Read tetala Etatelu 42 Bible Online

Etatelu 42 - tetala bible

Etatelu 42

¹Lamʼakuki Jakoba ati: Mbu ya nde yeko lʼEdjibitu, ndi akambula anʼandi ati: Ukundi wendananyu na?

²Nyulungi, dimi lakuki lukumu ati: Mbu ya nde yeko lʼEdjibitu. Nyuhulo utsha leko, nyutusumbi mbu ya nde, mbayutuka la ndjala.[104]

³Anangu Josefu dikumi wakahulo utsha lʼEdjibitu la ntusumba mbu ya nde.

⁴Jakoba kuntuma Bendjamina, kushi a Josefu, kame la wo. Ndi akuki woma ati: Dikambu dimotshi dia kolo diatukutuyala le ndi lu mbuka.

⁵Ana apami wa Isariyele wakatshu, wakatemala kame la antu akina lʼEdjibitu dia nsumba mbu ya nde, ne dia ndjala ka kasha kaki wulu lu kete ya Kanana.

⁶Josefu aki umbuledi a kete sho. Ndi akasundjaka antu mbu ya nde lu kete yako. Anangu Josefu wakayi, wakayukhusamela, wakakole ete awo.

⁷Lamʼakenyi Josefu anangu, ndi akawaeyi, keli ndi kundjashula le wo. Ndi akateketa la wo aui wa wulu; akawambula ati: Uma lendi uyenyu na? Vo wakûkaluya diui vati: Uma lu kete ya Kanana kuyesu, dia ndjusumba mbu ya nde.

⁸Josefu akeyi anangu, keli vo kumbeya.

⁹Josefu akuho alo wakandenaka dikambu diawo,[105] ku ndi akawatela ati: Atopi mbenyu! dia ndjukemba kete nye mbuyenyu.

¹⁰Ku vo wakûkaluya diui vati: Kema, khumesu, la ndjusumba mbu ya nde kuyesu, shu ekambi aye.

¹¹Ana wa shesu otoi mbesu. Ekambi aye kema atopi, antu wa shikaa mbesu.

¹²Ndi akakaluya diui ati: Nduku! paka dia ndjukemba kete mbuyenyu.

¹³Ku vo wakawutela vati: Shu ekambi aye teko ana apami dikumi la ahendi. Ana wa untu otoi, ludjashi lu kete ya Kanana, mbesu. Kushesu akatshikala la shesu, keli ukina kemako.

¹⁴Josefu akakaluya diui ati: Osoku mbakamanyutedi nti: Atopi mbenyu.

¹⁵Tayuhimba mete kanyu lu dikambu ne. Lu lukumbu la Farayo! nyu hanyunyia ekulu anyu uma lane tshikima kushenyu ako ambuya.

¹⁶Nyutumi omotshi uma lʼatei anyu dia ntosa kushenyu, nyu akina nyutshikali lu lukanu. Osoku mbayutuhimba aui anyu kana mete katanyu. Naka kema, lu lukumbu la Farayo! atopi mbenyu.

¹⁷Ku ndi akawadji nshi shatu lu lukanu vo tshe.

¹⁸Lushi la satu Josefu akawatela ati: Dimi mbukaka Unyashungu woma, nyutshi okone mbayunyutshikala la lumu.

¹⁹Naka antu a mete mbenyu, onengenyu omotshi atshikali lu lukanu. Keli nyu akina tshe nyutshu, nyotole mbu ya nde dia ntulesha khumbu yanyu.

²⁰Kanyumbela kushenyu dia dimi mbeya mete kanyu, okone mbahanyuvo. Ku vo wakatshi osoku.

²¹Vo wakatanela vati: Shu teki la unungu lu dikambu dia kushesu. Shu takenyi okei andi lamakandatosengasengaka, keli shu kumbukela, diako mbambutuyala la sui ne.

²²Rubena akakaluya diui ati: Dimi kunyosengasenga nti: Tanyutshelaki ona one kolo?[106] Keli nyu kumbukelami, diako mbambutolombama dikila diandi.

²³Vo kumbeya vati: Josefu mbeyaka oteketa asu. Tena tshe diakateketaka Josefu la wo, ukadimudi akakadimulaka aui awo.

²⁴Josefu akamo la le wo, ku ndi akatulela. Ndi akayoteketa la wo ntu, akandi Simeyona uma lʼatei awo, akukeleka molola la ntundu kawo.

²⁵Josefu akatela ekambi dia vo ndudia paya yawo too la mbu ya nde, ndu dia nkaluya falanga ya untu lʼuntu lu paya kandi. Ndi akawatela dia vo mbasha ndu pamba ya vo ntalekaka lu mbuka. Ku vo wakatshi uku akandawatela.

²⁶Vo wakahe mbu ya nde ladiku dia punda yawo, wakunela uma leko.

²⁷Ku omotshi lʼatei awo akadihula paya dia ndesha punda lu dihuli diakawahangi. Enyi ku falanga nye yeli lʼunyo a paya.

²⁸Ku ndi akatela anangu ati: Wakakalusha falanga yami! Yo nye yeli lu paya kami. Ku asulu awo wakate. Ku vo wakambwana vati: Dikambu kuna diambututshela Unyashungu okone?

²⁹Vo wakakalula lu kete ya Kanana le shewo Jakoba. Vo wakatuwutela akambu tshe wakayala le wo, vati:

³⁰Umbuledi a kete sho akateketaka la su paka aui wa wulu; akatukani ati: Atopi wa kete yawo mbesu.

³¹Shu takawutela shati: Shu kema atopi, antu wa shikaa mbesu.

³²Anangu dikumi la ahendi mbesu, ana wa shesu otoi. Otoi utu mbeli kema, ku kushesu akatshikala la shesu lu kete ya Kanana.

³³Untu leli umbuledi lu kete sho akatukaluya diui ati: Layunyuhimba okone dia mbeya kana antu wa mete mbenyu. Nyutshiki onengenyu omotshi lindu. Nyose mbu ya nde dia ntulesha khumbu yanyu, nyutshu.

³⁴Kanyumbela kushenyu. Okone mbayumulimbitela nti: Nyu kema atopi, antu wa shikaa mbenyu. Ku dimi layunyukimwela onengenyu, ku nyayetetaka lu kete nye uku alanganyu.

³⁵Lamʼakawahungula diango diaki lu paya yawo, wenyi ku falanga ya untu lʼuntu nye yeli lu paya kandi. Lamʼakawenyi falanga, vo la shewo wakuki woma efula.

³⁶Shewo Jakoba akawatela ati: Nyu nyambumanela anʼami. Josefu kema, Simeyona kema, ku nyati: Tose ndu Bendjamina. Akambu ane tshe ndjakaka paka lʼote ami.

³⁷Ku Rubena akakaluya shi diui ati: Naka dimi hankalusha Bendjamina le ye, kudiaki anʼami wʼapami ahendi. Dikambu otoi, umbidjendi lʼanya, ku layukaluya le ye.

³⁸Ku Jakoba akûkaluya diui ati: Onʼami hatshu la ye. Onangu akavu, paka ndi ndame kambutshikala la mi. Naka dikambu dimotshi dia wulu diayutuyala le ndi lu mbuka, nyu yayotola ndjui yami la okei utsha le wapapa.