Read Изге Язма, 2015 I Яхъядан хат 2 Bible Online

I Яхъядан хат 2 - Изге Язма, 2015 bible

I Яхъядан хат 2

¹Балаларым! Боларны сезгә, гөнаһ кылмагыз, дип язам. Ә инде берәү гөнаһ кылса, Атабыз алдында Яклаучыбыз — һәрвакыт гадел гамәл кылучы Гайсә Мәсих бар.

²Ул гөнаһларыбызның, безнең генә түгел, бәлки бөтен дөньяның да гөнаһлары кичерелүен алып килүче корбан булды.

³Без шуңа ышана алабыз: әмерләрен үтәсәк, Аны тануыбызны беләбез.

⁴Кем дә кем: «Мин Аллаһыны таныйм», — дип торып, әмма әмерләрен үтәмәсә, ул — ялганчы һәм аңарда хакыйкать юк.

⁵Ә Аның сүзләрен үтәүчедә Аллаһы мәхәббәте чыннан да тулы камиллегенә ирешкән. Бу исә безнең Аңарда булуыбызны күрсәтеп тора.

⁶Кем дә кем: «Аллаһыда калам», — ди икән, ул Гайсә сыман яшәргә тиеш.

⁷Газиз дусларым! Яңа әмер язмыйм, сездә баштан ук булган иске әмерне язам: иске әмер исә — сез ишеткән хәбәр ул.

⁸Шулай да бу әмер яңа: ул Мәсихтә һәм сездә гамәлгә ашты, чөнки караңгылык кире чигенә, хакыйкый яктылык балкый башлады.

⁹Кем дә кем үзен яктылыкта дисә, әмма имандашына [1] нәфрәтләнсә, ул һаман караңгылыкта була.

¹⁰Кем дә кем үзенең имандашын ярата икән, ул яктылыкта яши, һәм аңарда башкаларны вәсвәсәгә этәрә торган бернәрсә юк.

¹¹Ә кем үзенең имандашына нәфрәтләнсә, ул караңгылыкта була, караңгылыкта йөри һәм кая баруын белми, чөнки караңгылык күзләрен сукырайта.

¹²Балаларым, сезгә язам, чөнки гөнаһларыгыз Гайсә аркасында кичерелде.

¹³Аталар, сезгә язам, чөнки баштан ук Булучыны сез танып белдегез. Егетләр, сезгә язам, чөнки сез явыз иблисне җиңдегез.

¹⁴Балаларым, сезгә язам, чөнки сез Атабызны танып белдегез. Аталар, сезгә язам, чөнки сез баштан ук Булучыны танып белдегез. Егетләр, сезгә язам, чөнки сез көчле, Аллаһы сүзе сездә кала, һәм сез явыз иблисне җиңдегез.

¹⁵Фани дөньяны һәм анда булган нәрсәләрне яратмагыз. Дөньяны яратучыда Атабызны ярату юк.

¹⁶Бу дөньядагы һәммә нәрсә — тән нәфесләре, күз нәфесе һәм тормышта тәкәбберлеккә китерүче нәрсәләр — Атабыздан түгел, фәкать дөньядандыр.

¹⁷Дөнья һәм аның нәфесләре үтеп китә, әмма Аллаһы ихтыярын үтәүче мәңге яши.

¹⁸Балаларым! Соңгы сәгатьләр җитте. Мәсих дошманының [2] киләчәге хакында сез ишеткән идегез инде. Хәзер Мәсихнең күп дошманнары пәйда булды. Соңгы сәгатьләр җиткәнен шуннан беләбез дә инде.

¹⁹Алар безнең арадан, әмма безнеке булмадылар. Әгәр безнеке булган булсалар, алар безнең белән калган булырлар иде. Аларның арабыздан китүе безнеке булмауларын күрсәтеп тора.

²⁰Сезне исә Изге Зат майлаган [3], һәм сез барыгыз да хакыйкатьне беләсез.

²¹Мин хакыйкатьне белмәгәнегез өчен түгел, әмма аны белгәнегез өчен һәм хакыйкатьтән һичнинди ялган килеп чыга алмаганга яздым.

²²Кем ялганчы? Гайсәнең Мәсих икәнен инкяр итүче түгелме? Ул — Мәсихнең дошманы, ул Атаны да, Углын дә инкяр итә.

²³Аллаһы Углын инкяр итүче һичкемнең Атасы да юк. Аллаһы Углын танучының исә Атасы да бар.

²⁴Сез баштан ишеткән нәрсәне күңелләрегездә саклагыз. Әгәр баштан ишеткән нәрсә күңелләрегездә калса, ул чакта сез дә Углында һәм Атасында яшәрсез.

²⁵Ул Үзе безгә вәгъдә иткән нәрсә — мәңгелек тормыш бу.

²⁶Боларны мин сезне юлдан яздырырга тырышучылар хакында язам.

²⁷Ә Изге Зат биргән майлау сезнең үзегездә кала, һәм сез һичкемнең өйрәтүенә мохтаҗ түгелсез. Сезне майлавы аша, сезгә барысы да өйрәтелә, һәм ул хакыйкый, ялганламый. Сезгә өйрәтелгәнчә, Аңарда калыгыз.

²⁸Балаларым, Мәсих килгәндә, Аның алдында ышаныч белән оялмыйча басып тору өчен, Мәсихтә яшәгез.

²⁹Аның хак булуын беләсез икән, димәк, хаклык эшләүче һәркемнең Аллаһыдан туган булуын да беләсез.