Read Изге Язма, 2015 I Тимутәйгә хат 2 Bible Online

I Тимутәйгә хат 2 - Изге Язма, 2015 bible

I Тимутәйгә хат 2

¹ 1-2 Иң элек шуны үтенәм: тулысынча диндарлык һәм сафлык белән гаугасыз вә тыныч гомер кичерик дип, бар кешеләр һәм шулай ук патшалар, хакимият кешеләре өчен сорагыз, дога кылыгыз, ялварыгыз, шөкер итегез.

³Бу Коткаручыбыз Аллаһы алдында яхшы һәм мәгъкуль.

⁴Ул барлык кешеләрнең котылуын һәм хакыйкатьне тануларын тели.

⁵ 5-6 Аллаһы бер, Аллаһы белән кешеләр арасында арадашчы да бер, Ул — бар кешеләр котылсын өчен, Үз тормышын биргән Кеше — Мәсих Гайсә: кирәкле вакытта Аллаһы бу турыда шаһитлык бирде.

⁷Мин бу хәбәрне игълан итүче һәм рәсүл, яһүди булмаганнарга иман һәм хакыйкать өйрәтүче итеп куелдым. Мин дөресен сөйлим, ялганламыйм.

⁸Инде шуны телим: ир-атлар һәр җирдә рухи яктан саф булып, ярсымыйча вә бәхәсләшмичә, кулларын күтәреп дога кылсыннар.

⁹Хатын-кызларга исә әдәплелек саклап, тыйнак һәм килешле киенергә кирәк. Алар үзләрен алтын, энҗе, кыйммәтле кием белән һәм чәчләрен үреп түгел,

¹⁰ә игелекле эшләр белән бизәсеннәр. Үзләрен Аллаһыга багышлаган хатыннар нәкъ шулай эшләргә тиешләр дә.

¹¹Хатын-кыз күндәмлек белән тавыш-тынсыз гына өйрәнсен.

¹²Хатын-кызга ир-атны өйрәтергә, аның өстеннән баш булырга рөхсәт итмим, ул тавыш-тынсыз булсын.

¹³Башта Адәм, аннан соң Һава яратылган бит,

¹⁴һәм Адәм алданмаган, хатын-кыз, алданып, әмерне бозган.

¹⁵Әмма әдәплелек белән иман, мәхәббәт һәм әүлиялектә торса, ул ана булу вазифасын үтәп [1] котылачак.