Read Изге Язма, 2015 Рут 2 Bible Online

Рут 2 - Изге Язма, 2015 bible

Рут 2

¹Биредә Нагомиянең мәрхүм иренә туган тиешле, чыгышы белән Әлимәлик нәселеннән булган Богаз исемле могтәбәр бер кеше яши иде.

²Бервакыт мәаби Рут Нагомиядән: — Басуга барып, берәр мәрхәмәтле бәндә артыннан башак җыеп кайтырга ярыймы? — дип сорады. Кайнанасы аңа: — Бар, кызым, — диде.

³Рут, басуга чыгып, уракчылардан соң коелып калган башакларны җыярга тотынды. Басуның бу өлеше мәрхүм Әлимәлик нәселеннән булган Богазныкы иде.

⁴Бервакыт басуга Бәйт-Лехемнән Богаз үзе дә килде һәм уракчыларына: — Раббы сезнең белән булсын! — дип, сәламен күндерде. Уракчылары исә аңа: — Раббы сине мөбарәк кылсын! — дип җавап кайтарды.

⁵Шунда Богаз уракчыларга күз-колак булырга тиешле хезмәтчесеннән: — Бу яшь хатын кемнеке? — дип сорады.

⁶Хезмәтчесе аңа: — Нагомия белән бергә Мәаб җиреннән кайткан мәаби хатын ул, — диде.

⁷— Уракчылардан соң көлтәләр арасында калган башакларны җыярга рөхсәт сораган иде. Иртәдән бирле башак җыя менә, чатырга керми дә диярлек.

⁸Богаз Рутка әйтте: — Менә нәрсә, кызым, биредән китеп, башкалар басуыннан башак җыеп мәшәкатьләнмә, гел шушында, минем хезмәтче хатын-кызларым янында бул;

⁹алар кайсы басуда урсалар, алар артыннан җыеп йөр. Мин хезмәтчеләремә сине борчымаска боерырмын. Сусый калсаң, хезмәтчеләрем тутырган чүлмәкләрдән эчеп, сусыныңны басарсың, — диде.

¹⁰Бу сүзләрне ишеткәч, Рут, башын җиргә иеп, Богаздан сорады: — Ни өчен син миңа карата шулай игелеклесең? Чит кеше булуымны белә торып, нигә мине шулай үз итәсең?

¹¹— Иреңне җирләгәннән соң, кайнанаң өчен синең ни-нәрсәләр эшләвең, ата-анаңны, туган илеңне калдырып, моңарчы сиңа таныш булмаган халык арасына килеп керүең миңа бик яхшы мәгълүм, — дип җавап бирде Богаз.

¹²— Кылган игелегең өчен, Раббы сиңа яхшылык белән җавап кайтарсын! Раббының, Исраил Алласының шәфкать канаты астына сыенырга дип килгәнең өчен, Раббы сине Үзе бүләкләсен!

¹³— Игелегеңнән ташламасаң иде, әфәндем! — диде аның бу сүзләренә каршы Рут. — Мин колыңны тынычландырдың, хезмәтчеләрең дәрәҗәсенә дә лаек булмаган хатынны күңелгә хуш сүзләрең белән юаттың.

¹⁴Төш вакытында Богаз Рутка: — Бире кил, ризыктан авыз ит, икмәгеңне шәраб серкәсенә манып аша, — диде. Рут уракчылар янына килеп утырды, Богаз биргән кыздырган орлыкны ашый башлады; тамагы туйганнан соң да, әле аның ризыгы калды.

¹⁵15-16 Аннары ул, торып, тагын башак җыярга тотынды. Богаз үзенең хезмәтчеләренә: — Көлтәләр арасында коелып калган башакларны да җыйсын, кыерсытмагыз аны, хәтта көлтәгездән дә учма-учма өлеш чыгарыгыз, җыйсын, сүз әйтмәгез аңа, — диде.

¹⁷Шул рәвешле, Рут кичкә хәтле басуда башак җыйды, аннары аны сугып җилгәрде. Бөтенесе бер эфа [2] чамасы арпа чыкты.

¹⁸Шуннан соң ул шәһәргә кайтты һәм җыйган ашлыгын кайнанасына күрсәтте. Аннары төш вакытында үзеннән артып калган ризыкны кайнанасына сузды.

¹⁹Кайнанасы аңардан: — Син бүген кайда эшләдең, арпаны кайдан җыйдың? — дип сорады. — Сиңа игелек күрсәткән кешегә Аллаһының рәхмәте яусын! Рут аңа Богаз исемле кешенең басуында эшләгәнен әйтте.

²⁰Шунда Нагомия үзенең килененә: — Раббы аны фатихаласын! Ул тере бәндәләргә дә, үлеләргә дә мәрхәмәтле! Богаз — безнең якын кардәшебез, безгә туган тиешле кеше [3], — диде.

²¹Мәаби Рут аңа әйтте: — Ул хәтта миңа: «Урак өсте беткәнче, минем хезмәтчеләрем янында бул», — диде.

²²Нагомия: — Аның хезмәтчеләре белән эшләвең бик әйбәт, кызым, — диде. — Башка басуда сиңа кыен булыр, рәнҗетүләре бар.

²³Богазның хезмәтче хатын-кызлары арпа вә бодайны урып бетергәнче, Рут әнә шулай алар янында башак җыйды, яшәвен исә кайнанасы белән яшәде.