Read Изге Язма, 2015 Ешуа 4 Bible Online

Ешуа 4 - Изге Язма, 2015 bible

Ешуа 4

¹Бар халык Үрдүннең аръягына чыгып беткәннән соң, Раббы Ешуага:

²— Халык арасыннан — һәр ыругтан берәр кеше исәбеннән — унике кеше билгеләгез

³һәм аларга Үрдүн елгасының уртасыннан, руханилар басып торган урыннан, унике данә таш алып, бүген төн кунасы урынга илтергә боерыгыз, — диде.

⁴Ешуа, Исраил ыругларыннан сайланган унике кешене чакырып алып:

⁵ 5-6 — Үрдүннең уртасына керегез дә, Раббы Аллагызның Килешү сандыгы яныннан һәркайсыгыз җилкәсендә берәр таш күтәреп алып чыксын, — диде. — Исраил ыруглары санынча алынган шушы ташлар сезнең өчен бер истәлек булыр. Киләчәктә балаларыгыз сездән: «Нинди ташлар бу?» — дип сораса,

⁷аларга: «Раббының Килешү сандыгы Үрдүн аша чыккан чакта, аның алдында суларның ике якка ярылып китү истәлеге бу», — диярсез. Әлеге ташлар Исраил халкы өчен мәңгелек истәлек булып калыр.

⁸Шул рәвешле, Исраил угыллары Ешуаның боерыгын үтәделәр: алар, Раббы Ешуага кушканча, Үрдүн елгасы уртасыннан Исраил ыруглары санынча унике таш алып, төн кунасы урынга китереп өйделәр.

⁹Тагын унике ташны Ешуа Үрдүн елгасының уртасына — Килешү сандыгын күтәреп баручы руханилар басып торган урынга куйдырды. Ул ташлар әле дә шундадыр.

¹⁰Муса Ешуага васыять итеп калдырганча, Ешуа халыкка җиткергән Раббы әмерләре үтәлгәнгә кадәр, Килешү сандыгын күтәргән руханилар шулай Үрдүн уртасында басып тора бирделәр. Халык елганы ашыга-ашыга кичте.

¹¹Исраилиләр елга аша чыгып бетүгә, Раббының Килешү сандыгын күтәргән руханилар да халыкның күз алдында ярга чыктылар.

¹²Муса әйтеп калдырганча, Рубин вә Гәд ыруглары, шулай ук Көнчыгыш менашшелар да, кулларына корал тотып, исраилиләр алдыннан барды.

¹³Яуга керергә әзер торган кырык меңгә якын кораллы гаскәри, Раббы каршында елганы кичеп, Әрихә үзәненә аяк басты.

¹⁴Ул көнне Раббы бөтен Исраилнең күз алдында Ешуаны данга күмде; һәм Ешуа гомере буена, Муса кебек үк, хөрмәт иясе булды.

¹⁵Раббы Ешуага:

¹⁶— Боерыклар сандыгын күтәргән руханиларга Үрдүннән чыгарга боер, — дип әйткән була, һәм

¹⁷Ешуа руханиларга: — Үрдүннән чыгыгыз! — дип әмер бирә.

¹⁸Раббының Килешү сандыгын күтәргән руханилар, Үрдүнне кичеп, коры җиргә аяк басуга, елганың сулары үз урынына кайтып төшә һәм әүвәлгечә ярларына сыешмыйча ага башлый.

¹⁹Шул рәвешле, исраилиләр беренче айның унынчы көнендә, Үрдүнне кичеп, Әрихә шәһәреннән көнчыгышта, Гилгәлдә, чатырларын кордылар.

²⁰Үрдүннән алынган унике ташны да Ешуа Гилгәлдә куйдырды.

²¹Исраилиләргә ул болай диде: — Киләчәктә балаларыгыз сездән: «Бу ташлар нәрсәне аңлата?» — дип сорый калса,

²²исраилиләрнең Үрдүнне җәяүләп кичүен сөйләп бирерсез.

²³Чөнки сез Үрдүн аша чыккан чакта, Раббы Аллагыз елганы сусыз кылды. Кайчандыр Ул нәкъ шулай, без диңгез аръягына чыга алсын өчен, каршыбыздагы Камышлы диңгез суларын киптергән иде.

²⁴Җир йөзендә яшәүче бар халык Раббының көч-гайрәтен белсен һәм сез һәрдаим үзегезнең Раббы Аллагыздан куркып яшәсен өчен эшләде Ул моны.