Read tetala Etatelu 13 Bible Online

Etatelu 13 - tetala bible

Etatelu 13

¹Abarama akunela uma lʼEdjibitu, ndi la wadendi la kene tshe kaki la ndi, ndu Lota. Vo wakatshu utsha lu leke la Nengebe.

²Abarama akangone efula, akayala la dungalunga efula, la fesa, ndu la paunyi

³Ndi akatakolamelaka ntsho uma lu leke la Nengebe edja ndu la Betele, lene akandatahiki luudu landi la dipema lʼasa Betile la Ai.

⁴Vo wakatukuma ndu lu dihuli diʼediakelu kakandatahiki ntundu. Ku leko ndi akatemolaka lukumbu la Latuyalaka.

⁵Ndu Lota, lakatatshokaka la Abarama aki la ekoko, ngombe, la mvudu yʼapema.

⁶Dihuli kunkuka dia vo mbidjase kame, ne dia vo waki la diango efula. Diako mbakiwo kumbeya ntshikala dihuli diame.

⁷Lundju lakayala lʼasa alami wa dungalunga wa Abarama la wa Lota. Ndu asi Kanana la asi Perizi wakaladi lu kete yako.

⁸Abarama akatela Lota ati: Dimi lambukosengasenga nti: Tamu tatuyalaki lʼasami la ye, ndu lʼasa alami ami la alami aye wa dungalunga, ne dia wali la ona mbesu.

⁹Aha utundu a kete uku weli la ntundu kaye? Lambukosengasenga nti: Tatwani. Naka we ayutsho lu leke la lunya la lomoso, dimi layutsho lu leke la lunya la pami. Keli naka we ayutsho lu leke la lunya la pami, ku dimi layutsho lu leke la lunya la lomoso.

¹⁰Lota akedia ashu, akenyi usui wa lʼukidi wa Jorodana ati: Leko keli ashi la tumbatumba efula dia dungalunga nde. Ntundu Latuyalaka atalanya Sodoma la Ngomora, leke lako lakafani la ekambo ka Latuyalaka,[37] ndu la kete ya Edjibitu yatenaka untu lateti utsha la Zoara.

¹¹Lota akasonola usui tshe wa lʼukidi wa Jorodana. Ndi akelela utsha lʼusui ako wa lu leke lʼehutwelu ka unya. Osoku mbakawatana vo ahendi.

¹²Abarama akadjase lu kete ya Kanana. Lota akatudjase lu esumba wa lʼukidi. Ndu ndi akatasekosekoka la mvudu yandi yʼapema pulu ndu la Sodoma.

¹³Asi Sodoma waki antu wa kolo efula, ndu wakatamanya ntuna Latuyalaka.

¹⁴Lamʼakatana Abarama la Lota, Latuyalaka akatela Abarama ati: Edia ashu aye uma lu dihuli dieye. Enda utsha lu leke la ngelʼa kushi ndu la diku dia kushi, ndu utsha lu leke lʼehutwelu, ndu la edjelu ka unya.

¹⁵Kete ku tshe yenaye, dimi layukushayo, we la tukanula taye pundju.[38]

¹⁶Layufudia tukanula taye uku ditshu dia la kete. Naka untu leya mbala efula ka seke ya ditshu dia la kete, ku ndi mbeya mbala ndu efula ka tukanula taye.

¹⁷Unela, ukinduli lu kete tshe: lʼutali ayo ndu lu wekeki ayo. Ne dia dimi luyanga kushayo.

¹⁸Abarama akaseko la luudu landi la dipema, akatudjase lʼatshina wʼetamba wʼelungu wa la Mamare weli lasuki la Heberona. Ku ndi akatuhikela Latuyalaka ediakelu leko.