Read Изге Язма, 2015 Ягъкубтан хат 1 Bible Online

Ягъкубтан хат 1 - Изге Язма, 2015 bible

Ягъкубтан хат 1

¹Дөнья буйлап таралган унике ыругка [1]Аллаһы һәм Хакимебез Гайсә Мәсих колы Ягъкубтан сәлам!

²Имандашларым, төрле сынауларга эләгүне үзегезгә зур шатлык дип кабул итегез.

³Иманыгыз сыналу түземлек тудыруын сез беләсез бит.

⁴Сезнең һичнинди кимчелекләрсез камил һәм бер бөтен булуыгыз өчен, түземлек үз эшен башкарып чыксын.

⁵Әгәр кайсыгызның да булса зирәклеге булмаса, ул вакытта аны Аллаһыдан сорасын, һәм ул аңа биреләчәк, чөнки Аллаһы юмарт һәм, берсен дә шелтәләмичә, барысына да бирә.

⁶Ләкин сез, инанып, һич тә шикләнмичә сорарга тиеш, чөнки шикләнүчеләр җил куып йөрткән, бер яктан икенче якка бәрелә торган диңгез дулкынына охшаганнар.

⁷Андый кеше Раббыдан нәрсәдер алырмын дип уйламасын.

⁸Мондый кеше икеләнүчән, үзенең кылган гамәлләрендә нык тормаучан була бит.

⁹Мохтаҗ имандаш үзенең югары дәрәҗәгә күтәрелүе белән горурлансын.

¹⁰Бай исә үзенең түбән дәрәҗәгә төшерелүе белән горурлансын, чөнки ул кыргый чәчәк шикелле юкка чыгачак.

¹¹Кояш чыгып, көйдергеч эсселек башлана, эсседән үлән сула, аның чәчәге коела һәм матурлыгы югала. Байлар да шулай ук үзләренең эшләрен эшләгәндә сулачак.

¹²Сынауларга түзгән кеше бәхетле: алар аша узып, ул Аллаһы Үзен сөючеләргә вәгъдә иткән тормыш таҗын алыр.

¹³Коткыга төшкәннәрнең берсе дә: «Бу коткы Аллаһы тарафыннан җибәрелгән», — дип әйтергә тиеш түгел, чөнки явызлык Аллаһыны вәсвәсәләндерә алмый һәм Аллаһы Үзе беркемне дә вәсвәсәләндерми.

¹⁴Һәркемне үзенең үк хайвани теләкләре вәсвәсәгә сала, алар аны кызыктырып алып кереп китә һәм тозакка эләктерә.

¹⁵Шуннан соң хайвани теләк, яралып, гөнаһны тудыра, ә гөнаһ ныгыгач — үлемне.

¹⁶Үзегезгә алданырга ирек бирмәгез, газиз имандашларым.

¹⁷Һәр игелекле һәм камил бүләк югарыдан, күк яктылыклары Атасыннан килә. Ул һәрвакыт үзгәрешсез һәм һичкайчан, борылып, караңгылык тудырмый [2].

¹⁸Бар иткәннәре арасында безнең беренче җимеш булуыбызны теләп, Ул безне хакыйкать сүзе аша Үз ихтыяры белән тудырды.

¹⁹Газиз имандашларым, шуңа игътибар итегез: һәркем тыңларга өлгер булырга, ә сөйләргә һәм ачуланырга ашыкмаска тиеш,

²⁰чөнки кеше ачуы Аллаһы теләгән тәкъва тормышка алып килми.

²¹Шулай итеп, бөтен әхлакый шакшылыктан һәм башка төрле яманлыктан ваз кичегез. Йөрәкләрегез туфрагына утыртылган Аллаһы сүзен тыйнаклык белән кабул итегез, ул сүз җаннарыгызны коткара ала.

²²Сүзне тыңлап кына үз-үзегезне алдамагыз, ә аны үтәгез.

²³Кем дә булса Аллаһы сүзенә колак сала, ләкин аны үтәми икән, ул үз йөзен көзгедән караучыга охшап кала:

²⁴үзенә җентекләп карый да, читкәрәк китү белән, йөзенең ниндилеген шундук оныта.

²⁵Әмма кем дә кем Аллаһының камил иреклелек Канунын игътибар белән тикшерә һәм, шулай дәвам итеп, ишеткәнен онытмыйча башкара икән, ул үз эшләрендә бәхетле булыр.

²⁶Әгәр кем дә булса үзен Аллаһыга табынучы дип саный, ләкин телен тыймый икән, бу вакытта ул үзен алдый гына, һәм аның Аллаһыга табынулары бернигә тормый.

²⁷Аллаһы Ата Үз каршында саф, эчкерсез санаган табыну — ятимнәрнең, тол хатыннарның кайгылары белән уртаклашып, алар турында кайгырту һәм үзеңне, нәҗесләмичә, фани дөньядан саклау.