Read tetala Etatelu 18 Bible Online

Etatelu 18 - tetala bible

Etatelu 18

¹Lamʼakawale yanyi wulu, Abarahama akadjase la suku dia luudu landi la dipema. Ku Latuyalaka akene le ndi lʼatei wʼelamba wʼelungu wa Mamare.

²Abarahama akedia ashu, enyi ku apami asatu ane wemadi tshalula la ntundu kandi.[50] Lamʼakandawaenyi, ndi akakundjo la luwangu dia ntalungula, akatakhusamela.

³Ku ndi akati ati: Khumemi, dimi lambukosengasenga nti: Naka dimi lambuhumo lukulu lʼolo lu ashu aye, tundekanaki, dimi ukambi aye.

⁴Nyetawo ntukumuya la tshina diʼutamba one, wanyela ashi wa nyu nsula ekulu.

⁵Dimi lambutsho dia ntunyosela ukama a ma dia nyu nkikitsha alimba anyu, ne dia le mi, dimi ukambi anyu, kuyenyu. Uma laso kanyokolameli lokendo lanyu. Vo wakûkaluya diui vati: Utshi uku wataye.

⁶Ku Abarahama akatshu esadi le Sara lu luudu la dipema, akatuwutela ati: Samanya, ose tediko tusatu ta shima ka pudipudi, osohanya, ukati ma esadi.

⁷Ku Abarahama akalawo, akatunda osongo a ngombe wʼololo wununyi uma lu limba landi la dungalunga, ku akayuwusha ukambi andi omotshi. Ukambi ako akasamanya dia mbolongosola.

⁸Ndi akose ma la awele kame la unatshi wʼosongo a ngombe wakawalongosola, akayukitsha la ntundu kawo. Lamʼakawalekaka ma diako, Abarahama akayemala la le wo la tshina diʼutamba.

⁹Vo wakawumbula vati: Lendʼeli wadeye Sara? Ndi akakaluya diui ati: Ndi eko lene lu luudu la dipema.

¹⁰Otoi awo omotshi akati ati: Etena uku kene lʼeleku kʼuyuyu, dimi layukalula le ye. Lʼetena keso ku wadeye Sara ambuyala la ona.[51] Sara lakadjashi lu suku dia luudu la dipema laki lʼokongo andi akuki aui ako.

¹¹Abarahama la Sara waki esumbi. Sara kunungamela ntu ati: Lukuta ona.

¹²Sara akole lʼutema andi ati: Ndu dimi ndu khumemi[52] tambuyalaka esumbi. Ukundi ukukisu nungamela otshoko oso kakiane?

¹³Ku Latuyalaka akambula Abarahama ati: Okoko wana wakodi Sara ati: Mete mete, dimi layuyala la ona, dimi usumbi wʼuntu?

¹⁴Undi dikambu dimotshi dieko diaheyi Latuyalaka ntsha uka?[53] Etena keso uku akamakutedi kayumukalula le ye. Lʼetena kako wadeye Sara ayuyala la ona.

¹⁵Ku Sara akanguna ati: Dimi hambodi, ne dia ndi akuki woma. Keli Latuyalaka akawutela ati: Mete mete, we akodi.

¹⁶Apami ako wakunela, wakelela utsha la Sodoma. Abarahama akatshu la wo yema dia mbatshindela.

¹⁷Ku Latuyalaka akayambula ati: Ukundi ashemi Abarahama dikambu diayangami ntsha?

¹⁸Mete, dimi mbeyaka nti: Abarahama ayuyala wudja a wuki ndu a wulu. Ku wedja tshe wa la kete wayotshokwama lu dikambu diandi.

¹⁹Dimi lakenyi ololo nti: Abarahama ayekiya anʼandi ndu wa lu luudu landi tshe dia vo nkendakendaka ololo lu mbuka ka Latuyalaka, la dia vo ntsha akambu wʼusimbwi ndu wʼololo. Osoku ku dimi Latuyalaka, layushidiya daka diakamalaki Abarahama.

²⁰Latuyalaka akati ati: Lundju la Sodoma la Ngomora lambotekoya efula, ndu kolo kawo kambuleka yediko.

²¹Uma lu dikambu ne mbayangami mpulo utsha leko dia ntenda kana ditshelu diatshawo diambufana la lundju latumukaka. Ku naka aha osoku, dimi layulimbitela dikambu diako.

²²Apami ako wakunela uma leko, wakatshu utsha la Sodnma. Keli Abarahama akatshikala laawo emadi la ntundu ka Latuyalaka.

²³Ku Abarahama akasukana la le ndi; akawumbula ati: Undi, we ayudiaka antu wʼololo kame la antu wa kolo?

²⁴Ku naka antu wʼololo akumi atanu weko lʼusumba, we ayulanya usumba ako? We hashimbela usumba ne dia antu wʼololo akumi atanu weli loko?

²⁵We ayetawo ndjaka antu wʼololo kame la antu wa kolo? Dikambu ne tadiuyalaki le ye dia ntshela untu ololo uku untu a kolo. Umbadi we kete tshe hatalaka la dialelu diʼololo uka?

²⁶Latuyalaka akûkaluya diui ati: Naka dimi layutana antu wʼololo akumi atanu la Sodoma, ku dimi layuhandja usumba tshe dikambu diawo.

²⁷Abarahama akûkaluya diui ati: Mete, dimi ako leli ditshu la utuku, lakatanuyi dihuli dia nsawula la Khumadiondjo.

²⁸Naka uma lu antu wʼololo akumi atanu, we ayutana akumi anei la atanu atu, ayuyutsha na? We ayulanya usumba tshe ne dia antu wʼololo atanu weli kema? Ndi akûkaluya diui ati: Naka layutana antu wʼololo akumi anei la atanu leko, dimi halulanya usumba.

²⁹Ku Abarahama akawumbula ntu ati: Naka we ayutana antu wʼololo akumi anei atu, ku ukundi? Ku ndi akûkaluya diui ati: Dimi halulanya usumba ne dia akumi anei ako.

³⁰Ku Abarahama akosengasenga ati: Khumadiondjo, tukaki kele, dimi nti: Moteketa. Naka we ayutana antu wʼololo akumi asatu leko, ku ukundi? Ndi akûkaluya diui ati: Naka layutana antu wʼololo akumi asatu, dimi halulanya usumba.

³¹Ku Abarahama akati ati: Mete, dimi lakatanyi dihuli dia nsawula la Khumadiondjo. Naka we ayutana antu wʼololo akumi ahendi atu, ku ukundi? Ndi akûkaluya diui ati: Dimi halulanya usumba dikambu dia akumi ahendi ako.

³²Abarahama akati ati: Khumadiondjo li, tukaki kele; dimi nti: Ntekete etena kene ketu. Naka we ayutana antu wʼololo dikumi, ku ukundi? Ku ndi akûkaluya diui ati: Dimi halulanya usumba dikambu dia antu wʼololo ako dikumi.

³³Latuyalaka akatshiki Abarahama lamʼakandashili nsawula la ndi. Ku Abarahama akakalula lakandi.