Read tetala Etatelu 23 Bible Online

Etatelu 23 - tetala bible

Etatelu 23

¹Sara akalumbi deku lukama akumi ahendi la esambeli. Osoku mbaki deku diakalumbi Sara.

²Sara akavu lu Kiriyate-Areba (ketawo vati: Heberona) lu kete ya Kanana. Abarahama akatshi utanda dia ndela Sara.

³Ndi akemala la ntundu ka udu a wadendi; akatela asi Hiti okone ati:

⁴Ongendangenda mbudjashimi lʼatei anyu,[68] nyumbisha hyuli ya dimi nkhunde udu a wademi.[69]

⁵Asi Hiti wakûkaluya diui vati:

⁶Khumesu, utusha lutui! Ulangimi a Unyashungu mbeye lʼatei asu. Osonole dihuli dia nkhunde wadeye lene atutukhundeka antu. Nduku untu lʼatei asu ayukushimba.

⁷Abarahama akunela, akakhusamela asi Hiti, akanga a wudja oso.

⁸Ku ndi akawatela ati: Nyumbukeli. Naka nyu mbetawoka dimi nkhunde wademi, nyoteketele le Eferona, onʼa Zohara,

⁹dia ndi mbishami wuku wa la Makipela weli la kuma kʼekambo kandi; ndi kansundjawo lʼushinga tshe wayundudja la ntundu kanyu. Dio kadiuyali dihuli diami hita diʼekhundelu lʼatei anyu.

¹⁰Etena kako Eferona akadjashi lʼatei wʼasi Hiti. Ku ndi akakaluya Abarahama diui la ntundu kʼasi Hiti ndu ka waku tshe wakotoka la suku dia usumba ati:

¹¹Khumemi, aha osoku. Uhukami, dimi lambukusha ekambo wushasha ndu wuku weli lʼatei ato. Lambukushawo la ntundu kʼasikami tshe. Ukhunde wadeye.

¹²Abarahama akakhusamela asi wudja wa lu kete yako.

¹³Ndi akatela Eferona la ntundu kʼasi wudja ako ati: Keli naka we nangaka, umbukeli; etawo dimi nkusha ushinga wʼekambo, keli nkhunde wademi.

¹⁴Eferona akakaluya Abarahama diui ati:

¹⁵Khumemi, ulungi, ekambo ka shekele kama nyei ya fesa, eli na lʼasami la ye? Ukhunde wadeye.

¹⁶Abarahama akuki diui dia Eferona. Ku ndi akedika la ndi shekele kama nyei ya fesa, uku akadji Eferona ushinga la ntundu kʼasi Hiti, akawusha.

¹⁷Okone ekambo ka Eferona ka la Makipela kaki lu welelo wa Mamare, ndu wuku la etamba tshe waki lu ekambo, ndu ene waki lʼelelu wa lʼutshimba ato,

¹⁸wakayala wa Abarahama lu ashu wʼasi Hiti, ndu wa wane tshe wakotoka lu suku dia usumba.

¹⁹Lʼokongo diku, Abarahama akakhunde wadendi Sara lu wuku wa lu ekambo ka la Makipela kelanedi la Mamare (ketawo vati: Heberona) lu kete ya Kanana.

²⁰Ekambo la wuku weli loko wakayala wʼAbarahama pundju. Ndi akayala kanga dihuli diako diakandasumbi uma le asi Hiti dia nkhundeka edu wa khumbu kandi.