Read tetala Etatelu 16 Bible Online

Etatelu 16 - tetala bible

Etatelu 16

¹Sarai, wadi a Abarama, kumbuta la ndi nduku ona. Keli ndi aki la ukambi a umuntu, usi Edjibitu, lakawetaka vati: Hangara.

²Ku Sarai akatela Abarama ati: We henyi, Latuyalaka akambete ekumba. Dimi lambukosengasenga nti: Osa ukambi ami wadi, kana ndi ambutelaka ana. Osoku Abarama aketawo diui dia Sarai.

³Lʼokongo a deku dikumi diʼedjaselu kʼAbarama lukete ya Kanana, wadendi Sarai akawusha Hangara, ukambi andi wʼusi Edjibitu, dia ndi ndjala wadendi.

⁴Ndi akadjase la Hangara, ku Hangara akatshu diemi. Lamʼakandenyi ati: Laya diemi, ndi akatatela monyola khumendi.

⁵Ku Sarai akatela Abarama ati: Lotengo lako lone layali le ye. Dimi lakakusha ukambi ami. Ku lamʼambundena ati: Laya ia diemi, ndi ambutatela monyolami. Latuyalaka, ayali usambudi lʼasami la ye!

⁶Ku Abarama akûkaluya diui ati: Ukambi aye one. Ndi eki lu anya aye, utsheli uku alangaye. Uma laso Sarai akatatela mbutshela la ngala, ku Hangara akulawo etali.

⁷Ondjelo wa Latuyalaka akutani lʼumamu wʼeteko kʼashi kaki lʼatei wʼusui wa shenga. Eteko kako kaki lu mbuka kʼutsha la Shura.

⁸Ku ondjelo akawumbula ati: Hangara, ukambi wa Sarai, uma lendi ayayayi? ndu utsha lendi atayatshu? Ku Hangara akûkaluya diui ati: Khumemi Sarai, katamalawo.

⁹Ku ondjelo wa Latuyalaka akawutela ati: Ukaluli utsha le khumeye. Utuyakitshakitsha la ntundu kandi.

¹⁰Ondjelo wa Latuyalaka akawutela ntu ati: Dimi layufudia tukanula taye. To tayuyala efula kaheyama mbala.

¹¹Ku ondjelo wa Latuyalaka akawutela ati: Enda, we ay a la diemi. We ayuta ona pami; kuwole wati: Ishamele (kitshimudi ati Unyashungu ambuka), ne dia Latuyalaka akenyi shoko yaye.

¹²Onʼaye ayuyala uku ndjati kuhumwi. Lunya landi layolosha antu ta. Ku anya wʼantu wayoloshanya la ndi.

¹³Hangara akole Latuyalaka lakateketaka la ndi lukumbu ati: Unyashungu Latomenaka. Ndi akati ati: Ndi ambushila menami, ukundi eyami mbena dimi na?

¹⁴Uma lu dikambu diako mbakaweti eteko kako vati: Bere-Lahai-Roi (kitshimudi ati: Eteko ka Leli la Lumu Latomenaka). To keko lasa Kadeshe la Berede.

¹⁵Hangara akutela Abarama ona pami,[45] ku Abarama akole ona ako lukumbu ati: Ishamele.

¹⁶Abarama aki la deku akumi enanei la samalu lamʼakanduti la Hangara Ishamele.