Read Изге Язма, 2015 I Яхъядан хат 1 Bible Online

I Яхъядан хат 1 - Изге Язма, 2015 bible

I Яхъядан хат 1

¹Баштан ук булган, без ишеткән, үз күзләребез белән күргән, күзәткән һәм кулларыбыз белән кагылган нәрсә — тормыш Сүзе хакында сөйлибез.

²Тормыш ачылды: без аны күрдек һәм аның турында шаһитлык итәбез. Атабыз белән булган, безгә ачылган мәңгелек тормышны сезгә игълан итәбез.

³Безнең белән аралашуыгызны теләп, үзебез күргән һәм ишеткән нәрсәне сезгә дә игълан итәбез. Ә без исә Ата һәм Углы Гайсә Мәсих белән аралашып яшибез.

⁴Куанычыбыз тулы булсын дип, боларны сезгә язабыз.

⁵Без Аңардан ишеткән һәм сезгә игълан итә торган хәбәр шуннан гыйбарәт: Аллаһы — яктылык, һәм Аңарда һичнинди караңгылык юк.

⁶Әгәр без: «Аллаһы белән аралашып яшибез», — дип әйтәбез, әмма караңгылыкта йөрибез икән — без ялганлыйбыз һәм хакыйкать буенча яшәмибез.

⁷Әмма Аллаһы яктылыкта булган кебек, без дә яктылыкта йөрсәк, димәк, бер-беребез белән аралашып яшибез һәм Аның Углы Гайсәнең каны безне теләсә кайсы гөнаһтан арындырып сафландырыр.

⁸Әгәр: «Гөнаһыбыз юк», — дисәк, үз-үзебезне алдыйбыз һәм бездә хакыйкать юк.

⁹Әмма гөнаһларыбызны икърар итсәк, Аллаһы гөнаһларыбызны кичерер һәм, һәртөрле хаксызлыктан арындырып, безне сафландырыр, чөнки Ул тугры һәм гадел.

¹⁰«Без гөнаһ кылмадык», — дисәк, Аллаһыны ялганчы итеп күрсәтәбез һәм Аның сүзе бездә булмас.