Read Изге Язма, 2015 I Тессалуникәлеләргә хат 4 Bible Online

I Тессалуникәлеләргә хат 4 - Изге Язма, 2015 bible

I Тессалуникәлеләргә хат 4

¹Аллаһыга яраклы булу өчен, ничек яшәргә кирәклеге турында өйрәткән идек, һәм сез шул өйрәтүләр буенча яшисез. Ә хәзер, имандашлар, без Хаким Гайсә хакына тагын да зуррак тырышлыклар куюыгызны үтенеп сорыйбыз.

²Гайсә Мәсихнең вәкаләте белән сезне нәрсәләргә өйрәткәнебез турында беләсез бит.

³Аллаһы сезнең изге булуыгызны, азгынлыктан тыелып торуыгызны тели.

⁴Һәрберегез үз тәнен изгелектә һәм кадерләп сакларга өйрәнсен иде.

⁵Аллаһыны белмәгән мәҗүсиләрдәй дәрт һәм шәһвәт [3] кушканга иярмәгез.

⁶Мондый очракларда берегез дә үзенә файда эзләп, имандашына [4] каршы явызлык кылмасын, чөнки андый эшләр кылган һәр кеше Хаким тарафыннан җәзага тартылачак. Без сезгә бу турыда кисәтү ясап әйткән идек инде.

⁷Аллаһы безне шакшы булырга түгел, ә изге булып яшәргә чакырды бит.

⁸Шуңа күрә бу өйрәтүләрне кире кагучы зат кешеләрне түгел, ә сезгә Үзенең Изге Рухын җибәрүче Аллаһыны кире кага.

⁹Имандашларыгызны яратуга килгәндә, бу турыда язып торуның кирәге юктыр, чөнки Аллаһы сезнең үзегезне бер-берегезне яратырга өйрәтте

¹⁰һәм, чынлап та, сез бөтен Македуния өлкәсендәге барлык имандашларны яратасыз. Сездән үтенеп сорыйбыз, имандашлар: тагын да ныграк тырышыгыз.

¹¹Без кушканча, тыныч яшәргә, үз эшегез белән генә шөгыльләнергә һәм үз кулларыгыз белән эшләп табарга тырышыгыз.

¹²Шулай эшләсәгез, чит кешеләр алдында тормышыгыз хөрмәт уятыр, үзегезнең ихтыяҗларыгызда беркемгә дә бәйле булмассыз.

¹³Имандашлар, өметсез кешеләрдәй кайгырмавыгызны теләп, үлем йокысына киткәннәр турында белдерәсебез килә.

¹⁴Без Гайсәнең үлгәненә һәм үледән терелгәненә ышанабыз, шуңа күрә Гайсәгә иман итеп, үлем йокысына киткәннәрне Аллаһы Аның белән алып киләчәгенә дә ышанабыз.

¹⁵Хәзер сезгә әйтәчәк сүзләребез Хаким Гайсәнеке. Без, исәннәр — Хаким килгәнче яшәячәк кешеләр — үлем йокысына киткәннәрдән алдарак булмабыз.

¹⁶Боерык ишетелгәндә, җитәкче фәрештә һәм Аллаһы быргысының тавышы астында күкләрдән Хаким Үзе төшәчәк һәм Мәсихкә ышанып үлгәннәр беренче булып тереләчәкләр.

¹⁷Шуннан соң без, исәннәр — монда калганнар — һавада Хакимне каршы алу өчен, алар белән бергә болытларда һавага алыначакбыз һәм без шулай мәңгегә Хакимебез белән бергә булачакбыз.

¹⁸Бер-берегезне шушы сүзләр белән дәртләндерегез.