Read Изге Язма, 2015 Ачылыш 20 Bible Online

Ачылыш 20 - Изге Язма, 2015 bible

Ачылыш 20

¹Шуннан соң мин күктән төшүче фәрештәне күрдем. Аның кулында упкын ачкычы һәм зур чылбыр бар иде.

²Ул аждаһаны — иблис һәм шайтан дигән борынгы еланны [49] тотып алды һәм мең елга богаулады.

³Мең ел үткәнче, халыкларны алдамасын дип, аны упкынга ташлады, упкынны бикләп, мөһер сукты. Мең елдан соң, ул аз гына вакытка азат ителергә тиеш.

⁴Аннан соң мин тәхетләрне һәм анда утыручыларны күрдем. Аларга хөкем итү хокукы бирелгән иде. Гайсә хакында шаһитлык иткәннәре һәм Аллаһы сүзе өчен башлары киселгән, җанварга һәм аның сынына табынмаган, маңгайларына һәм кулларына тамга салдырмаган кешеләрнең җаннарын күрдем. Алар үледән терелеп тордылар һәм Мәсих белән мең ел буе патшалык иттеләр.

⁵Үлгәннәрнең калганнары исә мең ел үтмичә терелмәделәр. Бу — беренче терелү.

⁶Беренче терелүдә катнашучылар бәхетле һәм изге. Икенче үлем алар белән хакимлек итми инде, ләкин алар Аллаһының һәм Мәсихнең руханилары булачаклар, Мәсих белән бергә мең ел буе патшалык итәчәкләр.

⁷Мең ел үткәч, иблис үзенең зинданыннан азат ителәчәк

⁸һәм җирнең бар якларындагы халыкларны, ягъни Гог һәм Магог халыкларын [50] алдап, сугышка җыяр өчен чыгачак. Аларның саны диңгез комыдай күп булыр.

⁹Күрәм: алар җир киңлегенә чыктылар һәм Аллаһының изге кешеләре яшәгән станны, яраткан шәһәрне камап алдылар. Әмма күктән ут төшеп, аларны яндырып бетерде.

¹⁰Әлеге халыкларны алдаучы иблис җанвар белән ялган пәйгамбәрне ташлаган утлы һәм күкертле күлгә ыргытылды. Алар анда көне-төне һәм мәңге-мәңгегә газапланачаклар.

¹¹Аннан соң мин зур ак тәхет һәм анда Утыручыны күрдем. Аның хозурыннан җир белән күк качты, һәм аларга урын табылмады.

¹²Тәхет каршында торучы үлгәннәрне — зурларны һәм кечеләрне күрдем. Китапларны ачтылар. Тормыш китабы дип аталган башка китапны да ачтылар. Китапларда язылганча, үлгәннәр үз эшләренә карата хөкем ителделәр.

¹³Диңгез үзендәге үлекләрне бирде. Үлем һәм үлеләр дөньясы да үзендәге үлекләрне бирделәр. Бу үлгән кешеләр һәркайсы үз эшләренә карата хөкем ителделәр.

¹⁴Үлем һәм үлеләр дөньясы утлы күлгә ыргытылдылар. Бу утлы күл — икенче үлем.

¹⁵Исеме Тормыш китабында табылмаган һәркем шул утлы күлгә ыргытылды.