Read Изге Язма, 2015 Филимунга хат 1 Bible Online

Филимунга хат 1 - Изге Язма, 2015 bible

Филимунга хат 1

¹ 1-2 Кадерле дустыбыз һәм хезмәттәшебез Филимунга, шулай ук йортыңда җыела торган иман итүчеләр бердәмлегенә, имандашыбыз Апфия ханым һәм көрәштәшебез Архипка Мәсих Гайсә хакына зинданда утыручы Паул һәм имандашыгыз Тимутәйдән сәлам.

³АтабызАллаһы вә Хакимебез Гайсә Мәсихтән сезгә мәрхәмәт һәм иминлек булсын.

⁴Филимун, догаларымда сине искә төшергәндә, һәрвакыт Аллама рәхмәт укыйм,

⁵чөнки Хакимебез Гайсәгә иманың һәм изгеләргә карата мәхәббәтең турында еш ишетәм.

⁶Безнең өчен уртак иманыбыз сине Мәсихтә без ия булган бар яхшылыкны тагын да тирәнрәк аңлауга китерсен дип дога кылам.

⁷Имандашым, мәхәббәтең миңа олы шатлык һәм зур юаныч булды, чөнки синең аша иман итүчеләрнең күңелләре тынычланды.

⁸Мәсихтә рухи кардәшең буларак бурычыңны үтәүне таләп итәргә хакым булса да,

⁹башка һичкем түгел, мин, Паул — Мәсих Гайсәнең илчесе һәм Аңа иман итүем [1] өчен хәзер зинданда утыручы тоткын — мәхәббәткә таянып, сиңа үтенеч белән мөрәҗәгать итүне кулайрак күрәм.

¹⁰Тоткынлыкта мин рухи атасы булган углым Онисим [2] хакына сиңа мөрәҗәгать итәм.

¹¹Элек ул сиңа файдасыз иде, хәзер исә синең өчен дә, минем өчен дә файдалы.

¹²Аны, йөрәгемнән өзеп, кире синең янга җибәрәм.

¹³Мин аны үз янымда калдырырга теләр идем: ул, сине алыштырып, Яхшы хәбәр хакына зинданда вакытта миңа ярдәм итәр иде.

¹⁴Әмма ризалыгыңнан башка бернәрсә дә эшлисем килмәде: игелекле эшең ирексезләп кушканга түгел, ә ихтыяри булсын.

¹⁵Ул яныңда бөтенләйгә калсын өчен, синнән вакытлыча аерылып торган булуы да ихтимал.

¹⁶Хәзер ул кол кебек түгел, бәлки колга караганда да яхшырак — кадерле туганыңдай яныңда калыр иде. Мин аны бик яратам, әмма ул кеше буларак та, Хаким Гайсә иярчене буларак та синең өчен тагын да кадерлерәк.

¹⁷Шулай булгач, әгәр мине дус күрсәң, мине кабул иткәндәй, аны да якты чырай белән каршы ал.

¹⁸Ул сиңа ниндидер зыян китергән икән яки бирәчәге булса, боларны минем бурычым итеп сана.

¹⁹Мин, Паул, моны үз кулым белән язам: сиңа үзем түләячәкмен. Инде үзеңнең дә тормышың белән миңа бурычлы булуыңны әйтеп тормыйм.

²⁰Әйе, имандашым, Хакимебез хакына миңа яхшылык кыл; Мәсихтә имандаш буларак, күңелемне күтәр.

²¹Бу үтенечемне кире какмасыңа ышанып язам һәм сораганымнан күбрәк тә эшләячәгеңне беләм.

²²Шулай ук минем өчен дә бер бүлмә хәстәрләп куйчы, чөнки догаларыгызга җавап булып, сезгә кире әйләнеп кайтырмын дип өметләнәм.

²³ 23-24 Мәсих Гайсә хакына кулга алынган Эпафрас һәм хезмәттәшләрем Марк, Аристарх, Димас һәм Лүк тә сине сәламли.

²⁵Хакимибез Гайсә Мәсихнең мәрхәмәте сезнең рухыгыз белән булсын.