Read Изге Язма, 2015 Гыйбриләргә хат 2 Bible Online

Гыйбриләргә хат 2 - Изге Язма, 2015 bible

Гыйбриләргә хат 2

¹Шуңа күрә, туры юлдан читкә чыкмас өчен, ишеткәннәребезгә аеруча игътибарлы булырга тиешбез.

²Фәрештәләр аша җиткерелгән сүз гамәлдә булып, һәртөрле җинаять вә тыңлаусызлык тиешле җәзасын алган икән,

³шундый бөек коткарылу белән исәпләшмәсәк, җәзадан без ничек котылып калырбыз соң? Хакимебез Гайсә бу хакта кешеләргә беренче булып Үзе җиткерде, моны исә безгә Хаким әйткәнне ишеткән кешеләр исбат иттеләр.

⁴Аллаһы Үзе дә моны, галәмәтләр, могҗизалар вә төрле кодрәтле гамәлләр кылып, Изге Рухтан килгән бүләкләрне Үз ихтыяры белән бүлеп биреп исбатлады.

⁵Аллаһы без хәзер сөйли торган киләчәк дөньяны фәрештәләр кулына буйсындырмады.

⁶Әмма кемдер Изге язманың кайсыдыр бер урынында шаһитлык иткән: «Син шулай игътибар күрсәткән инсан кем ул?! Син шулай кайгырткан адәм баласы кем?!

⁷Син аны беркадәр вакытка фәрештәләрдән түбәнрәк куйдың, Син аның башына дан вә кадер-хөрмәт таҗын кидердең,

⁸бар нәрсәне аягы астына салып буйсындырдың» [8]. Бар нәрсәне кешегә буйсындыргач, аңа буйсындырылмаган бернәрсәне дә калдырмады. Ләкин әле без һәммә нәрсәнең аңа буйсынганын күрмибез.

⁹Әмма без Гайсәне күреп торабыз. Ул берникадәр вакытка фәрештәләрдән түбәнрәк куелган иде, ләкин газап чигеп үлгәнгә күрә, Аңа дан вә кадер-хөрмәт таҗы кидерелде. Аллаһының мәрхәмәте аркасында Гайсә һәр кеше өчен үлем татырга тиеш иде бит.

¹⁰Һәммә нәрсә Аллаһы өчен яши һәм барысы да Аның аша бар ителгән. Үзенә иярүче күпләгән кешене данга илткән чагында, котылуларына нигез салучы Гайсәне газаплар аша камиллеккә ирештерүе урынлы булды.

¹¹Кешеләрне изге итүче Гайсә һәм Ул изге иткән кешеләр — һәммәсе дә бер үк Атадан. Менә ни өчен Гайсә аларны туганнарым дип атаудан тартынмый.

¹²Ул: «Шулчак исем шәрифләреңне кардәшләремә сөйләрмен, җыенда Сиңа дан җырлармын» [9], — ди.

¹³Ул тагын: «Мин Раббыга ышаныч баглыйм» [10], — ди. Ул шулай ук: «Менә Мин Үзем һәм Миңа Аллаһы биргән балалар» [11], — ди.

¹⁴ 14-15 Бу балаларның каны вә тәне бар, шуңа күрә Гайсә Үзе дә кешеләр кебек булды. Ул моны үлемгә баш булган иблиснең хакимлеген Үз үлеме белән юк итү, гомере буена үлемнән куркып, кол булып яшәгән кешеләрне азат итү өчен эшләде.

¹⁶Ул, әлбәттә, фәрештәләргә түгел, ә Ибраһим токымына ярдәм итә бит.

¹⁷Шуңа күрә, Үзен корбан итеп, халыкның гөнаһларын йолып алу максаты белән Аллаһыга хезмәт итүдә рәхим-шәфкатьле вә тугрылыклы Олуг Рухани булыр өчен, Гайсә бар нәрсәдә Үзенең туганнарына охшарга тиеш булды.

¹⁸Ул Үзе дә, вәсвәсәләндереп газап чиккәнгә күрә, вәсвәсәгә дучар булганнарга ярдәм итә ала.