Read tetala Etatelu 38 Bible Online

Etatelu 38 - tetala bible

Etatelu 38

¹Lʼetena keso Juda akangana la anangu etali, akatukuma laka Hira, usi Adulama.

²Juda akatena usekaseka a umuntu wʼusi Kanana, lukumbu landi Shua. Ndi akawose wadi, akeyana la ndi.

³Ku umuntu ako akatshu diemi, akuti ona pami, akawole ati: Ere.

⁴Ndi akatshu diemi ntu, akuti ona pami ukina, akawole lukumbu ati: Onana.

⁵Lʼokongo diku ndi akuti ona pami ukina, akawole ati: Shela. Juda aki la Kezibe lamʼakuto onʼako.

⁶Juda akosela Ere, onʼandi lʼenundu wadi, lukumbu landi Tamara.

⁷Ere, onʼa Juda lʼenundu akatshaka kolo la ntundu ka Latuyalaka. Ku Latuyalaka akudiaki.

⁸Juda akatela Onana ati: Utshu le wadi aki onanyo, uwose wadi, kululi luhanga laki onanyo.

⁹Ku Onana akeyi ati: Ona layumuta la wadi aki enundu ami huyala onʼami hita. Okone lamʼakandeyanaka la wadi aki enundu andi, lamʼakandayangi nkosha alomi, ndi akakosha la kete; ati: Dimi ntukukundjiya enundu ami ukito.

¹⁰Ku dikambu diakandatshi diaki kolo la ntundu ka Latuyalaka. Okone Latuyalaka akudiaki ndu ndi.

¹¹Lʼokongo diku Juda akatela Tamara wadi aki onʼandi ati: Utshikali wadi aki udu lu luudu la sho edja ndu lamʼayula onʼami Shela. Ndi akuki woma ati: Ndu Shela atukuyuvo uku akavu anangu. Okone Tamara akatudjase lu luudu la shi.

¹²Lamʼaketi nshi motshi, onʼa Shua la umuntu, wadi a Juda, akavu. Lamʼakasambema Juda, ndi akatshu ndi la ongenyi andi Hira, usi Adulama, la Timina le wane wakahimbulaka ekoko andi diosa.

¹³Wakatela Tamara vati: Ukilu aye uyanga mbeta utsha la Timina la ntuhimbula ekoko andi diosa.

¹⁴Ku Tamara akakulula ahondo andi a wadi aki udu, akalote dihondo dikina, akakumbi elundji. Ndi akatudjase lʼumamu a mbuka kʼutsha la Timina lʼeotwelo ka luayima. Ndi akeyi ati: Shela ambula, keli watambishandi dia dimi ndjala wadendi.

¹⁵Lamʼakawenyi Juda, ndi akukani ati: Kanga munanyi kendi, ne dia ndi akakumbi elundji.

¹⁶Ku Juda akasukana le ndi lʼumamu a mbuka, akawutela ati: Dimi kakulanga, yaka teyani; ne dia ndi kumbeya ati: Wadi aki onʼami kendi. Ku Tamara akawumbula ati: Engo kakona kayuyutshinda?

¹⁷Juda akûkaluya diui ati: Dimi layukutumela osongo a mbudi uma lu limba lami. Ku ndi akawumbula ntu ati: We hambisha engo kemotshi okole edja ndu lamʼayuyuntumela engo ka tshindu?

¹⁸Ku Juda akawumbula ati: Engo kakona kayumukutshikela okole? Ku Tamara akati ati: Untshikili ematelu kaye, uya aye la ukalimba wukimediye lu lunya. Ndi akawushawo. Ndi akeyana la ndi. Ku Tamara akatshu la ndi diemi.

¹⁹Tamara akunela, akatshu, akatukulula ahondo andi, akalote ahondo andi a wadi aki udu ntu.

²⁰Juda akatumela umuntu ako osongo a mbudi le ongenyi andi, usi Adulama, dia ntshungula okole wakandutshikela. Keli ndi kumbutana.

²¹Ndi akambula asi ngelu ati: Lendʼeli umuntu kanga luseka lakadjashi la luayima lʼumamu a mbuka? Vo wakûkaluya diui vati: Nduku umuntu kanga luseka leli lindu.

²²Ku ndi akakalula le Juda, akawutela ati: Dimi hambutanyi, ndu asi ngelu wakamvutedi vati: Nduku umuntu kanga luseka leli lindu.

²³Ku Juda akati ati: Ndi akimeli diango diakamutshikedi okole, watukutonyola. Dimi lakutumedi osongo a mbudi one, keli we hutanyi.

²⁴Lamʼaketi ngondo shatu, wakayutela Juda vati: Tamara, wadi aki onʼaye, akunana, ambutsho diemi lu luseka. Ku Juda akati ati: Nyutundja lʼandja, keli ndi atshumbami lu dja.

²⁵Lamʼakawutundja lʼandja, ndi akatumela ukilu andi diui ati: Dimi la pami, kanga diango ne, mbutshwi diemi diako. Dimi lambukosengasenga nti: Ulimbitelu kanga ematelu kene, uya one ndu ukalimba one.

²⁶Juda aketawo ati: Diango diami mbedio. Ndi akati ntu ati: Ndi kambuyinga, ne dia dimi kumbusha onʼami Shela, uma lʼetena kako ndi kumbeyana la ndi ntu.

²⁷Lamʼakandayangi mbuta, enda, diasa diaki lʼutema andi.

²⁸Lamʼakandatataka lono, ona omotshi akatundja lunya. Ku umbutshutshi akakeleka kyodikodi ya tilili lu lunya landi. Ndi akati ati: One keli Umba.

²⁹Keli lʼokongo diku ona ako akakaluya lunya, ku onangu akayuto. Umbutshutshi akati ati: Ushu akona one wakayayatundwela? Okone ndi akawole ati: Pereze (kitshimudi ati: Ushu).

³⁰Lʼokongo diku ku onangu laki la kyodikodi ya tilili lu lunya landi akayuto, ku wakawole vati: Zera (kitshimudi ati: Ngaingai).