Read Изге Язма, 2015 Ачылыш 21 Bible Online

Ачылыш 21 - Изге Язма, 2015 bible

Ачылыш 21

¹Шуннан соң мин яңа күкне һәм яңа җирне күрдем [51]. Әүвәлге күк һәм әүвәлге җир юкка чыгып, диңгез дә юк иде инде.

²Мин Аллаһы яныннан, күктән төшеп килүче кияве өчен бизәнеп әзерләнгән кәләштәй изге шәһәр — яңа Иерусалимне күрдем.

³Тәхеттән килгән көчле тавышны ишеттем: «Менә Аллаһының кешеләр белән яшәү урыны. Ул кешеләр белән бергә яшәячәк. Алар Аның халкы булачак һәм Аллаһы Үзе алар белән булачак, Ул аларның Алласы булачак.

⁴Ул аларның һәрбер күз яшен сөртер. Үлем һәм кайгы, елау, авырту да башка булмаячак, чөнки әүвәлге үтеп китте» [52].

⁵Тәхеттә Утыручы болай диде: «Менә Мин һәммә нәрсәне яңа итеп ясыйм». Аннары Ул миңа эндәшеп: «Яз, чөнки бу сүзләр ышанычлы һәм хак», — дип өстәде.

⁶Ул миңа тагын болай диде: «Гамәлгә ашты! Мин — Альфа һәм Омега, Башы һәм Ахыры. Сусаучыга Мин тереклек суы чишмәсеннән бушлай эчәргә бирәм [53].

⁷Боларның барысы җиңүчегә насыйп булыр һәм Мин Алласы булырмын, ә ул Минем балам булыр.

⁸Әмма куркакларның, иманнан ваз кичкәннәрнең, әшәкеләрнең, кеше үтерүчеләрнең, фәхешлек кылучыларның, сихерчеләрнең, потка табынучыларның, барлык ялганчыларның өлеше ут һәм күкерт белән ялкынланып торган күлдәдер. Бу — икенче үлем».

⁹Яныма соңгы җиде бәла-каза белән тулы җиде касә тоткан җиде фәрештәнең берсе килеп: «Кил, мин сиңа кәләшне, Бәрәннең хатынын күрсәтәм», — диде.

¹⁰Мине Рух биләп алды һәм фәрештә мине зур һәм биек тауга күчерде. Ул миңа Аллаһыдан, күктән төшүче изге Иерусалим шәһәрен күрсәтте.

¹¹Ул шәһәр Аллаһы даныннан балкып тора иде. Ялтыравы асылташ һәм бәллүрдәй чиста яшма балкышына охшаш.

¹²Дивары бик зур һәм биек, унике капкалы, капкалары янында унике фәрештә бар. Капкаларында Исраил халкының унике ыругының исемнәре язылган.

¹³Көнчыгыштан — өч капка, төньяктан — өч капка, көньяктан — өч капка һәм көнбатыштан — өч капка.

¹⁴Шәһәр диварының унике нигез ташы бар иде. Ул нигезләрдә Бәрәннең унике рәсүленең исемнәре язылган.

¹⁵Миңа сөйләүче фәрештәнең шәһәрне һәм капкаларын, диварын үлчәр өчен алтын үлчәү таягы бар иде.

¹⁶Шәһәр тигезьяклы дүртпочмак булып урнашкан: аның озынлыгы киңлегенә тигез иде. Фәрештә шәһәрне таяк белән үлчәде, ул унике мең стадия [54] булды. Озынлыгы, киңлеге һәм биеклеге бертигез.

¹⁷Фәрештә диварын үлчәп чыкты. Дивар фәрештә кулланган кеше үлчәме буенча йөз кырык дүрт аршын [55] булды.

¹⁸Дивары яшмадан булып, шәһәр исә үтә күренмәле пыяладай саф алтыннан иде.

¹⁹Шәһәр диварының нигез ташлары төрле асылташлар белән бизәлгән: беренче нигезе — яшма, икенчесе — зәңгәр якут, өченчесе — халцедон, дүртенчесе — зөбәрҗәт,

²⁰бишенчесе — оникс, алтынчысы — сердолик, җиденчесе — хризолит, сигезенчесе — берилл, тугызынчысы — топаз, унынчысы — хризопраз, унберенчесе — гиацинт, уникенчесе — аметист.

²¹Унике капка — унике энҗе, капкаларның һәрберсе бер энҗедән иде. Шәһәрнең төп урамы үтә күренмәле пыяладай саф алтыннан иде.

²²Мин шәһәрдә Аллаһы йортын күрмәдем, чөнки бу шәһәрнең Аллаһы йорты — Чиксез кодрәт Иясе Раббы Аллаһы Үзе һәм Бәрән.

²³Шәһәр кояшның һәм айның яктыртуына мохтаҗ түгел, чөнки аны Аллаһының даны яктырта, яктырткычы исә — Бәрән [56].

²⁴Халыклар шул шәһәр яктылыгында йөриячәкләр, җир патшалары аңа үзләренең зиннәтләрен китерәчәкләр [57].

²⁵Көндез капкалары һичкайчан ябылмаячак, анда төн булмаячак.

²⁶Бу шәһәргә халыкларның зиннәтләрен һәм кыйммәтле хәзинәләрен китерәчәкләр [58].

²⁷Шәһәргә һичбер шакшы әйбер, әшәкелек эшләүче һәм ялганчы кермәячәк, фәкать исемнәре Бәрәннең Тормыш китабында язылганнар гына керәчәк.