Read Изге Язма, 2015 Ягъкубтан хат 2 Bible Online

Ягъкубтан хат 2 - Изге Язма, 2015 bible

Ягъкубтан хат 2

¹Имандашларым минем, иң бөек Хакимебез Гайсә Мәсихкә иман итүчеләр буларак, һәркемгә тигез карагыз.

²Әйтик, җыелышыгызга бай киенгән, алтын балдаклы кеше һәм шулай ук тузган кием кигән ярлы кеше дә килә, ди.

³Бай киенгән кешегә аерым игътибар биреп: «Менә монда, бу яхшы урынга утырыгыз», — дип әйтәсез, ярлыга исә: «Әнә тегендә бас» яисә «Аягым очына утыр», — дисез.

⁴Шуның белән үз арагызда бер-берегезне аерып карыйсыз һәм начар фикерләргә таянучы хөкемчегә охшап каласыз түгелме?

⁵Тыңлагыз, газиз имандашларым! Үзен яратучыларга вәгъдә иткән Патшалыкның варислары һәм бай иманлы булсыннар дип, Аллаһы бу дөньяның ярлыларын сайлап алмадымыни?!

⁶Сез исә ярлыларны мәсхәрәлисез. Сезне җәберләүчеләр һәм мәхкәмә алдына сөйрәүчеләр — байлар түгелмени инде?!

⁷Сез йөртә торган исемне — Мәсихнең яхшы исемен яманлаучылар шулар түгелмени?!

⁸Әгәр сез Изге язмада әйтелгән: «Якыныңны үзеңне яраткан кебек ярат» [3] дигән Аллаһы Патшалыгы канунын үтисез икән, дөрес эшлисез.

⁹Ләкин әгәр һәркемгә дә тигез карамасагыз, гөнаһ кыласыз һәм Канун сезне җинаятьчеләр итеп күрсәтә.

¹⁰Кем дә кем Канунны тулысынча үти, әмма аның бер генә таләбен бозса да, бөтен Канунны бозуда гаепле.

¹¹Чөнки «Зина кылма» [4] дип әйткән Аллаһы шулай ук «Үтермә» [5] дип тә әйткән. Һәм шуңа күрә дә, әгәр зина кылмасаң, ләкин үтерсәң, син Канунны бозучы буласың.

¹²Иреклелек кануны буенча хөкем ителәсе кешеләр буларак сөйләгез һәм гамәл кылыгыз.

¹³Рәхимлелек күрсәтмәгәннәргә хөкем рәхимсез булыр. Рәхимлелек исә хөкемнән өстен тора!

¹⁴Әгәр кем дә булса: «Мин иман итәм», — дип әйтә, ә эштә күрсәтми икән, имандашларым, моннан ни файда? Андый иман аны коткара аламы?

¹⁵Әгәр имандаш ир-ат йә хатын-кыз киемгә яки ризыкка мохтаҗ булып, сезнең берәрегез:

¹⁶«Иминлек белән китегез. Җылыныгыз һәм яхшы итеп тукланыгыз!» — дип әйтсә, әмма аларга тормышта кирәк булган нәрсәләрне бирмәсә, бу сүзләрдән ни файда?

¹⁷Иман да шулай. Гамәлсез иман үзе үк үле була.

¹⁸Ләкин кемдер: «Синең — иман, ә минем эшләр бар!» — дип әйтер. Син миңа үзеңнең иманыңны гамәлләрдән башка күрсәт. Ә мин сиңа үз иманымны кылган гамәлләрем белән күрсәтермен!

¹⁹Син Аллаһының бер булуына ышанасың. Яхшы! Хәтта җеннәр дә моңа ышана һәм калтырап тора.

²⁰Әй, син, төпсез кеше! Иманның гамәлдән башка файдасыз булуына дәлилләр телисеңме?

²¹Әллә атабыз Ибраһим, үз углы Исхакны мәзбәхкә корбан рәвешендә алып килеп, эш-гамәлләре белән Аллаһы тарафыннан акланмаганмы?

²²Күрәсең ки, аның иманы кылган гамәлләре белән бергә үрелеп барган һәм шул гамәлләре аркылы иманы камилләшкән.

²³Изге язмадагы: «Ибраһим Аллаһыга ышанды, һәм моның белән тәкъва булып саналды» [6] дигән сүзләр тормышка ашты. Шулай итеп, ул «Аллаһы дусты» [7] дип аталды.

²⁴Күрәсез, кеше иман белән генә түгел, бәлки кылган гамәлләре белән Аллаһы тарафыннан аклана.

²⁵Хәбәрчеләрне сыендырып һәм аларга башка юлдан качарга ярдәм итеп, фахишә Рәхәб тә кылган гамәленә карап, Аллаһы тарафыннан акланган [8].

²⁶Шулай итеп, рухсыз тән үле булгандай, иман да кылынган гамәлдән башка үледер.