Read Изге Язма, 2015 Гыйбриләргә хат 10 Bible Online

Гыйбриләргә хат 10 - Изге Язма, 2015 bible

Гыйбриләргә хат 10

¹Канун — буласы яхшы нәрсәләрнең төгәл чагылышы түгел, ә аларның күләгәсе генә. Шуңа күрә, ул, елдан ел бертөрле корбаннар китерелеп, Аллаһы алдына килгән кешеләрне беркайчан да камил итә алмый.

²Әгәр дә Канун моны эшли алса, корбаннар китерүдән туктамаслар идемени? Бер тапкыр чистарынгач, гыйбадәт кылучылар үзләрен гөнаһлы дип инде хис итмәсләр иде.

³Әмма ләкин корбаннар ел саен гөнаһ турында искә төшереп тора,

⁴чөнки үгез каны белән кәҗә каны кешенең гөнаһын бетерә алмый.

⁵Шуңа күрә, дөньяга килгәч, Мәсих: «Син корбаннар да, бүләкләр дә теләмәдең, ләкин Минем өчен тән әзерләдең, — диде. —

⁶Сине яндыру корбаннары да, гөнаһ йолу корбаннары да сөендермәде.

⁷Шунда: „Менә Мин. Минем хакта кулъязма төргәгендә язылганча, йа Аллаһы, Синең ихтыярыңны үтәр өчен килдем!“ — дидем» [28].

⁸Шулай итеп, башта Ул: «Син корбаннар да, бүләкләр дә, яндыру корбаннарын да, гөнаһ йолу корбаннарын да теләмәдең, алар Сине сөендермәде», — ди. Аларны бит Канун таләбе буенча китерәләр.

⁹Аннары Ул: «Менә Мин, Синең ихтыярыңны үтәр өчен килдем», — дип өсти. Ул, искесен гамәлдән чыгарып, икенчесен — Аллаһы ихтыярын үтәүне гамәлгә кертә.

¹⁰Мәсих тарафыннан гамәлгә ашырылган Аллаһы ихтыяры буенча, без Гайсә Мәсихнең Үз тәнен бер тапкыр һәм мәңгелеккә корбан итүе белән изгеләндерелдек.

¹¹Һәр рухани, көн саен үз хезмәтен башкарып, күп тапкырлар бертөрле корбаннарны китерә, әмма алар кешене һичкайчан гөнаһлардан арындыра алмый.

¹²Ләкин Мәсих, гөнаһлар өчен мәңгелек көчкә ия булган корбанны бердәнбер мәртәбә китергәч, Аллаһының уң ягына утырды.

¹³Шул вакыттан алып Ул дошманнарын Үз аягы астына баскыч басмасы итеп түндерүен көтә,

¹⁴чөнки Ул изге ителүчеләрне мәңгегә бердәнбер корбан белән камил кылды.

¹⁵Бу хакта безгә Изге Рух та шаһитлык кыла. Башта Ул болай ди:

¹⁶«Ул көннәрдән соң алар белән төзесе килешүем шушы, — ди Раббы. — Үз кануннарымны аларның күңелләренә салырмын, зиһеннәренә язып куярмын».

¹⁷Аннары Ул болай дип өсти: «Гөнаһларын һәм явыз эшләрен инде беркайчан да искә алмам».

¹⁸Гөнаһлар кичерелгән икән, алар өчен корбан бирүнең инде кирәге юк.

¹⁹Шулай итеп, имандашлар, Гайсә каны белән Иң изге бүлмәгә ышаныч белән керә алабыз,

²⁰Ул безгә яңа вә тере юлны ачкан. Бу юл пәрдә, ягъни Аның тәне аша уза.

²¹Аллаһы йорты башында торучы бөек Руханиебыз бар,

²²шуңа күрә, әйдәгез, ихлас күңел вә иман ышанычлылыгы белән, күңелләребезне гөнаһлы вөҗданнан пакьләндереп, тәннәребезне саф су белән юып, Аллаһыга якынайыйк.

²³Үзебез өметне танып, аңа нык итеп таяныйк, чөнки безгә вәгъдә биргән Зат ышанычлы.

²⁴Әйдәгез, бер-беребезгә игътибарлы булыйк, бер-беребезне мәхәббәт вә изге эшләргә дәртләндерик.

²⁵Кайберәүләр кебек, гыйбадәт кылу өчен бергә җыелудан баш тартмыйк, киресенчә, бер-беребезгә көч биреп, тагын да ныграк дәртләндереп торыйк, чөнки Раббы көненең якынлашуын күреп торасыз.

²⁶Әгәр дә без, хакыйкатьне танып белгәннән соң, аңлы рәвештә гөнаһ кылуыбызны дәвам итәбез икән, гөнаһлардан инде бернинди корбан да йолып ала алмас.

²⁷Ә ул чагында инде хөкемне һәм Аллаһының дошманнарын яндырачак, ярсу утны куркынып көтеп торасы гына кала.

²⁸Муса кануныннан баш тарткан кеше, ике яисә өч шаһит күрсәтүе нигезендә, һич кызганусыз үлемгә дучар ителә.

²⁹Алай булгач, Аллаһы Углын аяк астына салып таптаган, Аллаһы килешүенең аны изгеләндергән канын нәҗес дип санаучы, мәрхәмәт Рухын кимсетүче кеше сезнеңчә ни дәрәҗәдә каты җәзага лаек соң?

³⁰«Үч алу — Минем эш, Үзем кайтарып бирәчәкмен» [29] дигән һәм: «Раббы Үз халкын хөкем итәчәк» [30], — дип Әйтүчене беләбез.

³¹Тере Аллаһы кулына эләгү — коточкыч эш!

³²Аллаһы яктылыгы сезне яңа гына яктыртканнан соң булып үткән көннәрне исегезгә төшерегез. Ул чагында сез газапларга каршы көрәштә бирешмәдегез.

³³Кайвакыт сезне бар халык алдында мәсхәрәләделәр, эзәрлекләделәр, кайвакыт сез боларны үз башыннан кичергән кешеләр белән иңгә иң басып тордыгыз.

³⁴Тоткынлыктагы кешеләр белән бергә кайгырдыгыз, милкегездән мәхрүм иткәндә, сез сөендегез дә, чөнки үзегезнең әйбәтрәк, мәңгелек байлыгыгыз барын белә идегез.

³⁵Шуңа күрә кыю булудан туктамагыз, моның әҗере зур булачак.

³⁶Аллаһы ихтыярын үтәп, Ул вәгъдә иткәнне алу өчен, сезгә чыдамлык кирәк.

³⁷Изге язмада язылганча, «Инде күп калмады, киләсе Зат киләчәк, Ул тоткарланмас.

³⁸Тәкъва кешемне иманы яшәтәчәк, ләкин әгәр чигенсә, ул Миңа яраклы булмаячак» [31].

³⁹Ләкин без чигенеп, һәлак булучылардан түгел, без иман итәбез һәм коткарылачакбыз.