Read tetala Etatelu 41 Bible Online

Etatelu 41 - tetala bible

Etatelu 41

¹Lamʼaketi deku pendi diʼetundu, Farayo akenyi do. Lu do diako, ndi akemadi lʼumamu a ndjali ka Nile.

²Enyi ku ngombe esambeli ya waki ndu yʼamena yayatumbi uma lu ndjali la ndjole adiyu.

³Enyi ntu ku ngombe kina esambeli ya dingeno ndu ya tondjondju yayatumbi lʼokongo ayo, yakayemala lasuki la yo.

⁴Enda, ngombe esambeli ya dingeno la tondjondju yakali ngombe esambeli ya waki yʼamena. Ku Farayo akakashimo uma lu djo.

⁵Ku ndi akakalula lu djo ntu, akenyi do dikina, enyi ku asha esambeli weli la tongo ya waki yʼamena. Asha ako esambeli wakatumbi lu tshina otoi.

⁶Enyi ku asha esambeli akina weli la tongo yakalungula la luhaladi la yanyi yʼuma lʼehutwelu ka unyawayatumbi lʼokongo awo.

⁷Asha esambeli waki la tongo yʼelungudi wakamene asha esambeli waki la tongo ya waki yʼamena. Ku Farayo akakashimo uma lu djo; akati ati: Teti lu do one enami okone!

⁸La pindju Farayo akahenyahenyama lu lumu. Ndi akatumi akendji la nteta akanga wʼaloho la akanga a tumba tshe wa lʼEdjibitu. Ku Farayo asakwela alo andi. Keli nduku untu akeyi nimbitshiya Farayo tukitshimudi tawo.

⁹Kapita kʼamangudi a wanu akatela Farayo ati: Dimi lambuho munga kami elo.

¹⁰We Farayo akatuki, shu ekambi aye, kele. Okone we akatudji, dimi la kapita kʼekatshi wa ma, lu lukanu, lu luudu la kapita kʼelami wʼasi lukanu.

¹¹Dimi la ndi takenyi alo utshu wame, untu lʼuntu akenyi do diaki la kitshimudi yadio.

¹²Ku olongo a pami omotshi, usi Heberu, fumbi kʼolombodi wʼalimbi, aki la su leko. Shu takusakwela alo asu, ku ndi akatulimbitshiya untu lʼuntu kitshimudi ya do diandi.

¹³Ku akambu wakayala uku akandatulimbitshiya. Farayo akankaluya lʼulimu ami. Keli wakahane kapita kʼekatshi lʼutamba.

¹⁴Farayo akatumi dikendji dia nteta Josefu. Vo wakatutundja esadi uma lu lukanu. Ndi akanya divu, akengula ahondo, akatshu la ntundu ka Farayo.

¹⁵Ku Farayo akatela Josefu ati: Dimi lakenyi do, ku nduku untu lakeyi nimbitshiyamidio. Keli lakuki lukumu ati: We kateyaka nimbitshiya antu alo lamʼatuwukusakwelakawo.

¹⁶Josefu akakaluya Farayo diui ati: Yimba nye yaha uma le mi, tshikima Unyashungu kayulimbitshiya Farayo kitshimudi yʼololo.

¹⁷Ku Farayo akasakwela Josefu do diandi ati: Lu do diami, dimi lakenyi lemadi lʼumamu a ndjali ka Nile.

¹⁸Menyi ku ngombe esambeli ya waki yʼamena yayatumbi uma lu ndjali dia ndjole adiyu.

¹⁹Menyi ntu ku ngombe esambeli kina ya dingeno la tondjondju yahamatenyi nduku lushi lu kete yʼEdjibitu yayatumbi lʼokongo a nye ya ntundu.

²⁰Ku nye ya dingeno la tondjondju yakali ngombe esambeli ya waki yʼamena ya ntundu.

²¹Lamʼakayashili ndjile, kumbeyama ati: Engo kuleyo, ne dia yo yaki dingeno la tondjondju uku akiyo ntundu. Ku dimi lakakashimo uma lu djo.

²²Lu do dikina, dimi lakenyi asha esambeli weli la tongo ya waki yʼamena wayatumbi uma lu tshina otoi.

²³Ku asha esambeli wʼatanganyi atanganyi wakalungula la luhaladi la yanyi lʼuma lʼehutwelu ka unya, wakatumbi lʼokongo awo.

²⁴Asha ako wʼatanganyi wʼelungudi wakamene asha esambeli waki la tongo ya waki yʼamena. Dimi lakasakwela akanga wʼaloho do ne, keli nduku untu lakeyi nimbitshiyamidio.

²⁵Josefu akatela Farayo ati: Alo wakayenaki, we Farayo, weko la kitshimudi otoi. Unyashungu akenyisha Farayo akambu wayangandi ntsha.

²⁶Ngombe esambeli yʼamena, yeli deku esambeli, ndu asha esambeli weli la tongo yʼamena, weli deku esambeli pupu. Alo ane ahendi weko paka do otoi.

²⁷Ngombe esambeli ya dingeno la tondjondju yakayutumba lʼokongo, yeko deku esambeli, ndu asha esambeli waki la tongo yʼatanganyi ndu yakalungula la luhaladi la yanyi lʼuma lʼehutwelu ka unya, yeko deku esambeli dia ndjala ka kasha.

²⁸Diako mbakamakutedi nti: Unyashungu akenyisha Farayo dikambu diayangandi ntsha.

²⁹Enda, lu deku esambeli ne diayayi, kete ya Edjibitu tshe yayongonya mbu ya nde efula kaheyama.

