Read Изге Язма, 2015 II Яхъядан хат 1 Bible Online

II Яхъядан хат 1 - Изге Язма, 2015 bible

II Яхъядан хат 1

¹Аллаһы тарафыннан сайланган ханымга һәм аның балаларына иман итүчеләр бердәмлегеөлкәненнән сәлам. Мин сезне ихлас күңелдән яратам. Мин генә түгел, хакыйкатьне танып белгән һәммә кеше сезне ярата.

²Сезне үзебездә яши торган һәм безнең белән мәңге булачак хакыйкать өчен яратабыз.

³Атабыз Аллаһыдан һәм Гайсә Мәсих — Атаның Углыннан бирелгән мәрхәмәт, шәфкать һәм иминлек безнең белән хакыйкатьтә һәм мәхәббәттә булсын.

⁴Балаларың арасында Атабыз безгә әмер биргәндәй хакыйкатьтә йөрүчеләр булуы мине бик сөендерә.

⁵Хәзер, ханым, сиңа яңа әмер түгел, бәлки баштан ук без кабул иткән әмерне язам һәм үтенәм: бер-беребезне яратыйк.

⁶Мәхәббәт исә шуннан гыйбарәт: без Аллаһының әмерләре буенча йөрергә тиешбез. Баштан ук ишеткәнегезчә, Аның әмере шул: сез мәхәббәттә йөрергә тиешсез.

⁷Гайсә Мәсихнең кеше тәнендә килүен инкяр итүче алдакчылар дөньяда күбәеп китте. Андый кешеләр — алдакчылар һәм Мәсих дошманнары.

⁸Сез нәрсә хакына хезмәт куйганыбызны югалтмыйча, тулы әҗерен алыр өчен, сак булыгыз.

⁹Мәсих өйрәткәнне сакламаган һәм өйрәткәннәрнең чигеннән узган һәркемдә Аллаһы юктыр. Өйрәткәнне саклаучыда исә Ата да, Аның Углы да бар.

¹⁰Әгәр сезгә берәү килеп, шулай өйрәтмәсә, ул кешене өегездә кабул итмәгез һәм аны сәламләмәгез.

¹¹Мондый кешене сәламләгән аның явыз эшләренә кушылып китә.

¹²Сезгә язасы сүзләрем күп, әмма кәгазьгә кара белән язарга теләмим. Куанычыбыз тулы булсын өчен, яныгызга килеп, сезнең белән сөйләшүемә өметләнәм.

¹³Аллаһы тарафыннан сайланган имандаш кыз туганыңның балалары сине сәламлиләр.