Read Изге Язма, 2015 Филиппуйлыларга хат 3 Bible Online

Филиппуйлыларга хат 3 - Изге Язма, 2015 bible

Филиппуйлыларга хат 3

¹Имандашларым, йомгаклап әйтәм, Хаким Гайсәнеке булганга куаныгыз. Сезгә бер үк нәрсәләр турында язу миңа һич тә мәшәкать тудырмый, һәм бу сезнең өчен дә саклану чарасы булыр.

²«Этләрдән» — яманлык кылучылардан сакланыгыз! Дөрес түгел сөннәтләүне таләп итүчеләрдән сакланыгыз!

³Чын сөннәтлеләр — без, тән йолаларына таянучылар түгел, Аллаһыга Рухы белән гыйбадәт кылучылар һәм Мәсих Гайсә белән горурланучылар.

⁴Хәер, мин андый йолаларга да таяна алыр идем. Әгәр башка берәү тән йолаларына таянырга уйласа, моның өчен тагын да күбрәк сәбәбем бар:

⁵мин, туып, сигезенче көнне сөннәткә утыртылганмын, Исраил халкыннан, Беньямин ыругыннан, гыйбри [2] ата-анадан туган гыйбри булып, яһүдиләр Канунына буйсынган фарисей идем.

⁶Бар гайрәтем Мәсих бердәмлеген эзәрлекләүгә юнәлгән иде. Ә инде Канун таләп иткән хаклыкка килгәндә, миңа бәйләнер урын юк иде.

⁷Әмма хәзер исә минем өчен табышлы булганнарны Мәсих хакына югалту дип саныйм.

⁸8-9 Алай гына да түгел, Хакимем Мәсих Гайсәне танып белү өстенлеге белән чагыштырганда, бар нәрсәне дә мәгънәсез дип уйлыйм. Мәсих хакына мин һәрнәрсәдән баш тарттым, Аңа ия булу һәм Аныкы булуым ачык күренсен өчен, калган бар нәрсәне чүп-чар дип исәплим. Хаклыгым Канунны үтәү аша түгел, Мәсихкә иман аша, ул Аллаһыдан һәм иманга нигезләнгән.

¹⁰Мин Мәсихне танырга һәм Аның үледән терелү кодрәтен белергә, газапларын уртаклашырга, үлемендә Аңа охшарга

¹¹һәм ничек булса да үледән терелтелүгә ирешергә өметләнәм.

¹²Мин инде боларның барысына ирештем яки камилләштем, димим, әмма мин барысын үземнеке итәргә тырышам, чөнки Гайсә Мәсих мине Үзенеке итте бит.

¹³Имандашлар, мин үз теләгемә ирештем дип санамыйм, үткәнемне онытып һәм алга омтылып,

¹⁴максатыма ашкынам, Аллаһы мине Мәсих Гайсә аша алырга чакырган бүләккә — күкләрдәге тормышка ирешергә ашыгам.

¹⁵Безнең арада кем дә булса рухи яктан җитлеккән икән, шулай ук фикер йөртергә тиеш. Әгәр сез берәр нәрсә хакында башкача фикер йөртәсез икән, Аллаһы моны да сезгә ачачак.

¹⁶Тик тормышыбызны үзебез ирешкәннәр буенча дәвам итик.

¹⁷Имандашлар, барыгыз да миннән үрнәк алыгыз һәм без күрсәткән үрнәк буенча яшәүчеләргә күз салыгыз.

¹⁸Күпләр Мәсих хачына дошман булып яшиләр, алар турында мин сезгә еш сөйләдем бит, ә хәзер хәтта күз яшьләремне түгеп әйтәм.

¹⁹Аларның ахыры — һәлакәт, аларның илаһы — карын, аларның даны — оялырга тиешле нәрсәләр белән горурлану. Алар бары дөньяви гамәлләр турында уйлыйлар.

²⁰Безнең ватаныбыз исә күкләрдә. Коткаручыны, Хакимебез Гайсә Мәсихне без шуннан ашкынып көтәбез.

²¹Ул зәгыйфь тәнебезне үзгәртер һәм һәрнәрсәне Үзенә буйсындыра алырлык көче ярдәмендә Үзенең күркәм тәненә охшашлы итәр.