Read Изге Язма, 2015 Филиппуйлыларга хат 4 Bible Online

Филиппуйлыларга хат 4 - Изге Язма, 2015 bible

Филиппуйлыларга хат 4

¹Шулай итеп, сөекле һәм зарыгып көткән имандашларым, минем бәхетем һәм дан таҗым, Хаким Гайсәгә булган иманыгызны нык тотыгыз, кадерлеләрем.

²Әүдия белән Сүнтүхиянең икесе дә Хакимнеке булганга күрә, бер үк фикердә булуларын үтенәм.

³Әйе, синнән дә үтенеп сорыйм, тугрылыклы көрәштәшем, зинһар өчен, бу хатыннарга ярдәм ит, чөнки алар да, Климис һәм исемнәре Тормыш китабына язылган башка хезмәттәшләрем дә минем белән бергә Яхшы хәбәр тарату хакына көрәштеләр.

⁴Хаким Гайсәдә һәрвакыт куаныч табыгыз, кабатлап әйтәм: куаныч табыгыз!

⁵Сезнең башкаларга йомшак күңелле булуыгыз һәркемгә мәгълүм булсын. Хакимебез якын инде.

⁶Һичнәрсә турында борчылмагыз, әмма догаларыгыз һәм ялваруларыгызда Аллаһыга үтенечләрегезне һәрвакыт шөкер итеп белдерегез.

⁷Шунда бар фикер сөрешеннән өстенрәк Аллаһы иминлеге йөрәкләрегезне һәм фикерләрегезне Мәсих Гайсә белән берләшеп яшәүдә саклаячак.

⁸Ниһаять, имандашларым, әгәр нинди дә булса яхшылык һәм мактауга лаек эшләр бар икән, нәрсә хак, хөрмәткә лаек, гадел, саф, ягымлы, данлыклы — шулар турында фикер йөртегез.

⁹Нәрсәгә өйрәндегез, миннән нәрсә кабул иттегез һәм ишеттегез, миндә нәрсә күрдегез — боларның барын да тырышып башкарыгыз һәм иминлек Алласы сезнең белән булыр.

¹⁰Шундый озак вакыт узганнан соң, минем хакта яңадан кайгырта башлавыгыз белән Хаким мине бик нык сөендерде. Әлбәттә, сез һәрвакыт минем турыда кайгырттыгыз, әмма моны күрсәтергә мөмкинлегегез генә булмады.

¹¹Моны мохтаҗлыктан чыгып әйтмим, чөнки булганы белән канәгатьләнергә өйрәндем.

¹²Мин фәкыйрьлектә дә, муллыкта да яшәдем. Тукмы яки ачмы, муллыкта яки мохтаҗлыктамы — һәрвакыт һәм төрле хәлләрдә дә канәгать булырга өйрәндем.

¹³Миңа көч Бирүче аркасында, мин һәрнәрсәгә әзер торам.

¹⁴Шулай да, михнәт чигүемне уртаклашып, сез яхшы эшләдегез.

¹⁵Сез, филиппуйлылар, беләсез: Яхшы хәбәр таратыла башлап, мин Македуниядән киткәч, сездән башка һичбер иман итүчеләр бердәмлеге дә матди ярдәм күрсәтмәде миңа.

¹⁶Хәтта мин Тессалуникә шәһәрендә булганда да, сез, ихтыяҗымны канәгатьләндерү өчен, берничә мәртәбә ярдәм җибәрдегез.

¹⁷Моны бүләк өмет итеп әйтмим, әмма табышның сезнең хисапка өстәлгән кебек булуын телим.

¹⁸Мин бөтенесен һәм артыгын да алдым. Эпафрудит аша сез җибәргәннәрнең барын да алдым һәм һичбер мохтаҗлыгым калмады. Алар — хуш исле, Аллаһының күңеленә ятышлы, Аңа яраклы корбан.

¹⁹Аллам сезнең бар ихтыяҗларыгызны Мәсих Гайсәдәге данлы байлыгыннан канәгатьләндерәчәк.

²⁰Атабыз булган Аллаһыга мәңгелектән мәңгелеккә дан булсын. Амин.

²¹Гайсә Мәсихнеке булган һәр изгене сәламләгез. Минем белән бергә булган имандашлар сезне сәламли.

²²Сезне барлык изгеләр, бигрәк тә кайсар сараенда хезмәт итүчеләр сәламли.

²³Хакимебез Гайсә Мәсихнең мәрхәмәте сезнең белән булсын.