Read Изге Язма, 2015 I Тимутәйгә хат 5 Bible Online

I Тимутәйгә хат 5 - Изге Язма, 2015 bible

I Тимутәйгә хат 5

¹Өлкән яшьтәге ир-атларны шелтәләмә, атаңны үгетләгәндәй үгетлә. Яшь ир-атларны — кардәшләреңне үгетләгәндәй,

²өлкән хатыннарны — анаңны үгетләгән кебек, яшь хатыннарны бар сафлык белән кыз кардәшләреңне үгетләгән кебек нәсыйхәт ит.

³Чыннан да, ялгыз тол хатыннарга хөрмәт күрсәт.

⁴Ә тол хатынның балалары яки оныклары булса, алар башта, ата-аналары һәм әби-бабалары хакында кайгыртып, иманнарын эштә күрсәтергә өйрәнсеннәр, чөнки Аллаһы шуны тели.

⁵Чыннан да, тол һәм ялгыз хатын Аллаһыга өмет баглый һәм, Аллаһыга ялварып, көне-төне дога кыла.

⁶Кәеф-сафа корып яши торган тол хатынны исә тере көе үле дип санарга була.

⁷Кимчелексез булсыннар өчен, бу турыда кешеләрнең күңеленә сеңдер.

⁸Әгәр дә берәү кардәш-ырулары, бигрәк тә якыннары хакында кайгыртмый икән, ул иманыннан ваз кичкән һәм имансыздан да начаррак була.

⁹Бердәмлектәге толлар исемлегенә [3] алтмыш яше тулган һәм бер ирнең генә хатыны булган толлар кертелергә мөмкин.

¹⁰Аның игелекле эшләр кылуы билгеле булырга тиеш: балалар тәрбияләп үстергән, кунакчыллык күрсәткән, имандашларының аякларын юган [4], авырлык килгәннәргә ярдәм иткән һәм үзен һәртөрле игелекле эшкә багышлаган.

¹¹Яшь тол хатыннарны исә исемлеккә кертмә, чөнки алар, җенси теләккә бирелеп, үзләрен Мәсихкә багышлаудан туктыйлар һәм тагын никахка керергә телиләр

¹²һәм, шулай итеп, беренче вәгъдәләрен бозып, үзләрен хөкемгә дучар итәләр.

¹³Шуның өстенә алар, өйдән-өйгә йөреп, эшлексез булырга күнегәләр, эшсез йөреп кенә калмыйлар, тиешсез нәрсәләр сөйләп гайбәт саталар һәм кеше эшенә тыкшыналар.

¹⁴Шуңа күрә мин, яманатын сатар өчен, дошманнарга һичнинди сәбәп бирмәс өчен, яшь тол хатыннарның никахка керүен, балалар тудыруын, йорт-җирне карауларын телим.

¹⁵Инде кайберәүләр, дөрес юлдан читкә борылып, шайтан юлына бастылар бит.

¹⁶Әгәр ниндидер иман итүче хатынның гаиләсендә толлар булса, бердәмлек алар өчен мәшәкатьләнмәсен һәм чыннан да тол булган хатыннарга ярдәм итә алсын өчен, ул аларга үзе ярдәм итәргә тиеш.

¹⁷Яхшы җитәкчелек итүче өлкәннәр, бигрәк тә Аллаһы сүзен белдерүдә һәм өйрәтүдә авыр хезмәт башкаручылар хөрмәт һәм хезмәт хакын алырга лаеклы булып саналсыннар.

¹⁸Изге язма болай ди бит: «ашлык сугучы үгезнең авызын бәйләп куйма» [5] һәм «эшче хезмәт хакына лаек».

¹⁹Өлкәнгә каршы шикаятьне [6] ике яки өч шаһит булганда гына кабул ит.

²⁰Башкаларда да курку тусын өчен, гөнаһ кылучыларны барысы алдында фаш ит.

²¹Аллаһы, Мәсих Гайсә һәм сайланган фәрештәләр алдында мин синнән үтенеп сорыйм: алдан ук тискәре карашта тормыйча һәм берьяклылык күрсәтмичә, бу кагыйдәләрне куллан.

²²Хезмәткә сайлау билгесе итеп, һичкем өстенә ашыгычлык белән кулларыңны куйма һәм башкаларның гөнаһларына катнашма, үзеңне саф тот.

²³Бүтән коры су гына эчмә, карының һәм еш авырмас өчен бераз шәраб та эч.

²⁴Кайбер кешеләрнең гөнаһлары билгеле инде һәм турыдан-туры хөкемгә илтәләр, ә кайберләренең гөнаһлары исә соңрак ачылыр.

²⁵Шул ук рәвештә игелекле эшләр дә билгеле, әгәр кайберләре билгесез икән, яшереп калу мөмкин булмас.