Read tetala Etatelu 32 Bible Online

Etatelu 32 - tetala bible

Etatelu 32

¹Jakoba akakimela mbuka, ku andjelo wa Unyashungu wakahumana la ndi.

²Lamʼakawaenyi Jakoba, ndi akati ati: Ului wʼandjelo wa Unyashungu one. Ku ndi akole dihuli diako ati: Mahanayima (kitshimudi ati: Elui ehendi wʼantu).

³Jakoba akatumi akendji utsha lu kete ya Seire lu ieke la Edome le Esau, onangu.

⁴Ndi akakokomiya ati: Kanyututeli khumemi Esau nyati: Ukambi aye Jakoba kata ati: Dimi lakatudjase laka Labana, lakatshikala leko edja ndu nshi nye.

⁵Dimi lakatuyala la ngombe, punda, la dungalunga, ekambi wʼapami la ekambi wʼamantu. Kakiane dimi lambutuma akendji dia nkutela we khumemi lukumu lone, ndu dia we mbukami ketshi.

⁶Lamʼakakalula akendji le Jakoba, vo wakawutela vati: Shu takatukuma le onanyo Esau. Enda, ndi lu ndjayi la apami kama nyei dia ndjuhumana la ye.

⁷Jakoba akuki woma efula, akasaki lukumba. Ku ndi akakahanya antu waki la ndi, ndu dungalunga la kamelo lu elui ehendi.

⁸Ndi akati ati: Naka Esau ayolosha ului omotshi, ku ului wutshikadi wayuhanda.

⁹Jakoba akalombe ati: We Unyashungu a tshemi Abarahama, Unyashungu a papa Isaka, Latuyalaka li! we kakamvutela wati: Ukaluli lu kete yaye, ndu lu diuhu diakayuto, ku layutukutshela ololo.

¹⁰Mete, ololo ami hakuki dia we mbukami ketshi la ngandji uku akayantshela. Dimi ukambi aye, lakateho Jorodana nye la danga tu. Keli ka Kiane laya la elui ehendi wʼantu.

¹¹Dimi lamfiukosengasenga nti: Unshimbeli uma lʼanya wa onalingu Esau; ne dia dimi mbukaka woma efula, nti: Atukuyundjaka, dimi la wali ndu ana.

¹²We kakamvutela wati: Dimi layukutshela ololo, layufudia tukanula taye uku lokongo latuyalaka lʼumamu wʼashi a waki,[87] laheyi untu mbala.

¹³Ndi akalali lu dihuli diako lʼutshu; akasanganya diango diaki la ndi dia ntumela Esau, onangu, eshasha:

¹⁴esamalu a mbudi kama hyendi, weumbi akumi ahendi, ekoko a wadi kama hyendi, la ekoko a waumi akumi ahendi.

¹⁵Kamelo ya wadi akumi asatu kame la ana ayo wakatalomaka, ngombe ya wadi akumi anei, la ya waumi dikumi, la punda ya wadi akumi ahendi la ya waumi dikumi.

¹⁶Ku Jakoba akakime limba la limba le ekambi andi. Ndi akawatela ati: Nyeti la ntundu kami ndu kanyutshiki dihuli lasa limba la limba.

¹⁷Ndi akatela ulami wa limba la ntundu ati: Lamʼayuyuhumana la onalingu Esau, naka ndi ayukumbula ati: Usika na eye? La utsha lendi atayatshu? Ukanga limba lone la dungalunga latatshu la ntundu kaye na?

¹⁸Kukaluya diui wati: Lʼukambi aye Jakoba mbelo. Lo leli ushasha wakandakutumedi, we khumemi Esau. Enda, ndu ndame lu ndjayi lʼokongo asu.

¹⁹Diui diako mbakandatela ndu ulami wa hendi, wa satu, ndu le wane tshe wakayayakaka lʼokongo la nyimba ya dungalunga; ati: Osoku mbayunyutatelaka khumemi Esau, ului lʼului lamʼayunyutahumanaka la ndi.

²⁰Kanyutawutelaka ntu nyati: Ndu ukambi aye Jakoba ndame kayayi lʼokongo asu. Ndi akati lʼutema ati: Dimi layuwumula kele la ushasha one wamumutuma la ntundu kami. Lʼokongo diku layenana la ndi dime, kana ndi anungulaka ololo.

²¹Okone ushasha andi aketi la ntundu kandi, keli ndi akatshikala lʼutshu uku lʼului wʼasikandi.

²²Ndi aketo lʼutshu ako, ndi la wadiendi ahendi la ekambi andi wʼamantu ehendi, la anʼandi dikumi la otoi, wakateho Jakoba.

²³Ku ndi akatehuya la wedi a kyoko, vo la diango tshe diaki la ndi.

²⁴Keli Jakoba akatshikala leko ndame. Ku pami kemotshi akalo la ndi ta edja ndu unya lasuki la mputo.

²⁵Lamʼakenyi pami kako ati: Dimi kema la wulu wa mbumba, ndi akukimela wulu lʼeshisha wa la tshina diʼehelohelo. Ku eshisha wa lʼehelohelo ka Jakoba wakatewo lamʼakandalokaka la ndi.

²⁶Pami kako akatela Jakoba ati: Unkimo ntshu, ne dia unya utsha mputo. Ku Jakoba akûkaluya diui ati: Dimi hakukimo tshikima we ambuntatshokodi.

²⁷Pami kako akawumbula ati: Lukumbu laye na? Ku ndi akûkaluya diui ati: Jakoba.

²⁸Ndi akawutela ntu ati: Lukumbu laye haluyuyala Jakoba ntu, keli layali Isariyele[88] (kitshimudi ati: Ndo la Unyashungu), ne dia we ambolo la Unyashungu ndu la antu, ku we ambuyala undeki a wulu.

²⁹Jakoba akosengasenga ati: Umvuteli lukumbu laye. Ku ndi akawumbula ati: Dikambu kuna diamumbulaye lukumbu lami? Ku ndi akatshokola.

³⁰Jakoba akole dihuli diako ati: Peniele (kitshimudi ati: Elundji ka Unyashungu). Ku ndi akati ati: Dimi lakenyi elundji ka Unyashungu ku dimʼone eki la lumu.

³¹Unya akuhutwela lamʼakandatetaka la Penuele. Ndi akatatengunaka, ne dia eshisha wʼehelohelo kandi wakakoko.

³²Uma lu dikambu diako mbahatolekaka asi Isariyele ushisha wʼehelohelo ka nyama edja ndu elo, ne dia one lakalo la Jakoba akotewola eshisha wʼehelohelo kandi.