Read tetala Etatelu 25 Bible Online

Etatelu 25 - tetala bible

Etatelu 25

¹Abarahama akatshuki wadi ukina, lukumbu landi Ketura.

²Ndi akuti la Abarahama Zimerana, Jokishana, Medana, Midiyana, Ishibake, la Shua.

³Jokishana akuti Seba la Dedana. Ana wa Dedana ane: Ashurima, Letushima, Leumima.

⁴Ana wa Midiyana ane: Efa, Efere, Hanoka, Abida la Eleda. Aso tshe weli ana apami wa Ketura.

⁵Abarahama akasha Isaka diango diandi tshe.

⁶Ntundu Abarahama atavu, ndi akasha ndu ana wa esika andi eshasha. Ndi akawanganya etali uma lasuki la onʼandi Isaka, akatumi utsha lu leke lʼehutwelu ka unya.

⁷Nshi ya lumu tshe ya Abarahama yaki deku lukama akumi esambeli la tanu.

⁸Ku Abarahama akavu lamʼakandayala usumbi a lukusumbi, akunduya andja. Ku ndi akayeu washi.

⁹Anʼandi Isaka la Ishamele wakukhunde lu wuku wa Makipela, lu ekambo kaki Eferona onʼa Zohara, usi Hiti. Ekambo kako kakelanedi la Mamare.

¹⁰Ekambo keso kaki ekambo kakasumbi Abarahama uma le asi Hiti.[70] Loko kakawakhunde ndu Abarahama uku akawakhunde wadendi Sara.

¹¹Lʼokongo a nyoi kʼAbarahama, Unyashungu akatshokola onʼandi Isaka. Ndi akadjase la Bere-Lahai-Roi.

¹²Tukanula ta Ishamele, onʼa Abarahama, lakanduti la Hangara usi Edjibitu, ukambi a Sara tone.

¹³Kumbu yʼana apami wa Ishamele uku nonga yawo nye. Ona lʼenundu Nebayote, Kedare, Adibele, Mibisame,

¹⁴Mishima, Duma, Masa,

¹⁵Hadada, Tema, Jeture, Nafishi la Kedema.

¹⁶Aso weli ana apami wa Ishamele, uku aki kumbu yawo la ngelu yawo ndu wedja awo. Vo waki ewandji dikumi la ehendi wa wedja awo.

¹⁷(Nshi ya lumu tshe ya Ishamele yaki deku lukama akumi asatu la esambeli. Ku ndi akavu, akayeli washi.)

¹⁸Anʼandi wʼapami wakadjase uma la Havila pulu ndu la Shura yelanedi la Edjibitu, lu leke lʼutsha lʼAsuriya. Ndi akadjase lasuki la anangu tshe.

¹⁹Tukanula ta Isaka, onʼa Abarahama, tone. Abarahama akuti Isaka.

²⁰Lamʼaki Isaka la deku akumi anei, ndi akatshuki Rebeka, kadiya Labana, onʼa Betuele, usi Arama wa la Padana-Arama.

²¹Isaka akalombela wadendi Latuyalaka, ne dia ndi aki ekumba. Latuyalaka akuki dombelo diandi. Okone wadendi Rebeka akatshu diemi.

²²Ana wakakadimo lʼutema andi. Ku ndi akayambula ati: Naka wambutshindana osoku, ukundi ayumuyala na? Ku ndi akatshu la ntumbula. Latuyalaka.

²³Ku Latuyalaka akawutela ati: Wedja ehendi mbeli lʼutema aye. Wedja ehendi ako wayatana lamʼayuwutumba uma lʼutema aye. Wudja omotshi ayuleka wudja ukina wulu. Okone umba ayukambela shaku ulimu.[71]

²⁴Lamʼakuki nshi ya mbuta, ndi akuti diasa.

²⁵Umba akuto welo belaa la diosa ditnba tshe. Wakawole vati: Esau (kitshimudi ati: Kanga diosa).

²⁶Lʼokongo diku Shaku akuto ayakimedi Esau lʼetshindji. Diako mbakawawole vati: Jakoba (kitshimudi ati: Ukimedi etshindji). Isaka aki la deku akumi asamalu lamʼakanduti la Rebeka ana ako.

²⁷Ana apami ako wakuli. Esau akayala minginga ka lononga ndu umbitshi winga wa lu esui. Keli Jakoba aki kanga diki, akadjaseka paka la ngelu.

²⁸Isaka akaleki mbuka Esau ngandji, ne dia ndi akalekaka nyama yakandadiakaka. Keli Rebeka akaleki mbuka Jakoba ngandji.

²⁹Ku lushi lomotshi lamʼakakateka Jakoba usawu a belaa, Esau akakalula uma la winga, ndi akakomo dimba la kipongoshi ka ndjala.

³⁰Ku Esau akasengasenga Jakoba ati: Umbisha yema yʼusawu wa belaa keli ndi, ne dia dimba diambokomo la ndjala. Diako mbakawole Esau vati: Edome (kitshimudi ati: Belaa).

³¹Jakoba akûkaluya diui ati: Unsundja ukito aye wa onʼenundu elo.

³²Esau akûkaluya diui ati: Dimi layanga mvo la ndjala, waho akona wayuyala ukito wa onʼenundu le mi?

³³Ku Jakoba akûkaluya diui ati: Utantshibediwo kakiane. Ku Esau akutshibela. Ndi akasundja Jakoba ukito andi wa onʼenundu.[72]

³⁴Ku Jakoba akasha Esau ma la usawu ako wa belaa waki la konde loko. Ku Esau akali, akano, akunela, akatshu. Osoku mbakonyola Esau ukito andi wa onʼenundu.