Read tetala Etatelu 26 Bible Online

Etatelu 26 - tetala bible

Etatelu 26

¹Ndjala ka kasha kekina kakayala lʼokongo a kene kaki lu nshi ya Abarahama. Ku Isaka akatshu la Ngerare le Abimeleke, khumʼekanga kʼasi Filistiya.

²Ku Latuyalaka akene le ndi; akawutela ati: Tuhuloki utsha lʼEdjibitu. Keli udjase lu kete yayumukutela.

³Utukudjase lu kete nye, dimi layuyala la ye, layukotshokola. Dimi layukusha wedja ene tshe, we la tukanula taye. Layushikike daka diakamalaki sho Abarahama.

⁴Dimi layufudia tukanula taye uku toto ta lʼulungu. Layuwasha wedja ene tshe, ndu antu wa wedja tshe wayotshokwama dikambu dia tukanula taye,[73]

⁵ne dia Abarahama akakitanyiaka aui ami, elembe ami la adjangu ami.

⁶Okone Isaka akadjase la Ngerare.

⁷Asi ngelu kako wakawumbula dikambu dia wadendi. Ku ndi akakaiuya diui ati: Kadiyemi kendi.[74] Rebeka aki umuntu la dimena diahangone. Diako mbakuki Isaka woma dia mvuta ati: Wademi kendi, ne dia asi wudja ako watukudiaka lu dikambu diandi.

⁸Vo wakadjase leko edja. Lushi lomotshi Abimeleke, khumʼekanga kʼasi Filistiya, akendaka lu didishi, enyi ku Isaka one akenya la wadendi Rebeka.

⁹Abimeleke aketi Isaka; akawutela ati: Mete mete, wadeye kendi. Ukundi akayataka wati: Kadiyemi kendi? Ku Isaka akûkaluya diui ati: Dimi lakati osoku ne dia lakuki woma nti: Watukundjaka lu dikambu diandi.

¹⁰Ku Abimeleke akawumbula ati: Ukundi akayatutshela okone? Utunduyala untu omotshi uma lu wudja one akeyana la wadeye, tshiki we akatudji lʼunungu.

¹¹Ku Abimeleke akadjangela wudju andi ati: Untu tshe layunanda pami kene kana wadendi, ayudiakema.

¹²Isaka akune wehu lʼekambo lu kete sho. Ku lu dinela diʼeleku kako, wehu wakandune, wakafuli lukama lukama, ne dia Latuyalaka akotshokola.

¹³Isaka akayala kanga ongonyi, akatangonanelaka edja ndu ndi akayala kanga ukundji efula.

¹⁴Ndi akayala la nyimba yʼekoko la nyimba ya ngombe ndu la ekambi efula. Ku asi Filistiya wakawukaka kandjema.

¹⁵Asi Filistiya wakatedia teko diʼashi tshe diakatatshimi ekambi wʼAbarahama, shi, lamʼakindi la lumu.

¹⁶Ku Abimeleke akatela Isaka ati: Unela, umo uma lʼatei a wudja asu, ne dia we ambutuleka wulu.

¹⁷Okone Isaka akunela uma leko, akatuhanga lʼukidi a Ngerare, akadjase leko.

¹⁸Isaka akatshimula teko diʼashi diakawatatshimi lamʼaki Abarahama, shi, la lumu, ne dia asi Filistiya wakaditedia lʼokongo a nyoi kʼAbarahama. Ndi akadietaka kumbu yakatadiole Abarahama, shi.

¹⁹Ekambi wa Isaka wakatshimi lʼukidi ako ntu, wakatundula difuku pulu ndu lʼeteko kʼashi wa nkela.

²⁰Elami wa dungalunga wʼasi Ngerare wakami la elami wa dungalunga wa Isaka, wata vati: Ashi asu mbewo. Okone Isaka akakiole ati: Eseke (kitshimudi ati: Tamu), ne dia vo wakami la ndi.

²¹Okone vo wakatshimi eteko kekina. Vo wakadji la wo tamu ndu leko. Ku ndi akole eteko kako ati: Sitina (kitshimudi ati: Lutunu).

²²Ndi akunela uma leko, akatutshima eteko kekina kakiwo kumama la ndi. Diako mbakandakiole ati: Rehobote (kitshimudi ati: Dihuli). Ku ndi akati ati: Latuyalaka ambutukitsha lu dihuli dia wuki. Okone tayongonanela.

²³Ndi akambela uma leko utsha la Bere-Sheba.

²⁴Latuyalaka akene le ndi lʼutshu; akawutela ati: Dimi keli Unyashungu a Abarahama sho. Tukaki woma; dimi leko la ye. Dimi layukotshokola ndu layufudia tukanula taye lu dikambu dia ukambi ami Abarahama.

²⁵Isaka akatshi ediakelu leko, ku ndi akatemolaka lukumbu la Latuyalaka. Ndi akahiki ndu luudu landi la dipema. Ekambi andi wakatutshima eteko kemotshi.

²⁶Abimeleke[75] la ongenyi andi Ahuzata, ndu Fikole, olombodi andi wʼului wʼalimbi wakatshu uma la Ngerare utsha le Isaka.

²⁷Isaka akawumbula ati: Nyu atunyi ami watumpetshaka, nyakambitshanya uma lu wudja anyu. Ukundi ambunyuya le mi na?

²⁸Ku vo wakûkaluya diui vati: Shu menaka hwe shati: Latuyalaka eko la ye. Diako mbakatatanela shati: Tushani la ye daka.

²⁹We tututshelaki nduku dikambu dia kolo, ne dia shu kunkutshela kolo, tshikima ololo utu. Shu takakunyia la ki. Kakiane we eli otshokwami wa Latuyalaka.

³⁰Okone Isaka akakatela dambu. Ku vo wakali, wakano.

³¹Vo waketo kʼolomo la pindju, wakashikike daka diawo. Ku Isaka akakendja. Okone vo wakatshu la ki.

³²Lushi lako ekambi wa Isaka wakayi; wakayuwutela lukumu la eteko kakawatshimaka vati: Tambutundula lʼashi.

³³Ku ndi akakiole ati: Shiba. Lu dikambu diako mbatuwetaka usumba ako edja ndu elo vati: Bere-Sheba.

³⁴Lamʼakayala Esau la deku akumi anei, ndi akatshuki Judita, ona umuntu a Beri, usi Hiti, ndu Basemate, ona umuntu a Elona, usi Hiti.

³⁵Vo wakanyangia Isaka la Rebeka.