Read tetala Etatelu 34 Bible Online

Etatelu 34 - tetala bible

Etatelu 34

¹Dina, onʼa Lea la umuntu lakanduti la Jakoba, akatshu la ntengola la ana amantu wa lu kete sho.

²Ku Shekeme, onʼa Hamora, onʼa Hiti, uwandji wa kete yako, akawenyi, akulangi. Ndi akeyana la ndi, akutshela dikambu dia sonyi.

³Ku utema wa olongo ako akekama paka le Dina, ona umuntu a Jakoba. Ndi akulangi efula, akasawulaka la ndi ololo.

⁴Ku Shekeme akatela Hamora, shi, ati: Ombosele usekaseka a umuntu uku wadi.

⁵Jakoba akuki lukumu ati: Shekeme akeyana la Dina, onʼandi a umuntu, akusuwula. Lʼetena kako anʼandi wʼapami waki lu nama dungalunga lʼusui. Jakoba akalembohala edja ndu lamʼakawakalula.

⁶Hamora, shi Shekeme, akatshu la ntusawula la Jakoba lu dikambu dia onʼandi a umuntu Dina.

⁷Lamʼakuki ana apami wa Jakoba dikambu diako, vo wakayi uma lʼusui, wakanyangi. Vo wakumala kele ka wulu, ne dia Shekeme akatshi dikambu dia utshatsha, diahakuki untu ntsha lu Isariyele lamʼakandeyana la onʼa Jakoba la umuntu.

⁸Hamora akasawula la wo ati: Utema wa onʼami Shekeme wambekama efula le onʼanyu la umuntu. Dimi lambunyosengasenga nti: Nyuwushandi, utshuki.

⁹Nyekesaneli la su. Tutshukaki anʼanyu wʼamantu, ndu nyu kanyutshukaki anʼasu wʼamantu.

¹⁰Nyu nyayudjaseka lʼatei asu. Kete nye yayuyala uku kete yanyu. Nyudjase, nyutshaki ukanda, nyongonaki loko.

¹¹Shekeme akasengasenga Jakoba la anangu Dina wʼapami ati: Dimi lambunyosengasenga dia dimi mpumo lukulu lʼolo la ntundu kanyu. Ku kene tshe kayunyonomba, dimi layunyushato.

¹²Nyonombe mbu, la wehu tshe wa eshasha walanganyu, dimi layunyushawo. Keli nyumbisha ona umuntu one wadi.

¹³Ku ana apami wa Jakoba wakakaluya Shekeme la Hamora, shi, aui wa lukesu, ne dia Shekeme akasuwula kadiyewo Dina.

¹⁴Vo wakawatela vati: Shu hateyi ntshukamia kadiyesu le untu lahatahema uhekeli. Dikambu diku ndjalaka sonyi le su.

¹⁵Shu hateyi mbetawo aui anyu tshikima nyambuyala uku shu, dia pami tshe lʼatei anyu mbahema uhekeli.

¹⁶Ku shu tayunyushaka anʼasu wʼamantu wadi, la nyu nyayutushaka anʼanyu wʼamantu wadi. Okone shu tayudjaseka kame la nyu, tayuyala wudja otoi.

¹⁷Keli naka nyu hanyetawo diui diasu, dia mbahema uhekeli, ku tayosa kadiyesu, tayumo lane.

¹⁸Aui awo wakangenyangenya Hamora la onʼandi Shekeme efula.

¹⁹Ku olongo a pami ako akatshi dikambu diako esadi. Ndi kuntshimbatshimba, ne dia ndi akalangaka onʼa Jakoba la umuntu efula. Ndi akaleki antu tshe wa lu luudu la shi nemiama.

²⁰Ku Hamora la onʼandi Shekeme wakatshu lʼeotwelo kʼusumba awo; wakasawula la dikumanyi dia ngelu lu dikambu diako vati:

²¹Antu ane wambudjase lʼatei asu ki, tetawo vo ntshikala lʼatei asu la ntshaka ukanda. Kete yasu yeko wuki, nkukaka ndu le wo. Tayutshukaka anʼawo wʼamantu wadi, la vo wayutshukaka anʼasu wadi.

²²Antu ane wayetawo shu mbidjase la wo ndu ndjala wudja otoi, tshikima pami tshe lʼatei asu mbahema uhekeli uku akawahema ehekeli vame.

²³Laso ku dungalunga diawo la ekundji awo tshe hawuyala ekundji asu uka? Tetawo etshelu kawo kene mbayuwutshikala lʼatei asu.

²⁴Ku wane tshe waki laawo waketawo aui wa Hamora la onʼandi Shekeme. Apami tshe wa lʼusumba ako wakahema ehekeli.

²⁵Lamʼaketi nshi shatu, apami tshe wa lʼusumba wakayala la kandji ya ahemelu kʼuhekeli. Ku ana ahendi wa Jakoba, Simeyona la Lewi, anangu Dina, wakose untu lʼuntu yombo yandi, wakatumbi lʼusumba shashimuya lʼetema wa dihunga, wakadiaki apami tshe.

²⁶Vo wakadiaki ndu Hamora la onʼandi Shekeme la yombo, wakatundja Dina uma lu luudu laki Shekeme, wakakalula.

²⁷Ku ana wa Jakoba wakahotshahotsha edu wʼasi usumba, wakalanya usumba tshe, ne dia wakasuwula kadiyewo.

²⁸Vo wakose nyimba yawo ya dungalunga: ngombe, punda, la engo tshe kaki lʼusumba ndu kaki lʼusui.

²⁹Vo wakose ekundji awo tshe uma lu mvudu, wakatole amantu ndu ana uku fumbi.

³⁰Jakoba akatela Simeyona la Lewi ati: Nyu nyambompenyahenya efula, nyambumbete utunyi wʼasi kete nye, asi Kanana lʼasi Perizi. Dimi leko paka la djui tshitshe yʼantu. Okone lamʼayuwusangana dia ndo la mi, dimi la khumbu kami tshe tayudiakema.

³¹Ku vo wakûkaluya diui vati: Ololo vo ntshela kadiyesu uku umuntu kanga luseka uka?