Read Изге Язма, 2015 Гыйбриләргә хат 1 Bible Online

Гыйбриләргә хат 1 - Изге Язма, 2015 bible

Гыйбриләргә хат 1

¹Аллаһы борынгы заманда пәйгамбәрләр аша ата-бабаларыбызга күп мәртәбәләр һәм күп төрле сөйләде.

²Шушы соңгы көннәрдә Ул безгә Углы аша сөйләде. Аллаһы Углын бөтен нәрсәнең варисы итеп куйган һәм галәмне Аның аша барлыкка китергән иде.

³Углы — Аллаһының данын чәчкән яктылык вә Аллаһы асылының төп-төгәл чагылышы. Ул һәммә нәрсәне Үзенең кодрәтле сүзе белән тотып тора. Кешеләрне гөнаһларыннанпакьләндергәч, Ул күкләрдә Мәһабәт Аллаһының уң ягына утырды.

⁴Аның алган исеме фәрештәләрнекеннән никадәр данлырак булса, Ул Үзе дә алардан шулкадәр өстенрәк торыр.

⁵Фәрештәләрнең берәрсенә кайчан да булса: «Син — Минем Углым, бүген Мин Синең Атаң булдым» [1], — дип әйткәнме Аллаһы? Тагын фәрештәләрнең кайсы турында да булса: «Мин — Аның Атасы булырмын, ә Ул Минем Углым булачак» [2], — дип әйткәнме Аллаһы?

⁶Янә дөньяга Үзенең беренче Углын китергәндә, Аллаһы: «Барлык Аллаһы фәрештәләре Аңа табынсын» [3], — ди.

⁷Фәрештәләр турында Аллаһы: «Аллаһы Үзенең фәрештәләрен җилләр итә, хезмәтчеләрен янып торган ялкын итә» [4], — ди.

⁸Углы турында исә: «Йа Аллам, тәхетең мәңгелектер, патшалык таягың — гаделлек таягы ул, — ди. —

⁹Сөекледер Сиңа тәкъвалык, нәфрәтледер Сиңа яманлык. Шуңа күрә Аллаһы, Синең Аллаң, ишләрең арасыннан Сине өстен куйды — сөенеч мае белән майлады» [5].

¹⁰Аллаһы тагын болай ди: «Йа Раббым, һәммәсеннән элек Син җирнең нигезләрен бар иттең, күкләр дә — Синең кулларыңның эше.

¹¹Алар бетәчәк, ә Син мәңге булачаксың. Алар һәммәсе дә кием-салым кебек тузып бетәчәк.

¹²Син аларны өс киемедәй төреп алачаксың, алар киемдәй алыштырылачак, әмма Син үзгәрешсез калачаксың, гомер елларың беркайчан бетмәячәк» [6].

¹³Фәрештәләрнең берәрсенә Аллаһы кайчан да булса: «Дошманнарыңны синең аяк астына баскыч басмасы итеп түндергәнче, Минем уң ягымда утыр» [7], — дигәнмени?

¹⁴Фәрештәләр — котылуны мирас итеп алачак затларга хезмәт итү өчен җибәрелгән рухлар түгелмени?