Read tetala Etatelu 15 Bible Online

Etatelu 15 - tetala bible

Etatelu 15

¹Lʼokongo wʼakambu aso, Latuyalaka akene le Abarama lu do. Ndi akawutela ati: Abarama, tukaki woma; dimi leli engawu kaye. Difutu diaye diayuyala wuki efula.

²Ku Abarama akûkaluya diui ati: Khumadiondjo Latuyalaka li, kayuyumbisha na? Dimʼone utatshu aha la ona. Eliyezere, usi Damaseke, kayuyala ukito a luudu lami.

³Ku Abarama akati ntu ati: Enda, we atambisha nduku ona. Okone onʼa ukambi ami, one lakuto lu luudu lami, kayuyala ukito ami.

⁴Ku diui dia Latuyalaka diakayi le ndi ati: Untu one huyala ukito aye, keli one layuyuta weme kayukukita.

⁵Lʼokongo a laso ndi akolombola lʼandja; akawutela ati: Alela lʼulungu, ali toto, naka we mbeyaka ntala. Ku ndi akawutela ntu ati: Ukuku mbayuyala tukanula taye.[40]

⁶Ndi aketawo Latuyalaka lʼutema tshe. Okone Latuyalaka akawalela mbetawo kandi lu dihuli diʼololo andi.[41]

⁷Ku ndi akawutela ati: Dimi leli Latuyalaka lakakolombola uma la Ura ka la Kaladiya dia ndjukusha kete nye.

⁸Ku Abarama akati ati: We Khumadiondjo, Latuyalaka, ukundi ayumulimbitela nti: Dimi kayuyala kangayo?

⁹Ku Latuyalaka akawutela ati: Osa osongo a ngombe weki deku satu, mbudi ka wadi keki deku satu, ndu okoko wʼumi weki deku satu, ndu yembi la yana yʼenga.

¹⁰Ku Abarama akayiose tshe, akayati kʼatei atei, akedianyia betshi diayo pendi pendi. Keli ndi kumbata fudu.

¹¹Fudu yatolekaka emunyi yakahatula edu ayo; ku Abarama akayitshanya.

¹²Lamʼakadji unya, Abarama akalali djo ya wulu. Udjima a tshududu akuhutamela, ku ndi akuki woma efula.

¹³Latuyalaka akatela Abarama ati: Eyi wati: Tukanula taye wayuyala angendangenda lu kete ya kana. Leko vo wayutukambela akina ulimu, ku akanga a kete yako wayasuyaka deku kama nyei.[42]

¹⁴Keli dimi layulumbuya wudja ako wayuwutukambela ulimu. Lʼokongo diku vo wayumo uma leko la ekundji efula.[43]

¹⁵Keli we ayutayadi usumbi a lukusumbi ntundu we atakhundama Ku we ayutsho la lutui tshitshi utsha lʼudimu a pengandu.

¹⁶Ku lu lolonga la nei, vo wayukalula lindu, ne dia kolo kʼasi Amora katakumela.

¹⁷Lamʼakadji unya, udjima a tshududu akayala. Difuku diakaluli too la dinga, la nyumbi ya dja yaki lu ndjikita lʼasa nyama yakawakahanya.

¹⁸Lushi lako Latuyalaka akakimo daka le Abarama ati: Dimi lambusha tukanula taye kete nye[44] uma lu ndjali ka Edjibitu edja ndu lu ndjali ka wuki, ndjali kʼEyufarate:

¹⁹kete yʼasi Kena, y asi Kenizi, yʼasi Kademona,

²⁰yʼasi Hiti, yʼasi Perizi, yʼasi Refa,

²¹yʼasi Amora, yʼasi Kanana, yʼasi Ngiringashe, ndu yʼasi Jebuse.