Read Изге Язма, 2015 I Патшалар 12 Bible Online

I Патшалар 12 - Изге Язма, 2015 bible

I Патшалар 12

¹Шемуил Исраил халкына мондый сүзләр белән мөрәҗәгать итте: — Менә, сез әйткәннәрнең һәммәсенә колак салдым, сезнең өстән патша билгеләдем.

²Бүгенге көндә алдан башлап йөрергә сезнең патшагыз бар. Мин исә картайдым инде, чалардым; минем угылларым сезнең арада кала бирә. Яшьлек елларымнан башлап бүгенгәчә мин сезне әйдәп-җитәкләп һәрчак алдан бардым.

³Менә мин сезнең каршыда басып торам. Раббы һәм Ул сайлаган зат алдында шаһитлык итегез: мин кемнең дә булса үгезен яисә ишәген алдыммы?! Берәрегезнең хәтерен калдырдым яисә кемнедер җәберләдемме?! Кемнән дә булса бүләкләр алып, ялган хөкем чыгардыммы?! Хилаф эш кылган булсам әйтегез — мин аны төзәтермен.

⁴Халык аңа: — Син безнең хәтеребезне калдырмадың, җәберләмәдең дә, һәм беркемнән бернәрсә алмадың да, — дип җавап кайтарды.

⁵Шуннан Шемуил халыкка: — Сезнең сүзләрегезгә бүген Раббы Үзе һәм Ул сайлап куйган зат шаһиттыр: сез миннән һичнинди гаеп тапмадыгыз! — диде. — Хак сүз, Раббы Үзе шаһиттыр! — дип җөпләде аны бар халык.

⁶Шулчак Шемуил халыкка болай диде: — Муса белән Һарунны сайлаган, сезнең ата-бабаларыгызны Мисыр җиреннән алып чыккан Зат — Раббы Үзедер.

⁷Инде дә каршыма килеп басыгыз — Раббының сезгә һәм сезнең ата-бабаларыгызга кылган яхшылыкларын исегезгә төшереп, хәзер мин сезгә Раббы алдында хөкем чыгарам.

⁸Ягъкуб Мисыр җиренә күченеп килеп, ата-бабаларыгыз сөрәнләп Раббыга ялваргач, Раббы, Муса белән Һарунны җибәреп, ата-бабаларыгызны Мисыр җиреннән алып чыкты һәм менә шушы якларга китереп урнаштырды.

⁹Әмма ата-бабаларыгыз үзләренең Алласы булган Раббыны оныттылар, шуңа күрә Раббы аларны өсләренә яу белән килгән Хатсорның гаскәр башлыгы Сисера, пелештиләр һәм дә Мәаб патшасы кулына тапшырды.

¹⁰10-11 Ләкин ата-бабаларыгыз: «Гөнаһлы без, чөнки Раббыдан йөз чөереп башка илаһларга — Багал һәм Ашторет сыннарына табына башладык; хәзер исә безне дошманнарыбыз кулыннан коткар, һәм без Сиңа гына итагать итәрбез», — дип, ярдәм сорап Раббыга инәлеп-ялваргач, Раббы, Яруб-Багал [27] белән Баракны [28], Ифтах белән Шемуилне җибәреп, сезне чолгап алган дошманнарыгыз кулыннан йолып алды, һәм сез шуннан соң хәвеф-хәтәрсез яши башладыгыз.

¹²Соңрак Аммон патшасы Нахаш сезгә каршы кузгалгач, сез миңа: «Юк, безнең өстән патшалык итәр өчен безгә патша кирәк!» — дидегез. Раббы Аллагызның сезнең патшагыз булуын исә оныттыгыз.

¹³Шулай итеп, менә сезнең үзегез сайлап куйган, үзегез таләп иткән патшагыз — Раббы сезнең өстән патша билгеләде!

¹⁴Әгәр сез Раббыгызны олылап-хөрмәтләсәгез, Аңа табынып итагать итсәгез, сүзләренә колак салсагыз, Раббы ихтыярына каршы килмәсәгез, сез үзегез дә, сезнең өстән патшалык итүче патшагыз да Раббы Алла юлыннан йөрсәгез, барысы да әйбәт булыр.

¹⁵Ә инде Раббы сүзләренә илтифат итмичә, Аның ихтыярына каршы килсәгез, Раббы, сезнең ата-бабаларыгызга каршы чыккан кебек, сезне дә җәзага тартыр.

¹⁶Хәзер карап багыгыз: Раббы сезнең күз алдында зур бер могҗиза күрсәтер.

¹⁷Белгәнегезчә, бодай урагына төшәр чак [29] җитте. Ләкин мин Раббыдан сорармын, һәм Ул яңгырын да яудырыр, күкләрне дә күкрәтер. Шул чагында сез, патша сорап, Раббы алдында нинди зур гөнаһ кылуыгызны аңларсыз һәм күрерсез.

¹⁸ 18-19 Шемуил Раббыга дога белән мөрәҗәгать итте, һәм Раббы шул көнне үк күк күкрәтеп яңгыр яудырды. Моны күреп, Раббы белән Шемуилдән коты алынган халык Шемуилгә болай диде: — Раббыга, үзеңнең Аллаңа, без колларың хакында гыйбадәт кыл — әҗәлгә дучар итмә безне: булган гөнаһларыбыз өстенә, патша сорап, тагын бер гөнаһ кылганбыз икән!

²⁰Халыкка җавап итеп, Шемуил: — Курыкмагыз, кылынасы гөнаһ кылынган инде, ләкин киләчәктә Раббы юлыннан тайчанмагыз һәм, Раббыга ихлас күңелдән табынып, Аңа гына итагать итегез.

²¹Юк-бар, яраксыз илаһларга иярмәгез: алар сезгә файда китермәс һәм коткара да алмас, чөнки алар һәммәсе чүп кенә.

²²Раббы Үзенең бөек исеме хакына Үз халкын ташламас, чөнки сезне Ул Үзе сайлап алды.

²³Миңа килгәндә исә, мин үзем дә Раббы алдында гөнаһ эш кылмам — сезнең хакта Аңа дога кылудан туктамам, сезне туры, хак юлга өндәүдә булырмын.

²⁴Тик сез, Раббыдан куркып, Аны олылагыз, чын күңелдән, бөтен йөрәгегез белән Аңа табыныгыз; сезнең хакка кылган олуг гамәлләрен һәрчак истә тотыгыз.

²⁵Инде явызлык кылыр булсагыз, үзегезнең дә, патшагызның да гомере киселер, — дип әйтте.