Read tetala Etatelu 33 Bible Online

Etatelu 33 - tetala bible

Etatelu 33

¹Jakoba akedia ashu, enyi ku Esau one ayayi la apami kama nyei. Okone ndi akakahanya ana le Lea, le Ratshele, ndu le ekambi ehendi wʼamantu.

²Ndi aketsha ekambi wʼamantu la anʼawo la ntundu, Lea la anʼandi lʼatei, ku Ratshele la Josefu lʼokongo.

³Ku ndi ndame aketi la ntundu kawo, akatakhusamaka tena esambeli edja ndu lamʼakandakumi lasuki la onangu.

⁴Esau akalawo la ntuhumana la ndi, akukhumbatela, akudingi anya lu kingu, akanonana la ndi. Ku vo ahendi wakaleli.

⁵Lamʼakedia Esau ashu, ndi akenyi amantu la ana. Ku ndi akambula Jakoba ati: Wa na weli leku na? Ku Jakoba akûkaluya diui ati: Ana wakambisha Unyashungu, dimi ukambi aye, aku.

⁶Ekambi a amantu la anʼawo wakasukana, wakukhusamela.

⁷Ku Lea la anʼandi wakasukana, wakukhusamela. Lʼokongo diku, Josefu la Ratshele wakasukana, wakukhusamela.

⁸Ku Esau akawumbula ati: Dikambu kuna diakayatumi ului wʼantu la dungalunga diakahumanyi la mi lu mbuka? Ku Jakoba akûkaluya diui ati: Dia dimi mbukama ketshi le ye, we khumemi.

⁹Ku Esau akawutela ati: Onalingu, dimi la diango efula; ulami diaye.

¹⁰Ku Jakoba akûkaluya diui lʼosengosengo ati: Kema. Naka dimi lambuhumo lukulu lʼolo lu ashu aye, etawo dia nungula ushasha one uma lu anya ami. Dimi lambena elundji kaye uku untu lambena elundji ka Unyashungu, ndu we ambunungula lʼongenongeno.

¹¹Dimi lambukosengasenga nti: Ulunguli ushasha ami one wamumukela, ne dia Unyashungu akambukaka ketshi utamanya. Okone handjuhumba engo. Ndi akatamanya nsengasenga Esau, ku ndi akalungula ushasha andi.

¹²Esau akawutela ati: Tuneli, tutshu. Dimi layeta la ntundu.

¹³Keli Jakoba akawutela ati: Khumemi, we mbeyaka wati: Anʼami weki tutshitshe, watakikitala. Ndu dungalunga dialomia anʼadio dieko efula. Naka tayudikendjakendja lokendo la wulu lushi otoi, dungalunga tshe mbeyaka mvo.

¹⁴Dimi lambukosengasenga, we khumemi, nti: Eti la ntundu kami, dimi ukambi aye. Ku dimi layutakuyelaka okoke, uku ayukuka dungalunga la anʼami nkendakenda edja ndu lamʼayumukuma lakaye, la Seire.

¹⁵Esau akawutela ati: Etawo dimi nkutshikela ului wʼantu omotshi. Ku Jakoba akawumbula ati: Dikambu kuna diatshikaye? Dikambu otoi, etawo tshikima dia dimi mpumo lukulu lʼolo la ntundu kaye, we khumemi.

¹⁶Okone lushi lako Esau akakimela mbuka utsha la Seire.

¹⁷Ku Jakoba akatshu la Sukota, akatuhika luudu landi leko, ndu ekutu wa dungalunga diandi. Lu dikambu ne mbakawole dihuli diako vati: Sukota (kitshimudi ati: Ekutu).

¹⁸Lamʼakakalula Jakoba uma la Padana-Arama, ndi akakumi la ongenongeno lʼusumba wa Shekeme, lu kete ya Kanana. Ndi akahiki mvudu yandi yʼapema lʼumamu wʼusumba ako.

¹⁹Ndi akasumbi etenyi ka kete[89] kakandahiki mvudu yandi yʼapema uma le ana wa Hamora, shi Shekeme, lʼushinga wa tenyi dia fesa lukama.

²⁰Ku ndi akatshi ediakelu leko, akakiole ati: Ele-Elohe-Isariyele (kitshimudi ati: Unyashungu keli Unyashungu wa Isariyele).