Read Изге Язма, 2015 Көлессәйлеләргә хат 1 Bible Online

Көлессәйлеләргә хат 1 - Изге Язма, 2015 bible

Көлессәйлеләргә хат 1

¹ 1-2 Көлессәйдә яшәүче изгеләргә һәм Мәсихкә тугры имандашларга Аллаһының ихтыяры белән Мәсих Гайсәнең рәсүле Паулдан һәм Тимутәй имандашыгыздан сәлам. Сезгә Атабыз Аллаһыдан мәрхәмәт һәм иминлек булсын.

³Сезнең өчен дога кылганда, Аллаһыга, Хакимебез Гайсә Мәсихнең Атасына, һәрвакыт рәхмәт укыйбыз,

⁴чөнки Мәсих Гайсәгә иманыгыз һәм барлык изгеләргә булган мәхәббәтегез турында ишеттек.

⁵Иманыгыз һәм мәхәббәтегез күкләрдә тормышка ашачак өметегезгә нигезләнгән. Бу өмет турында сез элек Яхшы хәбәрнең хак сүзендә ишеткән идегез.

⁶Сезгә килеп җиткән бу Яхшы хәбәр, сез аның турында беренче тапкыр ишеткән һәм Аллаһы мәрхәмәтенең чынлыкта нинди булуын аңлаган көннән бирле, бөтен дөньяда таралгандай, арагызда да шулай зур уңыш китереп тарала.

⁷Сез Аллаһы мәрхәмәте турында безнең хакка Мәсихкә тугрылыклы хезмәтче, сөекле хезмәттәшебез Эпафрастан ишеттегез.

⁸Ул безгә Рухтан килгән мәхәббәтегез турында да хәбәр итте.

⁹Шуңа күрә, бу турыда ишеткән көннән бирле, Изге Рух биргән бар зирәклек һәм аң белән Аллаһының ихтыярын тулысынча танып белүегезне теләп, сезнең өчен дога кылудан һәм ялварып сораудан туктамыйбыз.

¹⁰Һәр игелекле эшегез җимеш китереп, Аллаһыны танып белүегез артканнан-арта барып, Хаким Гайсәгә лаеклы булып яшәрсез һәм һәрнәрсәдә Аңа яраклы булырсыз, дип дога кылабыз.

¹¹Һәрвакыт чыдам һәм сабыр булуыгызны теләп, Аның бөек кодрәте сезне ныгытсын.

¹²Яктылык патшалыгында Үзенең изге халкы өчен саклаган бүләктән өлеш алырга үзегезне лаеклы иткән Атабызга сөенеп рәхмәт әйтегез.

¹³Караңгылык хакимлегеннән коткарып, Ул безне Үзенең сөекле Углы Патшалыгына алып керде,

¹⁴һәм Углы аша без йолып алынабыз, димәк, гөнаһларыбыз кичерелә.

¹⁵Мәсих — күзгә күренмәс Аллаһының чагылышы, Ул — беренче Угыл, яратылганнарның барысыннан да әүвәлрәк,

¹⁶чөнки күктә һәм җирдә булган, күренгән һәм күренмәгәннәрнең һәммәсе Аның аркылы яратылган: җитәкче көчләрме, өстен көчләрме, башлыклармы, хакимлекләрме — барысы Аның аша һәм Аның өчен яратылган.

¹⁷Ул һәрнәрсәдән элек булган, һәм Аның аркасында бар нәрсә бергә тора.

¹⁸Ул — тәннең Башы, ә тән — Аңа иман итүчеләр бердәмлеге. Һәрнәрсәдә беренче булсын өчен, Ул — Башлангыч, үледән тереләселәр арасыннан иң беренче булып терелгән.

¹⁹Аллаһы бөтен тулылыкның Аңарда яшәвен,

²⁰һәм Аның аркылы, Аның хачта түгелгән каны белән тынычлык урнаштырып, җирдәге, күктәге һәр нәрсәне Үзе белән татуландыруны мәгъкуль күрде.

²¹Сез дә фикерегез һәм яман эшләрегез аркасында элегрәк Аллаһыга чит һәм дошман идегез.

²²Ә хәзер Ул Үз алдында изге, кимчелексез һәм гаепсез итеп күрсәтү өчен, Углының тәне аркылы, Аның үлеме аша Үзе белән татулаштырды.

²³Әмма сез, иманыгызда нык һәм тайпылмыйча торып, үзегез ишеткән Яхшы хәбәр биргән өметтән читләшмәскә тиеш. Бу Яхшы хәбәр дөньядагы һәр җан иясенә игълан ителгән һәм мин, Паул, аның хезмәтчесе булдым.

²⁴Хәзер сезнең хакка кичергән михнәтләремә сөенәм. Үз тәне булган иман итүчеләр бердәмлеге өчен Мәсих газапларының җитмәгән өлешен тән газапларым белән тулыландырам.

²⁵Мин, Аллаһы кушуы буенча, бердәмлек хезмәтчесе булдым. Ул, сезгә яхшылык эшләү йөзеннән, Үз сүзен бөтен тулылыгы белән игълан итүне тапшырды миңа.

²⁶Бу сүз — гасырлар дәвамында, буыннардан буыннарга яшерен сер булып килде, хәзер исә ул Аның изгеләренә билгеле булды.

²⁷Аллаһы аларга бөтен халыкларга күрсәтеләчәк бу сернең нинди бай һәм бөек булуын белдерергә теләде. Бу сер шуннан гыйбарәттер: Мәсих — сездә, Ул — Аллаһы данын уртаклашу өчен өметегез!

²⁸Без Мәсих турында игълан итәбез. Һәр кешене Мәсихнең камил иярчене итеп Аллаһыга тәкъдим итү өчен, аны үгетлибез һәм бар зирәклеккә өйрәтәбез.

²⁹Бу максатка ирешү өчен, Мәсихнең миндәге куәтле көче белән, үземне кызганмыйча, бу авыр хезмәтне башкарам.