Read tetala Etatelu 29 Bible Online

Etatelu 29 - tetala bible

Etatelu 29

¹Jakoba akakolamela lokendo landi, akatukuma lu kete yʼantu wa lu leke lʼehutwelu ka unya.

²Ndi akedia ashu, enyi ku nyimba shatu yʼekoko yetami lasuki lʼeteko kʼashi. Dive dia wuki diaki lʼunyo wʼeteko kako kakawanoshaka nyimba tshe ya dungalunga.

³Elami wʼekoko wakamotsha nyimba tshe ya dungalunga laawo. Vo wakangitula dive diaki lʼunyo wʼeteko, wakanosha nyimba yako ashi, ku wakakaluya dive lʼunyo wʼeteko.

⁴Jakoba akambula alami wʼekoko ati: Analingu, asi na wenyu? Ku vo wakûkaluya diui vati: Asi Harana mbesu.

⁵Ndi akawambula ati: Nyu mbeyaka Labana, onʼa Nahora? Ku vo wakûkaluya diui vati: Shu mbeyaka.

⁶Ku ndi akawambula ati: Undi, ndi la wulu? Vo wakukaluva diui vati: Ndi eko la wulu. Ndu Ratshele, on andi a umuntu, uku ayayi la limba lʼekoko.

⁷Ndi akati ati: Kakiane unya eki lʼatei ote. Ushidi wa mbotshiya dungalunga atakuki. Nyutanoshisha ekoko ashi, keli nyutshu la ntelesha adiyu.

⁸Ku vo wakûkaluya diui vati: Kema. Shu hateyi ntsha osoku tshikima nyimba tshe yambomotshama kame. Ku elami tshe ndjungitula dive uma lʼunyo wʼeteko, ku ndjonosha ekoko ashi.

⁹Kamʼakandateketaka, ku Ratshele ambukuma la limba lʼekoko wa shi wakandalamaka.

¹⁰Lamʼakenyi Jakoba Ratshele, onʼa Labana, nyangu pami, la ekoko wa Labana, ndi akasukana, akangitula dive uma lʼunyo wʼeteko. Ndi akanosha limba lʼekoko wa Labana, nyangu pami, ashi.

¹¹Jakoba akakhumbatela Ratshele, akatundo la delu, akaleli.

¹²Ku Jakoba akatela Ratshele ati: Dimi mbutoka la sho. Onʼa Rebeka, kadiya sho, kemi. Okone Ratshele akalawo la ntutela shi.

¹³Kamʼakuki Labana lukumu la Jakoba, onʼa kadiyendi ndi akalawo la ntulungula. Ndi akatukhumbatela, akanonana la ndi. Ndi akayi la ndi uya lu luudu landi. Ku Jakoba akusanyia akambu tshe.

¹⁴Labana akawutela ati: Mete, weka ami la emunyi ami mbeve. Ku Jakoba akadjaseʼaka Labana utundu a ngondo tshe.

¹⁵Labana akambula Jakoba ati: Kuyanga mbutoye la mi, ku we ayunkambelaka ulimu ukambelakambela? Umvuteli okone ayuyulanga dimi nkufuta.

¹⁶Labana aki la ana amantu ahendi. Lukumbu lʼenundu laki Lea, ku la kushi Ratshele.

¹⁷Lea aki ashu engelengele, keli Ratshele aki dimena diahangone.

¹⁸Jakoba akalangaka Ratshele efula. Okone ndi akatela Labana ati: Dimi layukukambela ulimu deku esambeli lu dimba dia onʼaye la kushi.

¹⁹Ku Labana akawutela ati: Dimi ndekaka nanga nkushandi uleki mbusha pami kekina. Udjase la mi.

²⁰Jakoba akakambela Labana ulimu deku esambeli dikambu dia Ratshele. Deku diako diaki uku nshi motshi tshu lu ashu andi, ne dia ngandji kakandukaka Ratshele.

²¹Lʼokongo diku Jakoba akatela Labana ati: Umbisha wademi mbidjase la ndi, ne dia nshi yakatalakana yambukuka.

²²Ku Labana akakati dambu, aketi antu tshe wa leko lu dambu.

²³La dikolo diʼutshu, Labana akatshindela Lea, onʼandi a umuntu lʼenundu, laka Jakoba. Ku ndi akulungula wadi.

²⁴(Labana akose Zilipa, ukambi andi a umuntu, akawusha onʼandi Lea.)

²⁵La wedi a pindju, Jakoba ayenaki ku Lea one. Ku ndi akambula Labana ati: Na dikambu ne diutshediye? Aha lu dikambu dia Ratshele mbakamakukambelaka ulimu? Ya ukundi ambuyunkesa okone na?

²⁶Labana akûkaluya diui ati: lu wudja asu, shu hatututshukamiaka kushi ntundu enundu atatshukama.

²⁷Utashidisha lubingu landi. Ku shu tayukusha ukina ne dia ulimu wayuyunkambela deku esambeli dikina.

²⁸Ku Jakoba akatshi osoku, akadjase la Lea lubingu landi. Ku Labana akayusha Jakoba ndu Ratshele, onʼandi a umuntu la kushi.

²⁹(Labana akose Biliha, ukambi andi a umuntu, akawusha onʼandi Ratshele.)

³⁰Jakoba akatshuki ndu Ratshele; ndi akalangi Ratshele uleki Lea. Ndi akamukambela Labana deku esambeli dikina.

³¹Lamʼakenyi Latuyalaka ati: Lea hukama ngandji, ndi akawete kanga diwutshi. Keli Ratshele aki ekumba,

³²Lea akatshu diemi, akuti ona pami lakandole ati: Rubena (kitshimudi ati: We henyi ona pami). Ndi akati ati: Mete, Latuyalaka akenyi fono kami, ne dia uma lu dikambu ne, mbayunanga umemi.

³³Ku ndi akatshu diemi ntu, akuti ona pami. Ndi akati ati: Latuyalaka akuki lukumu ati: Lea mpetshamaka. Okone ndi ambumbisna ndu ona pami one. Ndi akawole ati: Simeyona (kitshimudi ati: Ambuka).

³⁴Ku Lea akatshu diemi ntu, akuti ona pami. Ndi akati ati: Etena kene umemi ayekesanela la mi, ne dia lambuwutela ana apami asatu. Uma lu dikambu so mbakawawole lukumbu vati: Lewi (kitshimudi ati: Ekesanelu).

³⁵Ku ndi akatshu diemi ntu, akuti ona pami. Ndi akati ati: Etena kene, dimi layandula Latuyalaka mete. Diako mbakandawole lukumbu ati: Juda (kitshimudi ati: Diandu). Ku ndi akayemala, aha mbuta ntu.