Read Изге Язма, 2015 Хөкемчеләр 2 Bible Online

Хөкемчеләр 2 - Изге Язма, 2015 bible

Хөкемчеләр 2

¹Беркөн Гилгәлдән Бохимга Раббы фәрештәсе, килеп, болай диде: — Мин сезне Мисыр иленнән алып чыктым һәм, бабаларыгызга ирештергән ант-карарымны үтәп, сезне әлеге җирләргә китердем, «сезнең белән төзегән изгекилешүемне Мин мәңге бозачак түгелмен,

²сез исә бу илнең халкы белән килешү төземәгез, аларның мәзбәхләрен җимерегез!» — дидем. Ләкин сез Минем сүзләремне игътибарга алмадыгыз. Ничек шулай эшли алдыгыз сез?

³Шуңа күрә Мин сезгә болай дип әйтәм: «Мин аларны сезнең яннан куып җибәрмәячәкмен. Биредә яшәүче халыклар сезнең өчен — элмәк, илаһлары исә тозак булыр».

⁴Раббы фәрештәсе әлеге сүзләрне исраилиләргә ирештергәч, халык кычкырып еларга тотынды.

⁵Шуңа күрә бу урын Бохим [3] дип атала. Исраилиләр анда Раббыга корбан китерделәр.

⁶Ешуа халыкка китәргә рөхсәт иткәннән соң, исраилиләр үз өлешенә тигән җирләренә таралышты; һәм әлеге җирләр аларның биләмәсенә әйләнде.

⁷Ешуа үзе һәм аңардан соң яшәгән өлкәннәр Раббының Исраил хакына башкарган бөек эшләрен күргән заманнарда халык Раббы юлында булды.

⁸Әмма Раббы колы Нун углы Ешуа йөз дә ун яшенә җитеп дөнья куйганнан,

⁹һәм аны Гәгаш тавыннан төньяктарак — Эфраим таулыгындагы Тимнат-Херес шәһәрендәге үз биләмәсендә җир куенына тапшырганнан,

¹⁰һәм аның чордашлары үзләренең ата-бабалары янына бакый дөньяга күчкәннән соң, аларга алмашка Раббыны һәм Исраил хакына Ул башкарган эшләрне белмәүче яңа буын килгәч,

¹¹исраилиләр Раббы күз алдында яман гамәлләр кыла һәм Багал сыннарына табына башладылар.

¹²Алар, үзләренең ата-бабаларын Мисыр җиреннән алып чыккан Раббы Алладан йөз чөереп, әйләнә-тирәләрендә яшәүче халыкларның илаһларын үз итә һәм аларга табына башлап, Раббының ачуын чыгардылар,

¹³Раббыдан йөз чөереп, Багал белән Аширәгә табына башладылар!

¹⁴Раббының исраилиләргә бик нык ачуы чыгып, Ул аларны талаучылар иркенә калдырды — һәм тегеләр таладылар; исраилиләрне Ул төрле яктан урап алган дошманнары кулына тапшырды — исраилиләрнең инде дошманга каршы торырлык хәле юк иде.

¹⁵Исраил кай тарафка яу чапса да, Раббы, алдан кисәтеп куйганча һәм ант иткәнчә, аларны бәла-казага дучар итә торган булды. Исраилиләрнең хәлләре авыр иде.

¹⁶Шуннан Раббы, исраилиләрне талаучылар кулыннан коткарыр өчен, хөкемчеләр билгели башлады.

¹⁷Әмма халык хөкемчеләр сүзенә дә колак салмады — Раббыга тугрылык сакламыйча, башка илаһларга табынды. Аталары йөргән юлдан бик тиз читкә тайпылды. Ата-бабалары Раббы кушканнарны үтәгән булса, балалары исә башкача гамәл кылды.

¹⁸Хөкемчеләр билгеләгән чакта Раббы, Үзе дә хөкемче янында булып, хөкемче исән чакта исраилиләрне дошманнарыннан коткара килде, чөнки җәберләүчеләрнең һәм залимнәрнең [4] кысу-изүеннән ыңгырашкан исраилиләрне кызганды.

¹⁹Әмма хөкемче дөнья куюга, исраилиләр, чит илаһларны үз итеп, аларга ияреп китә һәм табына, аталарыннан да уздырып, әүвәлге эшләренә тотына — үзләренең явыз гамәлләрен һәм үҗәтләнүләрен дәвам итә иделәр.

²⁰Шуннан соң Раббының исраилиләргә бик нык ачуы чыгып, Ул: — Аларның аталары белән Мин төзегән килешүне санламаган һәм Минем сүзләремә илтифат итмәгән өчен,

²¹Ешуаның вафатыннан соң биредә калган халыкларның берсен дә исраилиләр яныннан куып җибәрмәячәкмен!

²²Әлеге халыклар ярдәмендә Мин исраилиләрне сынармын: ата-бабалары сыман, алар Раббы юлыннан йөрерләрме икән?

²³Шул рәвешле, Раббы бу халыкларны шундук куып җибәрмәде һәм, Ешуа кулына тапшырмыйча, яшәгән җирләрендә калдырды.