Read tetala Etatelu 12 Bible Online

Etatelu 12 - tetala bible

Etatelu 12

¹Latuyalaka akatela Abarama ati: Unela uma lu kete yaye, la wudja aye, la uma lu luudu la sho; utshu lu kete yayumukenya.[33]

²Ku dimi layutunga wudja a wuki uma le ye, layukotshokola, ndu layete lukumbu laye wuki. La we ayuyala eteko kʼetshoko.

³Dimi layotshokola wane wayukotshokola, la layudja wane wayukudja mananu mananu. Wedja tshe wa la kete wayotshokwama uma lu dikambu diaye.[34]

⁴Abarama akunela uku akawutela Latuyalaka. Ndu Lota akatshu kame la ndi. Abarama aki la deku akumi esambeli la tanu lamʼakandunela uma la Harana.

⁵Ku Abarama akatshu, ndi la wadendi Sarai, la Lota onʼa onangu, la diango tshe diaki la wo, ndu la ekambi wakawatakundji la Harana. Vo tshe wakatshu, wakatukuma lu kete ya Kanana.

⁶Abarama akakindula lu kete yako edja ndu la Shekeme, lene aki etamba wʼelungu wa la More. Lu nshi sho ku asi Kanana weki lu kete yako.

⁷Latuyalaka akene le Abarama, akawutela ati: Dimi la; usha tukanula taye kete nye.[35] Ku Abarama akatshela Latuyalaka ediakelu lu dihuli diakandene le ndi.

⁸Ndi akaseko uma eko utsha lʼukungu, lu leke lʼehutwelu ka unya la Betele, akatuhika mvudu yʼapema. Betele aki lu leke lʼedjelu ka unya, la Ai aki lu leke lʼehutwelu. Ndi akatuhikela Latuyalaka ediakelu leko. Ndi akatemoi ika lukumbu la Latuyalaka.

⁹Abarama akatakolamelaka lokendo landi utsha lu leke la la diku dia kushi.

¹⁰Ndjala ka kasha kakayala wulu lu kete. Ku Abarama akahulo utsha lʼEdjibitu. Ndi akatudjase leko, ne dia ndjala ka kasha aki wulu lu kete.

¹¹Lamʼakandayangi ukuma lʼEdjibitu, ndi akatela wadendi Sarai ati: Uki, dimi mbeyaka nti: Umuntu la dimena keye.

¹²Lamʼayukena asi Edjibitu, vo wayuta vati: Wadendi uku! Vo wayundjaka, ku wayukutshika we la lumu.

¹³Okone lambukosengasenga dia we mvuta wati: Kadiyendi kemi,[36] mbayuwuntshela ololo, ndu mbayumutshikala la lumu lu dikambu diaye.

¹⁴Lamʼakakumi Abarama lʼEdjibitu, asi Edjibitu wakenyi vati: Umuntu uku eko dimena dia mamba!

¹⁵Dihangamendi dia Farayo wakawenyi. Vo wakatusanya dimena diandi la ntundu ka Farayo. Ku wakayotola lu luudu la Farayo.

¹⁶Okone ndi akatshela Abarama ololo dikambu dia Sarai. Abarama akalungula ekoko, ngombe, la punda, la ekambi wʼapami la wʼamantu, ndu wadi wa punda, la kamelo.

¹⁷Latuyalaka akatumi asui a wulu le Farayo la wa lu luudu landi lu dikambu dia Sarai, wadi a Abarama.

¹⁸Ku Farayo aketi Abarama, akawumbula ati: Ukundi akayantshela okone na? Dikambu kuna diakiye kumvutelami wati: Wademi kendi?

¹⁹Okoko wana wakayati wati: Kadiyemi kendi, ku dimi lakawose wadi? Wadeye kendi, osandi kakiane, tshoka la ndi!

²⁰Ku Farayo akadjangela antu andi dia vo mbaunyia utsha lene akiwo, ndi la wadendi, la kene tshe kaki la ndi.