Read Изге Язма, 2015 Хөкемчеләр 17 Bible Online

Хөкемчеләр 17 - Изге Язма, 2015 bible

Хөкемчеләр 17

¹Эфраим таулыгында гомер итүче Михә исемле бер адәм

²үзенең әнисенә: — Бер мең дә бер йөз шәкыл көмешең югалгач, синең ләгънәт укыганыңны мин ишетеп тордым. Ул көмеш миндә, мин алдым аны! — диде. — Раббы минем углымны мөбарәк кылсын! — диде әнисе,

³һәм углы аңа бер мең дә бер йөз шәкыл көмешне кайтарып бирде. — Әлеге көмешне мин углым хакына Раббыга багышлыйм! Әлеге көмештән бер сын коеп бирсеннәр. Көмеш шулай углыма кайтсын, — диде.

⁴Углы көмешне кабат әнкәсенә биргәннән соң, әнкәсе, ике йөз шәкыл көмешне алып, көмешчегә илтте дә сын койдырып алды. Шул вакыттан башлап, әлеге сын Михә йортында булды.

⁵Михә исемле бу адәмнең гыйбадәтханәсе булып, ул үзенә эфод белән йорт илаһларының сыннарын юнәтеп алды да угылларының берсен руханилыкка багышлады.

⁶Ул заманнарда әле Исраил җирендә патшалар булмыйча, һәркем ничек кирәк тапса, шулай эшли иде.

⁷ 7-8 Яһүдиләр арасында яшәгән бер егет (ул Леви ыругыннан иде), Яһүдә Бәйт-Лехемендәге йортын калдырып, башка урында җирләшергә ният корып йөргән чагында, Михәнең Эфраим таулыгындагы өе янына килеп чыга.

⁹— Кай тарафлардан килеп барышың? — дип сорый аңардан Михә. — Леви нәселеннән мин, Яһүдә Бәйт-Лехеменнән киләм. Кая барып төпләним икән дип, ил гизеп йөрүем, — дип җавап кайтара егет.

¹⁰— Минем йортымда кал, — ди аңа Михә, — рухани, атам урынына киңәшче булырсың. Мин сиңа бер елга ун шәкыл көмеш түләрмен, аңардан тыш, өс-башыңны һәм тамагыңны кайгыртырмын.

¹¹Егет аның янында яшәп калырга ризалык бирә, һәм Михә аны углы кебек күрә.

¹²Михә аны руханилыкка багышлый, һәм ул егет аның йортында яшәп кала.

¹³— Хәзер инде Раббы миңа якты чыраен күрсәтер, чөнки минем рухани — Леви нәселеннән! — ди Михә.