Read Изге Язма, 2015 Ачылыш 1 Bible Online

Ачылыш 1 - Изге Язма, 2015 bible

Ачылыш 1

¹Тиздән нәрсә булырга тиешлеген Үзенең колларына күрсәтер өчен, Аллаһы тарафыннан Гайсә Мәсихкә бирелгән ачылыш. Ул аны Үзенең фәрештәсе аркылы җибәреп, колы Яхъяга белдерде.

²Яхъя Аллаһы сүзе һәм Гайсә Мәсих күрсәтеп сөйләгәннәр хакында, үзе күргән һәммә нәрсә турында шаһитлык бирә.

³Бу пәйгамбәрлек сүзләрен укучылар һәм тыңлаучылар, анда язылганнарны үтәүчеләр бәхетле, чөнки ул сүзләрнең гамәлгә ашу вакыты якын.

⁴ 4-5 Яхъядан Асия өлкәсендәге иман итүчеләрнең җиде бердәмлегенә: хәзер Бар, Булган һәм Булачак Заттан [1], Аның тәхете каршында торучы җиде рухтан, шулай ук Гайсә Мәсихтән сезгә мәрхәмәт вә иминлек булсын. Үлгәннәр арасыннан беренче булып терелеп торган Мәсих — тугры Шаһит, җирдәге патшаларның Башлыгы. Аңа, безне сөюче һәм гөнаһларыбыздан Үзенең каны белән азат кылып,

⁶безне патшалык һәм Атасы Аллаһыга хезмәт итүче руханилар иткән Гайсәгә дан һәм кодрәт мәңге-мәңгегә булсын. Амин.

⁷Менә, Ул болытларда килә [2], һәм Аны һәркем күрер. Аны чәнчегән кешеләр дә күрерләр [3]. Җирдәге барлык халыклар Аның алдында үкереп елар. Шулай булачак. Амин.

⁸«Мин — Альфа һәм Омега [4], — дип әйтә Раббы Аллаһы, — хәзер Бар, Булган һәм Булачак Зат, Чиксез кодрәт Иясе».

⁹Мин, сезнең белән бергә Гайсә өчен газап чигүләр, патшалыкны, чыдамлыкны уртаклашучы имандашыгыз Яхъя, Аллаһы сүзе һәм Гайсә хакында шаһитлык иткәнем өчен, Патмос дип аталган утрауга җибәрелгән идем.

¹⁰Раббының көнендә [5] мине Рух чолгап алды һәм артымда быргыдан чыккандай көчле тавыш ишеттем.

¹¹Ул болай диде: «Күргәннәреңнең барын да китап итеп язып, Эфес, Смурна, Пергәм, Түәтәйрә, Сәрдәйс, Филаделфея, Лаудикея шәһәрләрендәге җиде бердәмлеккә җибәр».

¹²Әйтүчене күрергә дип борылып карагач, мин җиде алтын шәмдәл күрдем.

¹³Ә шәмдәлләр арасында озын кием кигән һәм күкрәген алтын пута белән буган, адәм углына охшаган Берәүне [6] күреп алдым.

¹⁴Аның башындагы чәчләре ак йон кебек, кардай ак иде. Күзләре исә ут ялкыны кебек иде,

¹⁵ә аяклары мичтә кыздырган бакырдай ялтырый һәм тавышы шарлавык тавышына охшар иде.

¹⁶Уң кулында җиде йолдыз бар, авызыннан ике ягы да үткен кылыч чыгып тора [7]. Йөзе бар көченә балкып торган кояштай иде!

¹⁷Мин Аны күргәч, үле кешедәй, аяклары алдына егылдым. Ул исә Үзенең уң кулын миңа тидереп, болай диде: «Курыкма! Мин — Беренче һәм Соңгы [8],

¹⁸һәм мәңге Теремен. Үлгән идем, ә менә хәзер мәңге-мәңге яшим. Үлем һәм үлеләр дөньясы ачкычлары Миндә.

¹⁹Шулай итеп, нәрсә күргәнеңне, хәзер нәрсә бар һәм моннан соң нәрсә буласын яз.

²⁰Уң кулымда күргән җиде йолдызның һәм җиде алтын шәмдәлнең сере шунда: җиде йолдыз — җиде бердәмлекнең фәрештәләре һәм җиде шәмдәл — җиде бердәмлек ул».