Read tetala Etatelu 43 Bible Online

Etatelu 43 - tetala bible

Etatelu 43

¹Ndjala ka kasha akatamanya mpangiya lu kete sho.

²Lamʼakashili mbu ya nde yakawela uma lʼEdjibitu, Jakoba akatela anʼandi ati: Nyumutsho, nyututusumbeli etenyi ka mbu ya nde.

³Juda akûkaluya diui ati: Pami kako akatokokomiya ati: Naka kushenyu hayi la nyu, nyu hanyeyi mena elundji kami.

⁴Naka we ayetawo ntuma kushesu kame la su, shu tayutsho la ntukusumbela mbu ya nde.

⁵Keli naka we hetawo mbutuma, shu hatutshu; ne dia pami kako akatokokomiya ati: Nyu hanyeyi mena elundji kami, tshikima kushenyu kuyi la nyu.

⁶Ku Isariyele akawambula ati: Okoko wana wakanyatuntshela kolo wuhu oso? Ukundi akanyatutela pami kako nyati: Shu la onengesu ukina?

⁷Keli vo wakûkaluya diui vati: Pami kako akatumbula akambu asu ndu akambu wa khumbu kasu ati: Shenyu eki la lumu? Nyu kema la onengenyu ukina? Ku shu takakaluya aui uku akandatumbula. Ukundi ututeya shati: Ndi ayututela ati: Kanyuyi la onengenyu?

⁸Juda akatela Isariyele ati: Unkimweli ona, katutshu la ndi mbayutuka, we ndu shu, ndu anʼasu.

⁹Dimi lambetawo unungu wa ona lʼote ami. Konombendi uma lu anya ami. Naka dimi hambukalusha la mbukimo le ye, dimi layuyala la unungu wa ona le ye pundju.

¹⁰Utunduyala shu kuntshimbatshimba, tshiki tambukalulaka etena ka hendi.

¹¹Shewo Isariyele akawatela ati: Naka dikambu so diambuhika dia ndi ntsho, nyutshi okone. Nyosonole elua wuleki amena wa lu kete nye, nyudji lu paya yanyu, nyotole pami kako ushasha, etenyi ka diango diʼupumu uku yema yʼiso kʼushinga a wulu, yema yʼusanga, etenyi ka diango diʼepumu, ndu kasu la edika.

¹²Nyotole falanga tena pendi; keli kanyutshu ndu la falanga yakawanyukaluya lu paya yanyu, ne dia dikambu so diaki munga undu.

¹³Nyose onengenyu, nyutshu la ndi le untu ako.

¹⁴Unyashungu Kanga-Wulu-Tshe anyuhumuya lukulu lʼolo le pami kako, dia ndi nyukimwela onengenyu ukina ndu Bendjamina. Naka vo wayumpumbia anʼami, kawumpumbiawo.

¹⁵Lʼokongo diku anʼandi wʼapami wakose eshasha la falanga tena pendi kame la Bendjamina, wakunela, wakahulo utsha lʼEdjibitu; wakatemala la ntundu ka Josefu.

¹⁶Lamʼakenyi Josefu ati; Bendjamina ambutuya la wo, ndi akatela ulami a luudu landi ati: Otshiya apami ane lu luudu, udiaki nyama kemotshi. Olongosole dambu, ne dia vo wayole kame la mi la midi.

¹⁷Ulami ako akatshi uku akawutela Josefu, akawaotshiya lu luudu la Josefu.

¹⁸Vo wakuki woma lamʼakandawaotshiya lu luudu la Josefu; wakatanela vati: Vo wambutotshiya lu luudu lu dikambu dia falanga ku yakatatani lu paya yasu etena ka ntundu. Vo wutuyanga la dikambu dia ntunda fumbi, la ntohotola punda yasu.

¹⁹Vo wakasukana le ulami a luudu la Josefu lakemadi la suku dia luudu, wakawutela vati:

²⁰We khumesu, shu takayi etena ka ntundu la ndjusumba mbu ya nde,

²¹ku lamʼakatatukuma la pangu, shu takakelekula paya yasu, tenyi ku falanga ya untu lʼuntu nye yeli lu paya kandi. Ku falanga yasu tshe kukeli. Shu tambukalula la yo lu anya asu ntu.

²²Shu takela ndu falanga kina ya ndjusumba mbu ya nde. Hateyi untu lakayudja falanga yako lu paya yasu.

²³Ndi akawatela ati: Ki kayali la nyu. Tanyukaki woma, Unyashungu anyu, Unyashungu a shenyu, kakanyudjela falanga lu paya yanyu. Dimi lakalungula falanga yanyu. Ndi akawaela Simeyona laki lu lukanu.

²⁴Ku ulami ako akawaotshiya lu luudu la Josefu, akawasha ashi, ku vo wakasuli ekulu. Ndi akasha punda yawo mbu ya nde.

²⁵Lamʼakawakungaka Josefu, vo wakalongosola ushasha awo, ne dia wakuki lukumu ati: Nyayole ma lakandi la midi.

²⁶Lamʼakakumi Josefu lakandi, wakawusha ushasha wakawawela, wakukhusamela.

²⁷Ndi akawambula ati: Nyu la wulu? Ndu usumbi wa shenyu lakanyamvutelaka eki la lumu? Ndi la wulu?

²⁸Vo wakûkaluya diui vati: Ukambi aye, shesu, eki la lumu ndu eki la wulu. Ku vo wakakole ete, wakolemia.

²⁹Josefu akedia ashu, akendi kushendi Bendjamina, lakuto la ndi utema otoi; akawambula ati: Ndi kushenyu lakanyamvutelaka one? Ndi akawutela ati: Onʼami Unyashungu akuki ketshi!

³⁰Josefu akayala la ulingulingu dikambu dia kushendi. Ku lamʼakandayangi ntundo la delu, ndi akasamanya dia mboto lu luudu landi lomotshi, akatulela loko.

³¹Ndi akotsha elundji, akatumbi, akayakimela; akati ati: Nyela ma.

³²Okone wakalongoswela Josefu dihuli diandi ndame, la anangu dihuli diawo vame, ndu asi Edjibitu wakalekaka ma lakandi, dihuli diawo vame, ne dia asi Edjibitu kondekaka la asi Heberu ma kame. Dikambu so diaki wononyi lu ashu wʼasi Edjibitu.

³³Anangu Josefu wakadjase la ntundu kandi uku akawahonyi lʼeutwelu kawo. Vo wakendanaka wamba efula.

³⁴Josefu akakahela ma diaki la ntundu kandi. Ndi akasha Bendjamina tena tanu ndeka akina. Vo wakano, wakangenangena kame la ndi.