Read Изге Язма, 2015 Көлессәйлеләргә хат 3 Bible Online

Көлессәйлеләргә хат 3 - Изге Язма, 2015 bible

Көлессәйлеләргә хат 3

¹Сез Мәсих белән бергә терелеп торгансыз икән, күктәге нәрсәләргә ашкыныгыз, Мәсих анда Аллаһының уң ягында утыра.

²Җирдәге нәрсәләр турында түгел, күктәгеләр турында уйлап карагыз.

³Сез үлдегез, ә тормышыгыз Мәсих белән бергә Аллаһыда яшеренгән бит.

⁴Тормышыгыз — Мәсих, һәм Ул килгәндә, сез дә данын уртаклашып, Аның белән бергә килерсез.

⁵Шулай итеп, үзегездәге дөньяви теләкләрне: фәхешлек, бозыклык, нәфес, яман теләкне һәм потка табынуга тиң булган комсызлыкны үтерегез.

⁶Боларның барысы да Аллаһының ачуын китерә [2].

⁷Кайчандыр сез дә боларны эшләгәндә, шул юлларда йөрдегез.

⁸Ә хәзер сез аларның һәммәсеннән: ачу, ярсу, усаллык, яман теллелек һәм әдәпсез сүзләрдән котылыгыз,

⁹бер-берегезгә ялган сөйләмәгез. Сез бөтен кылган гамәлләрегез белән бергә элекке яшәү рәвешегезне кием салгандай салып ташладыгыз бит

¹⁰һәм яңа кеше булып киендегез. Яңа кешене яратучы Аллаһы, Үзен сезгә тагын да ныграк таныту өчен, сезне һәрвакыт Үзенә охшашлы итеп үзгәртеп тора.

¹¹Шуңа күрә инде яһүди булмаганнар һәм яһүдиләр, сөннәтле һәм сөннәтсезләр, вәхшиләр, скифлар [3], коллар һәм иреклеләр арасында бернинди аерма юк, әмма Мәсих — һәммәсе һәм барысында.

¹²Сез, сөекле изгеләр, Ул сайлап алган кешеләр буларак, шәфкатьле, игелекле, тыйнак, басынкы, түземле булыгыз.

¹³Бер-берегезгә сабырлык күрсәтегез һәм, үпкәгез булса, бер-берегезне кичерегез. Мәсих сезне кичергәндәй, сез дә бер-берегезне кичерегез.

¹⁴Бу сыйфатларның барысына мәхәббәтне өстәгез, ул, һәммәсен берләштереп, камиллеккә илтә.

¹⁵Йөрәкләрегез белән Мәсихнең иминлеге хакимлек итсен. Сез, бер тәннең әгъзалары булып, нәкъ менә шушы иминлектә яшәү өчен чакырылгансыз бит. Рәхмәтле булыгыз,

¹⁶Мәсихнең сүзе сездә бар муллыгы белән урнашсын. Бер-берегезне һәр төрле зирәклек белән өйрәтегез һәм үгетләгез. Рәхмәт әйтеп, Аллаһыга мәдхияләр, мактаулы шигырьләр һәм рухи җырлар җырлагыз.

¹⁷Сез нәрсә генә эшләсәгез яки ни генә сөйләсәгез дә — барын да Хакимебез Гайсә Мәсихкә таянып һәм Аның аша Атабыз Аллаһыга шөкер итеп эшләгез.

¹⁸Хатыннар, Хаким Гайсәгә иман итүчеләр үзләрен ничек тотарга тиеш булса, ирләрегезгә шулай буйсыныгыз.

¹⁹Ирләр, хатыннарыгызны яратыгыз һәм аларга кырыс булмагыз.

²⁰Балалар, һәрнәрсәдә ата-аналарыгызның сүзен тыңлагыз, чөнки бу Хакимгә мәгъкуль.

²¹Аталар, балаларыгыз кайгыга батмасыннар өчен, аларны ярсытмагыз.

²²Коллар, дөньядагы хуҗаларыгызга һәрнәрсәдә буйсыныгыз, хезмәт итүегез кешеләргә ярарга тырышып һәм күз буяп түгел, ә тирән хөрмәт белән, Аллаһыдан куркып, чын күңелдән булсын.

²³ 23-24 Хакимнән бүләккә мирас алачагыгызны белеп, нәрсә генә эшләсәгез дә, кешеләр өчен түгел, Хаким өчен эшләгәндәй, чын күңелдән башкарыгыз, чөнки сез Хаким Мәсихкә хезмәт итәсез.

²⁵Ә хаксызлык кылучы үзенә тиешлесен алачак. Аллаһы каршында барысы да тигез.