Read tetala Etatelu 40 Bible Online

Etatelu 40 - tetala bible

Etatelu 40

¹Lʼokongo a nshi motshi kapita kʼamangudi a wanu wa khumʼekanga kʼEdjibitu la kapita kʼekatshi andi wa ma wakanyangia khumewo, khumʼekanga kʼEdjibitu.

²Ku Farayo akuki tupita tandi tuhendi tako kele, kapita kʼamangudi a wanu la kapita kʼekatshi wa ma.

³Ndi akawadji lu lukanu, lu luudu lʼulami, lu dihuli diakadjaseka Josefu.

⁴Ku ulami a lukanu akakimo le Josefu dia ndi mbalama, ku Josefu akakimanyiaka ololo. Vo wakatshikala nshi motshi lu lukanu.

⁵Umangudi a wanu la ukatshi wa ma wa khumʼekanga kʼEdjibitu wakenyi alo lʼutshu wame lamʼakiwo lu lukanu. Untu lʼuntu akenyi do diaki la kitshimudi yadio.

⁶Lamʼakoto Josefu le wo la pindju, ndi akatani la ulingulingu.

⁷Ndi akambula tupita ta Farayo taki la ndi lu lukanu la khumʼekanga ati: Kambunyutshutshumala elo na?

⁸Ku vo wakawutela vati: Shu takenyi alo, keli hatenyi untu latulimbitshiya kitshimudi yawo. Josefu akawambula ati: Aha elimbitshiyelu le Unyashungu keto? Dimi lambunyosengasenga nti: Nyunsakweli alo anyu.

⁹Ku kapita kʼamangudi a wanu akasakwela Josefu do diandi ati: Lu do diami, dimi lakenyi okodi wʼelua la ntundu kami.

¹⁰Okodi ako aki la tahi shatu yakato ehundu. Ehundu ako wakayombola esudumba waki la elua wʼetshundju; ku elua ako akele.

¹¹Dikoho dia Farayo diaki lu lunya lami. Dimi lakakudi elua emotshi, lakamudi ashi awo lu dikoho dia Farayo, ku lakasha Farayo dikoho diako.

¹²Ku Josefu akawutela ati: Kitshimudi ya do diaye nye: tahi shatu yeli nshi shatu.

¹³Lamʼayeta nshi shatu, Farayo ayukutundja uma lu lukanu, ayukukaluya lʼulimu aye. Okone we ayushaka Farayo dikoho diandi uku akayawushaka nshi kina.

¹⁴Keli dimi lambukosengasenga nti: Kumbuho lamʼayuyuyala la ongenongeno, kumbuki ketshi. Konteketele le Farayo, keli kantundja uma lu luudu la lukanu lone.

¹⁵Dimi lakandama uma lu kete yʼasi Heberu, la dimi kuntsha nduku dikambu dia mboto lu lukanu lindu.

¹⁶Lamʼakenyi kapita kʼekatshi ati: Kitshimudi ya do dia unyami yaki ololo, ndu ndi akasakwela Josefu do diandi ati: Lu do diami, dimi lakenaki lemba asaka asatu wa ma dia wema lʼote ami.

¹⁷Lu saka diakahemi ladiku kaki wehu tshe a wama wa lufumba wa Farayo. Ku fudu yaki lu dile ladiku diʼote ami.

¹⁸Josefu akawutela ati: Kitshimudi ya do diaye nye. Asaka asatu ako weli nshi shatu.

¹⁹Lamʼayeta nshi shatu, Farayo ayukutundja uma lu lukanu, ayukuhane lʼutamba. Ku fudu yayuhatula emunyi aye.

²⁰Lushi la satu, laki lushi lʼeutwelu ka Farayo. Okone ndi akakatela ekambi andi tshe dambu. Ndi akatundja kapita kʼamangudi a wanu la kapita kʼekatshi wa ma uma lu lukanu, akawaeme la ntundu kʼekambi andi.

²¹Ku ndi akakaluya kapita kʼamangudi lʼulimu andi. Okone ndi akasha Farayo dikoho diandi uku akandawushaka.

²²Keli ndi akahane kapita kʼekatshi lʼutamba. Akambu aso wakatshama pupu le wo uku akalimbitshiya Josefu alo awo.

²³Keli kapita kʼamangudi a wanu kunkana dia Josefu ntu, akatuwuhela.