Read Изге Язма, 2015 Гыйбриләргә хат 3 Bible Online

Гыйбриләргә хат 3 - Изге Язма, 2015 bible

Гыйбриләргә хат 3

¹Изге имандашлар, сез дә күкләр тарафыннан чакырылгансыз, шуңа күрә Гайсә — тоткан иманыбызның Рәсүле һәм Олуг Рухание турында җентекләп уйлагыз.

²Муса Аллаһы йортындагы эшләрдә тугры булган кебек үк, Гайсә дә Үзен сайлап куйган Аллаһыга тугры булды.

³Йорт төзүчегә йортның үзенә караганда күбрәк хөрмәт күрсәтелгәндәй, Гайсә Мусага караганда олырак хөрмәткә лаек дип саналды.

⁴Әлбәттә, һәрбер йортны кем дә булса берәү сала, ә һәммә нәрсәне Аллаһы бар кылган.

⁵Муса, чыннан да, Аллаһы йортындагы барлык эшләрдә тугры хезмәтче иде һәм моның белән Аллаһы киләчәктә әйтәчәк нәрсәләргә шаһит булды.

⁶Мәсих исә, Угыл буларак, Аллаһы йорты белән тугрылыклы идарә итә. Ә Аның йорты — без, тик кыюлыкны вә өметкә ышанычыбызны ахырга кадәр сакларга кирәк.

⁷Шулай икән, Изге Рух әйткәнчә, «Бүген Аллаһының тавышын ишетәсез икән,

⁸чүлдә булган сынау көнендә Аллаһыга каршы чыккан вакыттагы кебек, каты күңелле булмагыз,

⁹кырык ел буена эшләгән эш-гамәлләремне күрә торып, анда ата-бабаларыгыз Мине сынадылар.

¹⁰Шуңа күрә бу буын кешеләренә ачуым чыкты һәм: „Болар — күңелләре адашкан халык, Минем хак юлымны белмиләр“, — дидем.

¹¹Шуның өчен, ачуым чыгып: „Алар беркайчан да тыныч-имин урыныма кермәячәк“, — дип ант иттем» [12].

¹²Сак булыгыз, имандашлар, берегездә дә тере Аллаһыдан баш тартырлык, явыз, ышанмый торган йөрәк булмасын.

¹³Киресенчә, «бүген» дигән сүз әле гамәлдә булганда, берегез дә гөнаһка алданып киреләнмәсен өчен, бер-берегезне һәр көнне дәртләндереп торыгыз.

¹⁴Без — Мәсихнеке булганны Аның Үзе белән уртаклашучылар, тик безгә ахырга кадәр баштагы ышанычыбызда нык торырга кирәк.

¹⁵Изге язмада әйтелгәнчә: «Бүген Аллаһының тавышын ишетәсез икән, Аллаһыга каршы чыккан вакыттагы кебек, каты күңелле булмагыз».

¹⁶Аллаһы тавышын ишетеп, Аңа каршы баш күтәргән кешеләр кемнәр иде соң? Муса Мисырдан алып чыкканнарның һәммәсе түгел идемени алар?

¹⁷Аллаһы кырык ел буена кемгә ачулы булды соң? Гөнаһ кылып, чүлдә мәет булып калганнарга түгелме?

¹⁸Алар тыныч-имин урыныма беркайчан да кермәячәк, дип кем турында ант итте соң Аллаһы? Сүз тыңламаганнар хакында түгелмени?

¹⁹Шулай итеп, ышанмаулары өчен, Аллаһының тыныч-имин урынына аларның керә алмаганын күрәбез.