Read tetala Etatelu 3 Bible Online

Etatelu 3 - tetala bible

Etatelu 3

¹Ului[11] akaleki nyama tshe ya la kete yakatungi Latuyalaka Unyashungu lukesu. Ndi akambula umuntu ati: Ukundi, Unyashungu kunyutela ati: Tanyolekaki elua wʼetamba tshe weli lʼekambo kene?

²Ku umuntu akakaluya ului diui ati: Shu mbeyaka nde elua wʼetamba weli lʼekambo.

³Keli Unyashungu akatokokomiya ati: Tanyolekaki nduku ulua uma lʼutamba weli lʼatei wʼekambo, kuyanga munanda, nyutukuvo.

⁴Ku ului akatela umuntu ati: Yaa! nyu hanyuvo mete.

⁵Paka ne dia Unyashungu mbeyaka ati: Lushi layunyole, ashu anyu wayudiho, ku nyayuyala uku dimi Unyashungu, nyayeya akambu wʼololo ndu akambu wa kolo.

⁶Umuntu akenyi ati: Utamba one ololo nde, ndu dimena lu ashu, ndu kawo dia nfudia yimba. Okone ndi akakohola ulua, akali, akasha umendi. Ku ndu umendi akali.

⁷Ashu awo wakadiho. Vo wakeyi vati: Etakataka mbesu. Vo wakose akatshi wʼetamba wa fingu, wakayatelela afunga.

⁸Ku vo wakuki lohokoso la Latuyalaka Unyashungu lamʼakandetetaka lʼekambo la dikolo. Ku pami la wadendi wakahimbi ndjashe lʼatei wʼetamba, ne dia ndi atukuwaena.

⁹Latuyalaka Unyashungu aketi Adama, akawumbula ati: Lendʼeye na?

¹⁰Ndi akûkaluya diui ati: Dimi lakuki lohokoso laye lʼekambo, ku lakuki woma, ne dia laki utakataka, diako mbushamimi.

¹¹Ndi akawumbula ati: Akakutedi ati: Utakataka mbeye? Undi, we akali ulua wʼutamba wakamakusike?

¹²Ku Adama akûkaluya diui ati: Umuntu lakayambisha dia ndjala la mi kakambishawo, diako mbakamali.

¹³Latuyalaka Unyashungu akambula umuntu ati: Na dikambu diutsheye ne na? Umuntu akûkaluya diui ati: Ului kakampimbi,[12] diako mbakamali.

¹⁴Latuyalaka Unyashungu akatela ului ati: Uma lu dikambu diakayatshi ne, mbambuyudjama mananu kuleki dungalunga tshe la nyama tshe ya lʼukunda. We ayuyakutulaka lu dikundju; ayolekaka ditshu nshi ya lumu laye tshe.

¹⁵Dimi layudja luhetshu lʼasaye la umuntu,[13] ndu lʼasa tukanula taye la tukanula tandi. Ndi ayukokomolaka lʼote, ku we ayûlumataka lu etshindji.

¹⁶Ndi akatela umuntu ati: Dimi layukufudiyaka asui lu nshi yaye ya diemi, ndu yʼeutelu kaye kʼona. We ayutaka ana la lono. Utema aye ayekamaka paka le umeye, la ndi ayukulela.

¹⁷Ku ndi akatela Adama ati: Kete yambudjama mananu dikambu diaye, ne dia we aketawo diui dia wadeye, ndu akali utamba wakamanyusike nti: Tanyolekaki. Uma lu pa kayuyolekaka mbu ya nde nshi tshe ya lumu laye.

¹⁸We ayolekaka tumbatumba uma lʼekambo, keli atende la ahangulakoi wayutumbaka lu kete dikambu diaye.[14]

¹⁹Uma lʼulimu a ntumba diangasa lʼelundji kaye mbayuyukundjaka mbu ya nde, edja ndu we ambukalula lu kete, ne dia uma loko mbakayosama. We eko ditshu, okone we ayukalula utsha lu ditshu.

²⁰Ku Adama akole wadendi lukumbu ati: Eva (kitshimudi ati: Lumu), ne dia ndi aki nyangu antu tshe weli la lumu.

²¹Latuyalaka Unyashungu akatshela Adama la wadendi eloto wa dikuhu. Ku ndi akalotsha.

²²Latuyalaka Unyashungu akati ati: Untu one ambuyala uku otoi asu lu ewu kʼakambu wʼololo la kʼakambu wa kolo. Kakiane tûshimbi, ndi atukusimbula lunya dia nkohola ulua wʼutamba a lumu,[15] la ndi nde, la ntshikala la lumu pundju.

²³Okone Latuyalaka Unyashungu akashanya Adama uma lʼekambo ka Edena dia ndi nkamba Kete uma lene akandosama.

²⁴Osoku mbakandatshanya untu. Ku ndi akakitsha ondjelo wetawo vati: Okeruba, ndu yombo ya lumbi yakasikisoka lu leke lʼehutwelu ka unya lʼekambo ka Edena, dia nama mbuka kʼutsha lʼutamba a lumu.