Read Изге Язма, 2015 I Тимутәйгә хат 6 Bible Online

I Тимутәйгә хат 6 - Изге Язма, 2015 bible

I Тимутәйгә хат 6

¹Аллаһы исемен һәм тәгълиматыбызны һичкем хурламасын өчен, коллык богавындагылар үз хуҗаларын барлык ихтирамга лаеклы дип санарга тиеш.

²Хуҗалары иманлы булганнар, бер-берсе белән имандаш булганлыктан, аларга хөрмәтләрен азрак күрсәтергә тиеш түгел, тик тагын да күбрәк хезмәт итсеннәр, чөнки хезмәттән файда казанучы хуҗалар — газиз иманлылар. Боларны өйрәт һәм нәсыйхәт ит.

³Әгәр кем дә кем, башка бер нәрсәгә өйрәтеп, Хакимебез Гайсә Мәсихнең хак сүзләре һәм иманыбызга туры килгән өйрәтү белән килешми икән,

⁴ул тәкәббер, һичнәрсә белми, бәхәсләшергә һәм сүз көрәштерергә һәвәс. Болардан көнчелек, низаг, хурлау, мәкерле шикләнү килеп чыга,

⁵акылларына зыян килгән һәм хакыйкатьтән мәхрүм калган кешеләр арасында фикер каршылыклары туа. Алар өчен Аллаһыга табыну — жиңел табыш алу ысулы гына.

⁶Кеше үзендә булганнар белән канәгать икән, Аллаһыга иман итү — чынлап та, зур табыш ул.

⁷Без дөньяга һичнәрсә алып килмәдек, аннан һичнәрсә алып та китә алмабыз.

⁸Ризыгыбыз һәм кием-салымыбыз булса, шуның белән канәгать булыйк.

⁹Инде баерга теләүчеләр исә коткыга һәм бик күп акылсыз, зарарлы теләкләр тозагына төшәләр. Бу инде кешеләрне афәткә һәм һәлакәткә китерә.

¹⁰Бар явызлыкның башлангычы — акчага хирыслык. Кайберәүләр, моңа бирелеп, иманнан читләшкәннәр һәм үз-үзләрен күп кайгыларга дучар иткәннәр.

¹¹Ә син, Аллаһы кешесе, болардан кач һәм тәкъвалыкка, диндарлыкка, иманга, мәхәббәткә, түземлелеккә һәм басынкылыкка омтыл.

¹²Иман өчен яхшы көрәшеп, мәңгелек тормышка ия бул. Син, күп шаһитлар алдында үз иманыңны таныганда, шул мәңгелек тормышка чакырылдың.

¹³Һәрнәрсәгә тереклек бирүче Аллаһы алдында һәм Понти Пилатка шаһитлык биреп, иманны таныган Мәсих Гайсә хозурында сиңа

¹⁴Хакимебез Гайсә Мәсих килгәнгә кадәр, әмеремне тел тидермәслек һәм кимчелексез итеп башкарырга кушам.

¹⁵ 15-16 Шөһрәтле һәм бердәнбер Хөкемдар, патшаларның Патшасы һәм хакимнәрнең Хакиме [7], бердәнбер үлмәс [8], якын бара алмаслык яктылыкта торучы, һичбер кеше күрмәгән һәм күрүе дә мөмкин булмаган Аллаһы [9] Мәсихне үз вакытында күрсәтәчәк. Аллаһыга хөрмәт һәм мәңгелек хакимлек! Амин.

¹⁷Бу дөньяның байларын кисәт: алар тәкәбберләнмәсеннәр һәм ышанычсыз байлыкка түгел, хозурлану өчен безгә һәрнәрсәне мул итеп бирүче Аллаһыга өмет багласыннар.

¹⁸Яхшылык кылырга, игелекле эшләре белән бай һәм юмарт булырга, үзләрендә булганны башкалар белән бүлешергә әзер торсыннар, дип кисәт аларны.

¹⁹Шул рәвешчә, чын тормышка ирешү өчен, киләчәккә ныклы нигез булырлык хәзинә тупларлар.

²⁰Әй, Тимутәй! Үзеңә ышанып тапшырылганны сакла. Имансыз буш сүзләр, урынсызга гыйлем дип аталып та, дөреслеккә туры килмәгән нәрсәләрдән читтә тор.

²¹Кайберәүләр, шуларга бирелеп, иманнан читләштеләр. Мәрхәмәт сезнең белән булсын.