Read Изге Язма, 2015 Ачылыш 5 Bible Online

Ачылыш 5 - Изге Язма, 2015 bible

Ачылыш 5

¹Шуннан соң мин тәхеттә Утыручының уң кулында эчке һәм тышкы ягына язылган, җиде мөһер белән мөһерләнгән язма төргәген күрдем.

²Тагын мин көчле тавыш белән: «Мөһерләрен кубарып, язма төргәген ачарга кем лаеклы?» — дип сораучы куәтле фәрештәне күрдем.

³Әмма күктә дә, җирдә дә, җир астында да язма төргәген ачарга һәм аңа карарга лаеклы һичкем булмады.

⁴Язма төргәген ачарга һәм аңа карарга лаеклы кеше табылмаганлыктан, мин бик нык еладым.

⁵Шунда өлкәннәрнең берсе миңа болай диде: «Елама. Әнә кара, Яһүдә нәселеннән булган Арыслан [17], Давыт тамырыннан чыккан Сабак [18] җиңеп чыкты. Язма төргәгенең җиде мөһерен кубарып, Ул ача ала».

⁶Шуннан соң мин тәхет янында дүрт җан иясе белән уратып алынган һәм өлкәннәр арасында торучы Бәрәнне күрдем. Ул суелган кебек иде. Аның җиде мөгезе һәм җиде күзе бар иде. Болар — Аллаһының бөтен җиргә җибәрелгән җиде рухы.

⁷Бәрән, килеп, тәхеттә Утыручының уң кулыннан язма төргәген алды.

⁸Язма төргәген алгач, дүрт җан иясе һәм егерме дүрт өлкән Аның алдында йөзтүбән капландылар. Аларның һәрберсендә арфа һәм хуш исле сумала, ягъни Аллаһы изгеләренең догалары тулы алтын касәләр бар иде.

⁹Алар яңа җыр җырладылар: «Син язма төргәген алырга, аның мөһерләрен кубарырга лаеклы, чөнки корбан итеп суелдың, Үзеңнең каның белән һәр кабиләдән һәм телдән, һәр халыктан һәм милләттән Аллаһы өчен кешеләрне йолып алдың.

¹⁰Аларны, Аллабызга хезмәт итү өчен, патшалык һәм руханилар иттең [19]. Алар җирдә патшалык итәчәкләр».

¹¹Шунда тәхет, җан ияләре һәм өлкәннәр әйләнәсендә күп фәрештәләрне күрдем, аларның тавышын ишеттем. Аларның саны йөзләрчә миллион һәм дистәләрчә меңнәр иде.

¹²Алар көчле тавыш белән: «Суелган Бәрән кодрәт, байлык, тирән гакыл, куәт, хөрмәт, дан һәм мактауга лаектыр», — дип әйтә иделәр.

¹³Күктә һәм җирдә, җир астында һәм диңгездә яратылганнарның барысының, анда булган һәммә нәрсәнең: «Тәхеттә Утыручыга һәм Бәрәнгә мактау, хөрмәт, дан һәм кодрәт мәңге-мәңгегә булсын», — дип әйтүләрен ишеттем.

¹⁴Дүрт җан иясе: «Амин», — дип әйтә, өлкәннәр йөзтүбән капланып сәҗдә кыла иделәр.