Read Изге Язма, 2015 I Тессалуникәлеләргә хат 5 Bible Online

I Тессалуникәлеләргә хат 5 - Изге Язма, 2015 bible

I Тессалуникәлеләргә хат 5

¹Бу хәлләрнең кайчан булачагы турында язуыбызның кирәге юк, имандашлар,

²чөнки сез үзегез бик яхшы беләсез: Раббы көне, төнлә карак кергәндәй, көтмәгәндә килеп җитәчәк.

³Кешеләр: «Бар да тыныч, куркыныч түгел», — дип әйткәндә, авырлы хатын-кызның бала тудыру газаплары җиткәндәй, кинәт һәлакәт килер, һәм алар качып котыла алмаслар.

⁴Ә сез, имандашлар, караңгылыкта түгел, шуңа күрә ул көн сезгә карак кебек көтмәгәндә килмәячәк.

⁵Сез барыгыз да — яктылык һәм көн балалары. Без төннеке һәм караңгылыкныкы түгел.

⁶Шулай итеп, башкалардай йоклап ятмыйк, уяу һәм аек булыйк.

⁷Йоклаучылар төнлә йоклыйлар, эчеп исерүчеләр төнлә эчеп исерәләр.

⁸Ә без, яктылык балалары булганга күрә, иманны һәм мәхәббәтне көбә кием итеп, котылуга булган өметне тимер башлык итеп киеп аек булыйк.

⁹Аллаһы безне ачуга дучар итү өчен түгел, ә Хакимебез Гайсә Мәсих аркылы котылу алу өчен билгеләде.

¹⁰Мәсих, исән булсак та, үлем йокысында булсак та, Аның белән бергә яшәвебезне теләп, безнең өчен үлде.

¹¹Шуңа күрә хәзер ничек эшләсәгез, бер-берегезне шулай дәртләндерегез һәм рухи яктан ныгытыгыз.

¹²Имандашлар, арагызда авыр хезмәт куючы, Хаким исеменнән сезгә үгет-нәсыйхәт һәм юнәлеш бирүче кешеләрне хөрмәт итегез.

¹³Хезмәтләре өчен аларга бик ихтирамлы булыгыз һәм аларны яратыгыз. Бер-берегез белән тыныч яшәгез.

¹⁴Сездән, имандашлар, үтенеп сорыйбыз: эшсез утыручыларны үгетләгез, курка торганнарның күңелләрен күтәрегез, хәлсезләргә ярдәм итегез. Бар кешеләргә карата түземле булыгыз.

¹⁵Карагыз аны, берәү дә явызлыкка явызлык белән җавап бирмәсен. Һәрвакыт бер-берегезгә һәм бар кешеләргә яхшылык эшләргә тырышыгыз.

¹⁶Һәрвакыт шатланыгыз.

¹⁷Бертуктаусыз дога кылыгыз.

¹⁸Нинди генә хәлдә булсагыз да, Аллаһыга рәхмәтләр әйтегез, чөнки сездән, Гайсә Мәсихнеке булган кешеләрдән, Аллаһы шуны тели.

¹⁹Изге Рухны сүндермәгез.

²⁰Пәйгамбәрлек итүгә кимсетеп карау булмасын.

²¹Аллаһыданмы, түгелме икәнен белү өчен, бар нәрсәне сынап карагыз, яхшылыкта булыгыз,

²²һәртөрле явызлыктан читкә китегез.

²³Тынычлык чыганагы булган Аллаһы Үзе сезне бөтен килеш изге итсен. Хакимебез Гайсә Мәсих килгәндә, Ул бөтен барлыгыгызны: рухыгызны да, күңелегезне дә, тәнегезне дә саф килеш сакласын.

²⁴Сезне Чакыручы моны эшләячәк, чөнки Ул ышанычлы.

²⁵Имандашлар, безнең өчен дога кылыгыз.

²⁶Бар имандашларны изге үбү белән сәламләгез.

²⁷Хакимнең абруе белән таләп итәм: бу хатны барлык имандашларга укыгыз.

²⁸Хакимебез Гайсә Мәсихнең мәрхәмәте сезнең белән булсын.