Read Изге Язма, 2015 Гыйбриләргә хат 8 Bible Online

Гыйбриләргә хат 8 - Изге Язма, 2015 bible

Гыйбриләргә хат 8

¹Сезгә сөйләгәннәребездә иң мөһиме — күктә Мәһабәт Аллаһы тәхетенең уң ягында утыручы Олуг Руханиебыз бар.

²Ул кешеләр түгел, ә Раббы Үзе корган Изге йортта — чын гыйбадәт кылу чатырында хезмәт итә.

³Һәр баш рухани бүләк вә корбаннар китерү өчен билгеләнә. Шуңа күрә Олуг Руханиебызның да корбан итеп китерә алырлык берәр нәрсәсе булырга тиеш.

⁴Әгәр җирдә булса, Ул рухани булмас иде, чөнки монда Муса кануны буенча корбан китерүчеләр бар инде.

⁵Җирдәге руханилар күктәге йорт үрнәгенә ияреп төзелгән Изге йортта хезмәт итәләр, ә ул күктәге Изге йортның фәкать чагылышы һәм күләгәсе генә. Менә шуңа күрә Мусага гыйбадәт кылу чатыры корыр алдыннан Аллаһы тарафыннан кисәтеп куелган: «Кара аны, һәммәсен дә тауда күрсәтелгән үрнәк буенча эшлә» [21].

⁶Беренче килешүгә караганда Гайсә арадашчы булган килешү әйбәтрәк булган кебек, Аңа тапшырылган хезмәт җирдәге руханилар хезмәтеннән югарырак. Яңа килешү әйбәтрәк, чөнки ул әйбәтрәк вәгъдәләргә нигезләнгән.

⁷Беренче килешү кимчелексез булган булса, икенчесенә ихтыяҗ да булмас иде.

⁸Ләкин Аллаһы, Үз халкыннан гаеп табып, болай дип әйтә: «Менә, шундый көннәр җитәр, — ди Раббы, — Мин Исраил вә Яһүдә халкы белән яңа килешү төзермен.

⁹Бу килешү аларның ата-бабаларын Мисырдан җитәкләп алып чыккан чакта төзегән килешү сыман булмас. Алар килешүемә тугрылыклы булмадылар, һәм алардан йөз чөердем, — ди Раббы. —

¹⁰Исраил халкы белән ул көннәрдән соң төзесе килешүем шушы, — ди Раббы — Үз кануннарымны зиһеннәренә салырмын, күңелләренә язып куярмын. Мин — аларның Алласы, ә алар Минем халкым булачак.

¹¹Инде беркем дә икенче берәүне яисә туганын: „Раббыны танып бел“, — дип өйрәтмәячәк. Мине кечесеннән алып олысына кадәр һәммәсе беләчәк.

¹²Мин явыз эшләрен кичерермен, кылган гөнаһларын инде беркайчан да искә алмам» [22].

¹³Бу килешүне Ул «яңа» дип атап, беренчесенең искереп киткәнлеген күрсәтте, ә гамәлдән чыгарылган һәм искергән нәрсә тиздән юкка чыгар.