыкның җимеше — һәртөрле игелеклелек, тәкъвалык һәм хакыйкать.

¹⁰Раббыга [4] мәгъкуль булганны белергә тырышыгыз.

¹¹Караңгылыкның файдасыз эшләрендә катнашмагыз, аларны фаш итегез.

¹²Андый кешеләрнең яшертен рәвештә эшләгәннәре турында, хәтта, сөйләргә дә оят.

¹³Әмма яктылык фаш иткән һәммә нәрсә ачык күренәчәк,

¹⁴яктылык ачык күрсәткән һәммә нәрсә үзе яктылык була. Шуңа күрә: «Йоклаучы, уян! Үледән терел! Һәм Мәсих сине балкытыр», — дип әйтелә.

¹⁵Шуның өчен ничек яшәвегезне карагыз, акылсызлардай түгел, акыл ияләре кебек гомер итегез.

¹⁶Һәрбер очрактан дөрес файдаланыгыз, чөнки без яшәгән заман яманлык белән тулы.

¹⁷Шуңа күрә, акылсыз булмагыз, Раббы [5] ихтыярының нәрсә икәнлегенә төшенегез.

¹⁸Шәраб эчеп исермәгез, чөнки ул азгынлыкка китерә, киресенчә, Изге Рух белән сугарылыгыз.

¹⁹Бер-берегез белән мәдхияләр, мактаулы шигырьләр һәм рухи җырлар аша аралашыгыз, күңелегездән Хакимне данлап җырлагыз.

²⁰Һәрнәрсә өчен Хакимебез Гайсә Мәсих исеме аша Атабыз Аллаһыга даими рәвештә рәхмәт укыгыз.

²¹Мәсихкә ихтирам йөзеннән бер-берегезгә буйсыныгыз.

²²Хатыннар, ирләрегезгә Хаким Гайсәгә буйсынгандай буйсыныгыз.

²³Мәсих иман итүчеләр бердәмлегенең Башы булгандай, ир дә — хатынның башы бит. Мәсих исә бердәмлекнең — Үз тәненең Коткаручысы.

²⁴Бердәмлек Мәсихкә буйсынган кебек, хатыннар да һәрнәрсәдә ирләренә буйсынсыннар.

²⁵Иман итүчеләр бердәмлеген яраткан һәм аның өчен Үз тормышын корбан иткән Мәсих кебек, ирләр, сез дә хатыннарыгызны яратыгыз.

²⁶Ул Үзен бердәмлекне изгеләндерү өчен корбан итте, сүз [6] һәм су белән пакьләндерде.

²⁷Ул моны бердәмлекне данлы, һичнинди тапсыз, кимчелексез һәм башка шундый җитешсез яклардан тыш, ягъни изге һәм керсез итеп, Үз алдына китерү өчен эшләде.

²⁸Шулай ук ирләр, үз тәннәрен ничек яратсалар, хатыннарын да шулай яратырга тиеш. Хатынын яратучы үзен ярата.

²⁹Беркем дә беркайчан да үз тәненә нәфрәтләнми бит, киресенчә, һәркем аны тукландыра һәм аның хакында кайгырта. Мәсих тә бердәмлек турында шулай кайгыртып тора,

³⁰чөнки без — тәненең әгъзалары.

³¹Изге язмада язылганча: «Шуңа күрә ир кеше, атасын һәм анасын калдырып, хатынына кушылыр һәм алар икесе бер тән булыр» [7].

³²Бу — бөек сер: әлеге сүзләрнең Мәсихкә һәм иман итүчеләр бердәмлегенә кагылуын аңлыйм мин.

³³Һәрхәлдә, һәрберегез үз хатынын үз-үзен яраткан кебек яратсын, хатын исә ирен хөрмәт итсен.