Read tetala Etatelu 39 Bible Online

Etatelu 39 - tetala bible

Etatelu 39

¹Asi Ishamele wakakumi la Josefu lʼEdjibitu. Ku Potifara usi Edjibitu, olombodi wʼalimbi wa Farayo, akusumbi uma le wo.

²Latuyalaka aki la Josefu,[99] ku diese diakatuyelaka. Ndi akakambaka ulimu lu luudu la khumendi, usi Edjibitu.

³Khumendi akenyi ati: Latuyalaka eko la ndi, ndu atongonyaka akambu tshe watundutshaka.

⁴Ku Josefu akahumo lukulu lʼolo le khumendi lakandakambelaka ulimu. Ku khumendi akukitsha ulami a luudu landi ndu wa diango tshe diaki la ndi.

⁵Uma lʼetena kakandukitsha ulami a luudu ndu wa diango diandi tshe, Latuyalaka akatshokola luudu la usi Edjibitu dikambu dia Josefu. Mete, otshoko wa Latuyalaka wakayala lu diango tshe diaki la ndi, lu luudu ndu lu dikambo.

⁶Usi Edjibitu ako akakitsha diango diandi tshe lʼanya wa Josefu. Ndi ndame akanya tukanyi tandi lu diango diandi tshe, tshikima ma diakandalekaka. Josefu aki la diema diʼololo la dimba dia dimena.

⁷Lʼokongo diku wadi a khumi a Josefu akakomiya Josefu; akaweti ati: Yaka, yetami la mi.

⁸Keli ndi akaseke; akatela wadi a khumendi ati: We henyi, khumemi heyi efula ka diango diandi dieli lu luudu. Ndi akakimo diango tshe lu anya ami.

⁹Aha ndame kundeki wuki lu luudu lone? Ndi hanshimbi nduku engo, tshikima we, ne dia we eko wadendi. Ukundi ukukimi ntsha munga kene ka wuki, la ntshela Unyashungu kolo?

¹⁰Kuyanga mbakandasengasengaka Josefu la lushi la lushi, ndi kumbetawo mbeyana la ndi, kana ndjala kame la ndi.

¹¹Ku lushi lomotshi ndi akoto lu luudu dia ntsha ulimu andi. Lʼetena keso nduku pami kekina kaki loko.

¹²Ku wadi a khumendi akukimela lu dihondo, ata ati: Yaka tetami! Keli Josefu akatshiki dihondo lu anya andi, akalawo lʼandja.

¹³Ku lamʼakenyi umuntu ati: Ndi ambutatshiki dihondo diandi lu anya ami, ambundawo,

¹⁴ndi aketi ekambi wʼapami wa lu luudu; akawatela ati: Nyu hanyenyi, umemi akatela usi Heberu one, dia ndjutonyola. Ndi akayi le mi, dia ndjetama la mi, keli dimi lakahangwehangwe la diui dia wulu.

¹⁵Lamʼakandambuki dimi lambuhangohango, ndi akatatshiki dihondo diandi ne lasuki la mi, akalawi lʼandja.

¹⁶Ndi akakitsha dihondo dia Josefu lasuki la ndi edja ndu lamʼakakalula khumemi lu luudu.

¹⁷Ndi akawutela aui ane ati: Fumbi kaye kʼusi Heberu, lakayatela, akayi dia ndjokenya la mi.

¹⁸Keli lamʼakamahangwehangwe, ndi akatshiki dihondo diandi lasuki la mi, ku ndi akalawi lʼandja.

¹⁹Lamʼakuki Potifara aui waki wadendi lu mbutela ati: We henyi wuhu wakantshedi fumbi kaye! Ndi akadunganela la kele.

²⁰Khumi a Josefu akawundi, akawundji lu lukanu, lene akawadihaka asi lukanu wa khumʼekanga. Ndi akatshikala loko.

²¹Keli Latuyalaka aki la Josefu,[100] akawukaka ketshi, akuhumuya lukulu lʼolo le ulami a lukanu.

²²Ulami a lukanu akadji Josefu kapita kʼasi lukanu tshe. Nduku dikambu diakatshamaka tshikima uma le ndi.

²³Ulami a lukanu kundjala la ukandukandu lu diango diakalamaka Josefu, ne dia Latuyalaka aki la ndi, ndu akaluwanyaka akambu tshe wakandatshaka.