³⁰Keli deku esambeli dia ndjala ka kasha diayuyala lʼokongo adio. Ku mbu ya nde yayushila tshe lu kete ya Edjibitu. Ndjala ka kasha kayuhangiya lu wedja tshe.

³¹Ndjala ka kasha kayayi keso, kayuleka wulu efula edja ndu antu wayukumbula efula ka mbu ya nde yaki la wo nshi kina.

³²Naka Farayo akenyi do tena pendi, keti Unyashungu ambushikike dikambu so, ku laso ndi ayusamanya dia ditsha.

³³Okone Farayo asonole pami kemotshi, kanga yimba la ewu, ukitsha olombodi lu kete ya Edjibitu.

³⁴Farayo asamanya dia ntsha dikambu so. Asonole ndu elombodi ekina, adianganya lu beke tshe dia Edjibitu, dia vo nkongoya etenyi otoi ka tanu ka dinela dia untu lʼuntu lu deku esambeli diayongona mbu ya nde efula kaheyama.

³⁵Vo kawokongolaki mbu ya nde lu deku diake diʼololo diayayi, kawuyumbaki lʼesumba a waki, la tshina dia lunya la Farayo.

³⁶Mbu ya nde sho kayumbami, diako mbahuvo antu lu deku esambeli dia ndjala ka kasha kayuyala lu kete ya Edjibitu.

³⁷Aui aso wakangenyangenya Farayo la ekambi andi tshe.

³⁸Ku Farayo akambula ekambi andi ati: Lendi ayututana untu ukina luludiami la Nyuma ka Unyashungu uku ndi?

³⁹Okone Farayo akatela Josefu ati: Unyashungu ambukenya akambu ane tshe, ku nduku untu lukuleki ewu la yimba.

⁴⁰Dimi lambukudja olombodi a luudu lami,[101] ndu wudja ami tshe wayukitanyiaka aui aye; paka lu kiti ka diulelu kukulekimi.

⁴¹Farayo akatela Josefu ati: Dimi lambukudja umbuledi lu kete yʼEdjibitu tshe.

⁴²Ku Farayo akanya lohete landi laki la ematelu uma lu lunya landi akaludji lu luhita la Josefu. Ndi akolotsha ahondo wa nemo wa diulelu, ndu molola wa paunyi lu kingu kandi.

⁴³Ndi akawahemia lu pusupusu kakayayelaka kandi. Ku antu wakatahangohangoka la ntundu kandi vati: Nyuki adui! Ku ndi akawudji umbuledi lu kete yʼEdjibitu tshe.

⁴⁴Farayo akatela Josefu ati: Dimi keli Farayo! Lu kete yʼEdjibitu tshe, nduku untu layedia lunya kana lukulu landi tshikima la wulu uma le ye.

⁴⁵Farayo akole Josefu lukumbu ati: Zafenate-Paneya (kitshimudi ati: Umbishudi wʼakambu wushami). Ndi akawusha Asenate, onʼa Poti-Fera, olombedi wa One, wadi. Ku Josefu akatakindulaka dia ntendi kete yʼEdjibitu tshe.

⁴⁶Josefu aki la deku akumi asatu lamʼakandemala la ntundu ka Farayo, khumʼekanga kʼEdjibitu. Ku Josefu akamo la le Farayo, akatakindulaka lu kete yʼEdjibitu tshe.

⁴⁷Lu deku esambeli diaki kete eteto, mbu ya nde yakangonanela otekoya.

⁴⁸Ndi akakongoyaka mbu ya nde deku esambeli so lu kete yʼEdjibitu, ku ndi akayumbi lʼesumba. Ndi akatumbaka mbu ya nde tshe yakandatakongoyaka uma lu tusamba lu esumba ato.

⁴⁹Osoku Josefu akumbi mbu ya nde uku lokongo la lʼumamu a ndjali, edja ndu wakaheko mbala efula kayo. Mete, yo yakayala efula kaheyama mbala.

⁵⁰Asenate, onʼa Poti-Fera, olombedi wa One, akuti la Josefu ana apami ahendi ntundu ndjala ka kasha katayala.

⁵¹Josefu akole onʼandi lʼenundu ati: Manase (kitshimudi ati: Mbuhiya); ne dia ndi akati ati: Unyashungu ambumbuhiya asui ami tshe ndu luudu la papa tshe.

⁵²Ku ndi akole onʼandi la hendi ati: Efarayima (kitshimudi ati: Diwutshi); ati: Unyashungu ambumbete kanga diwutshi lu kete yakamadienaka.

⁵³Deku esambeli diaki mbu ya nde efula lu kete yʼEdjibitu diaketi.

⁵⁴Ku deku esambeli dia ndjala ka kasha diakatatela ndja[102] uku akati Josefu lu dikambu diako. Ndjala ka kasha kakakukanela lu kete tshe, keli mbu ya nde yakiko lu kete yʼEdjibitu.

⁵⁵Lamʼakakukanela ndjala ka kasha lu kete yʼEdjibitu tshe, antu wakayulelela Farayo dia ndi mbasha mbu ya nde. Ku Farayo akatela asi Edjibitu ati: Nyutshu le Josefu, nyututshi akambu tshe wayundunyutela.[103]

⁵⁶Ndjala ka kasha akakukanela lu wedja tshe wa la kete. Ku Josefu akafulula apenge wa mbu ya nde, akasundja asi Edjibitu.

⁵⁷Asi wedja ekina wakayakaka lʼEdjibitu la ndjusumba mbu ya nde le Josefu, ne dia ndjala ka kasha akatekoya mpangiya lu wedja tshe.